پاکستان میں سینیٹ انتخابات: حکمراں اتحاد کے اُمیدوار کامیاب

پاکستان کے سینیٹ انتخابات میں حکمراں اتحاد کے اُمیدوار 19 میں سے 17 نشستوں پر کامیاب ہو گئے ہیں۔

غیر حتمی نتائج کے مطابق پاکستان پیپلزپارٹی کے 11 جب کہ مسلم لیگ (ن) کے چھ اُمیدوار سینیٹ الیکشن جیتنے میں کامیاب ہو گئے ہیں۔ اسلام آباد سے ٹیکنو کریٹس کی نشست پر اسحاق ڈار جب کہ جنرل نشست پر رانا محمود الحسن سینیٹر منتخب ہو گئے۔ پنجاب سے ٹیکنو کریٹس کی نشستوں پر مصدق ملک اور محمد اورنگزیب کامیاب ہو گئے ہیں۔ پنجاب سے خواتین کی مخصوص نشستوں پر انوشے رحمان اور بشریٰ انجم بٹ میدان مارنے میں کامیاب رہیں۔

سندھ میں سینیٹ انتخابات میں پاکستان پیپلزپارٹی کے 10 جب کہ متحدہ قومی موومنٹ (ایم کیو ایم) کا ایک اُمیدوار کامیاب ہو گئے ہیں۔ آزاد امیدوار فیصل واوڈا نے بھی میدان مار لیا ہے۔

پیپلز پارٹی کے مسرور احسن، ندیم بھٹو، اشرف علی جتوئی اور کاظم علی بھی سینیٹر منتخب ہو گئے ہیں۔ پیپلز پارٹی کے دوست علی جیسر، سرمد علی، ضمیر گھمرو، روبینہ قائم خانی اور قرت العین مری بھی کامیاب ہو گئے ہیں۔ غیر مسلموں کی نشست پر سندھ سے پیپلز پارٹی کے پونجو مل بھیل کامیاب ہو گئے ہیں۔ جنرل نشست پر ایم کیو ایم کے عامر ولی الدین چشتی بھی سینیٹر منتخب ہو گئے ہیں۔

اسلام آباد ہائی کورٹ کے چیف جسٹس عامر فاروق نے کہا ہے کہ ہائی کورٹ کے ججوں کو خطوط ملے ہیں جن کے بارے میں کہا جا رہا ہے کہ ان میں اینتھریکس ہے۔

اسلام آباد ہائی کورٹ میں سابق وزیرِا عظم عمران خان اور سابق وزیرِ خارجہ شاہ محمود قریشی کے خلاف سائفر کیس کی سماعت کے دوران چیف جسٹس عامر فاروق نے بتایا کہ ان خطوط کے ذریعے بنیادی طور پر اسلام آباد ہائی کورٹ کو دھمکایا کیا گیا ہے۔

سائفر کیس کی سماعت بدھ تک ملتوی کرتے ہوئے ان کا کہنا تھا کہ آج کی سماعت میں تاخیر کی ایک وجہ یہ خطوط تھے۔

اطلاعات کے مطابق اسلام آباد ہائی کورٹ کے آٹھ ججوں کو مشکوک خطوط موصول ہوئے۔ ایک جج کے اسٹاف نے موصول ہونے والا خط کھولا تو اس کے اندر پاؤڈر تھا۔

بعد ازاں اسلام آباد پولیس کے فارنزک ماہرین کی ٹیم اسلام آباد ہائی کورٹ پہنچی تاکہ وہ ان خطوط میں موجود پاؤڈر کا تجزیہ کر سکے۔

سپریم کورٹ میں منگل کو دائر ایک درخواست میں عدالت سے اسلام آباد ہائی کورٹ کے چھ ججز کی جانب سے لکھے گئے خط کی جوڈیشل انکوائری کرانے کی اپیل کی گئی ہے۔

ہائی کورٹ کے ججز نے عدالتی امور میں خفیہ اداروں کی مبینہ مداخلت کی شکایت پر مبنی ایک خط گزشتہ ہفتے سپریم جوڈیشل کونسل کو لکھا تھا۔ سپریم کورٹ نے گزشتہ روڈ اس معاملے پر از خود نوٹس لیا تھا جب کہ حکومت نے کمیشن تشکیل دیا تھا۔

لاہور ہائی کورٹ بار ایسوسی ایشن کی جانب سے دائر درخواست میں استدعا کی گئی ہے سپریم کورٹ حکومتی کمیشن کی تشکیل کو کالعدم قرار دے اور ججز کے خط پر خود انکوائری کرے۔

درخواست گزار نے سپریم کورٹ سے استدعا کی ہے کہ ججز کو دھمکانے اور عدالتی امور میں مداخلت کے ذمہ داروں کو مثالی سزا دی جائے۔