قومی اسمبلی کے 302 ارکان کی حلف برداری، وزیرِ اعظم کا انتخاب تین مارچ کو ہو گا

پاکستان کی قومی اسمبلی کے افتتاحی اجلاس کے دوران 302 ارکانِ نے اسمبلی رکنیت کا حلف اٹھا لیا ہے جب کہ اسپیکر و ڈپٹی اسپیکر کا انتخاب کل عمل میں لایا جائے گا۔

قومی اسمبلی کے اسپیکر کے لیے مسلم لیگ ن کی جانب سے نامزد کردہ امیدوار سردار ایاز صادق اور سنی اتحاد کونسل کے نامزد امیدوار ملک محمد عامر ڈوگر کے کاغذات نامزدگی سیکریٹری قومی اسمبلی کو جمع کرائے گئے ہیں۔

سردار ایاز صادق کے تجویز کنندان میں چوہدری سالک حسین، عبدالعلیم خان، سید نوید قمر اور اویس احمد لغاری شامل ہیں جب کہ ملک عامر ڈوگر کے تجویز کنندان میں صاحبزادہ صبغت اللہ، علی محمد اور ڈاکٹر امجد علی خان شامل ہیں۔

قومی اسمبلی کے ڈپٹی اسپیکر کے لیے سید غلام مصطفی شاہ اور جنید اکبر کے کاغذات نامزدگی جمع ہوئے ہیں۔

گوادر میں گزشتہ کئی روز سے طوفانی بارشوں کے سبب آفت زدہ صورتِ حال پیدا ہو گئی ہے جب کہ میٹرک کے سالانہ پرچے بھی منسوخ کر دیے ہیں۔

نگراں وزیر اعلٰی بلوچستان میر علی مردان خان ڈومکی نے کہا ہے کہ متاثرین کی مشکلات کم کرنے کے لیے ہنگامی اقدامات اٹھائے جا رہے ہیں۔ مشکل کی اس گھڑی میں سول انتظامیہ اور فوج مل کر ریسکیو کارروائیوں میں مصروف ہے۔