قومی اسمبلی کے اجلاس کے دوران نعرے بازی، شورشرابہ
پاکستان میں قومی اسمبلی کے نومنتخب اراکین نے حلف اُٹھا لیا
پاکستان میں قومی اسمبلی کے نومنتخب اراکین نے رُکنیت کا حلف اُٹھا لیا ہے۔
اسپیکر قومی اسمبلی نے ارکان سے رُکنیت کا حلف لیا۔ سابق وزیرِ اعظم نواز شریف، سابق صدر آصف زرداری، شہباز شریف، بلاول بھٹو زرداری سمیت مسلم لیگ (ن)، پیپلزپارٹی، سنی اتحاد کونسل سمیت دیگر جماعتوں کے ارکان نے حلف اُٹھایا۔
اس دوران مسلم لیگ (ن) اور سنی اتحاد کونسل کے ارکان ایک دوسرے کے خلاف نعرے بازی کرتے رہے۔
آئی ایم ایف کو خط لکھنا ملک دشمنی کے مترادف ہے: نواز شریف
سابق وزیرِ اعظم اور مسلم لیگ (ن) کے قائد نواز شریف نے کہا ہے کہ آئی ایم ایف کو خط لکھنا ملک دشمنی کے مترادف ہے۔
جمعرات کو پارلیمنٹ ہاؤس آمد کے موقع پر میڈیا سے گفتگو کرتے ہوئے انہوں نے کہا کہ ایسے خط وہ لکھ سکتے ہیں یہ ان کا وطیرہ ہے۔
واضح رہے کہ پاکستان تحریک انصاف (پی ٹی آئی) نے عالمی مالیاتی ادارے (آئی ایم ایف) کو ایک خط لکھا ہے جس میں کسی بھی قسم کے بیل آؤٹ پیکج کے لیے مذاکرات میں ملک کے سیاسی استحکام کو مدِ نظر رکھنے کا کہا گیا ہے۔
نواز شریف نے کہا کہ کوئی سیاسی جماعت ایسے خط نہیں لکھ سکتی۔ آپ خود ہی اس کا نتیجہ اخذ کرلیں۔
قومی اسمبلی کا پہلا اجلاس، سنی اتحاد کونسل (پی ٹی آئی) کی حکمتِ عملی کیا ہو سکتی ہے؟
پی ٹی آئی ذرائع کا کہنا ہے کہ پی ٹی آئی آج ہونے والے قومی اسمبلی کے اجلاس میں شریک ہو گی۔ واضح رہے کہ انتخابات میں پی ٹی آئی کے حمایت یافتہ آزاد اُمیدواروں نے کامیابی کے بعد سنی اتحاد کونسل میں شمولیت اختیار کر لی ہے۔
ذرائع پی ٹی آئی کے مطابق پی ٹی آئی اراکین حلف لیں گے مگر انتخابات میں مبینہ دھاندلی کے خلاف احتجاج بھی ہو گا۔ اراکین عمران خان کے حق میں نعرے لگائیں گے جب کہ عمران خان کی تصاویر اجلاس میں لانے کی بھی کوشش کی جائے گی۔
قومی اسمبلی کے آج ہونے والے پہلے اجلاس میں حلف کے بعد اسپیکر، ڈیٹی اسپیکر قومی اسمبلی کے عہدے کے لیے نامزدگی فارم جمع ہوں گے جب کہ جمعے کو انتخاب کا امکان ہے۔
قومی اسمبلی کے ذرائع کا یہ بھی کہنا ہے کہ جس دن اسپیکر اور ڈپٹی اسپیکر کا انتخاب ہو گا، اسی دن ہی وزیرِ اعظم کے عہدے کے لیے انتخاب کا شیڈول جاری ہو گا۔