قومی اسمبلی اور سینیٹ کے اجلاس غیر معینہ مدت تک ملتوی، آئینی ترامیم کا بل پیش نہ ہو سکا

پیپلز پارٹی کے رہنما سید نوید قمر کا کہنا ہے کہ یہ تاثر دیا جا رہا ہے کہ ایک پارٹی کی جیت اور دوسری جماعت کو شکست ہوئی ہے۔ اگر جیت ہوئی ہے تو پارلیمنٹ کی ہوئی اور اگر شکست ہوئی ہے تو پارلیمنٹ کی ہوئی۔

قومی اسمبلی میں خطاب کرتے ہوئے نوید قمر نے کہا کہ آئینی ترامیم سب کی مشاورت سے ہو سکیں گی۔ ہر چیز کو آج کی سیاست کے چشمے سے نہیں دیکھنا چاہیے۔

ان کا مزید کہنا تھا کہ پی ٹی آئی سمجھتی ہے کہ عدلیہ طاقت ور ہو تو فائدہ ان کا ہے۔ پی ٹی آئی کے خیال میں پارلیمان مضبوط ہو تو فائدہ پیپلز پارٹی اور مسلم لیگ (ن) کو ہوگا۔

جمعیت علماء اسلام (ف) کی رکنِ قومی اسمبلی شاہدہ اختر علی نے کہا کہ ایوان میں ترامیم لانے کی بات ہو رہی تھی۔ لیکن نمبر پورے نہیں تھے۔ اگر عوام کی فلاح کے لیے کوئی چیز لانی ہے تو سب حمایت کریں۔

قومی اسمبلی میں خطاب میں انہوں نے کہا کہ جب خدشہ ہو کہ کسی خاص شخص کے لیے قانون سازی ہو رہی ہے تو یہی نتیجہ نکلتا ہے۔ بد قسمتی ہے کہ ایسے قوانین بن جاتے ہیں اور ہمیں بھگتنا بھی پڑتا ہے۔

متحدہ قومی موومنٹ پاکستان کے رہنما فاروق ستار کا کہنا تھا کہ اپوزیشن ڈرافٹ اور ورکنگ پیپر نہ ملنے کا شکوہ کر رہی ہے ۔

قومی اسمبلی میں خطاب میں فاروق ستار نے کہا کہ خصوصی کمیٹی میں ڈرافٹ نہ رکھتے تو ورکنگ پیپر رکھ دیتے۔

حکومت کا اتحادی ہونے کے لیے حوالے سے ایم کیو ایم کے رہنما نے کہا کہ متحدہ حکومت کی اتحادی ضرور ہے۔ لیکن ہم مسلم لیگ (ن) نہیں ہیں۔

حکومت پر تنقید کرتے ہوئے ان کا کہنا تھا کہ طریقۂ کار ٹھیک نہیں کریں گے تو اصلاحات نہیں ہوں گی۔

پشتونخوا ملی عوامی پارٹی کے سربراہ محمود خان اچکزئی کا خطاب میں کہنا تھا کہ اب بال حکومت کی کورٹ میں ہے۔

قومی اسمبلی میں خطاب میں انہوں نے کہا کہ ہم سب ایوان کی بالا دستی اور طاقت کے سر چشمے کے طور پر دیکھنا چاہتے ہیں۔

انہوں نے کہا کہ کل کچھ تو تھا جس کی پردہ داری تھی ۔

ان کا مزید کہنا تھا کہ جمہوری ترمیم کے لیے ووٹ آپ کا ہے۔ لیکن گڑ بڑ نہ کریں۔