بعض عناصر الیکشن میں مداخلت کے الزامات لگا کر فوج کو بدنام کر رہے ہیں: کور کمانڈرز کانفرنس

سندھ ہائی کورٹ میں انٹرنیٹ اور سوشل میڈیا ویب سائٹ ایکس کی بندش کے خلاف درخواستوں کی سماعت میں چیئرمین پاکستان ٹیلی کمیونیکیشن اتھارٹی (پی ٹی اے) کو نوٹس جاری کر دیا۔

عدالت نے سماجی رہنما اور وکیل جبران ناصر کی توہینِ عدالت کی درخواست پر پی ٹی اے کے چیئرمین سمیت دیگر کو نوٹس جاری کیے۔

عدالت نے صحافی ضرار کھوڑو کی درخواست پر بھی 20 مارچ تک جواب طلب کر لیا ہے۔

سندھ ہائی کورٹ کا کہنا تھا کہ الیکشن کے دن انٹرنیٹ بندش پر آئندہ سماعت پر وزارت ِداخلہ کا جواب جمع کرایا جائے۔

عدالت نے انٹرنیٹ کی بحالی سے متعلق جاری حکم امتناع میں توسیع کر دی۔

پی ٹی اے نے جواب جمع کرا دیا جب کہ وزارتِ داخلہ اور وزارتِ ٹیلی کمیونیکیشن اتھارٹی نے جواب کے لیے مزید مہلت طلب کی۔

دورانِ سماعت چیف جسٹس نے ریمارکس دیے کہ ایک طرف کہتے ہیں کچھ بند نہیں کیا دوسری طرف سب بند پڑا ہے۔ ملک اس طرح کی انٹرنیٹ بندش کرکے نہیں چلتا ہے۔

خیبر پختونخوا کے وزیرِ اعلیٰ علی امین گنڈا پور نے اتوار کو دھاندلی کے خلاف احتجاج کا اعلان کیا ہے۔

اڈیالہ جیل میں عمران خان سے ملاقات کے بعد میڈیا سے گفتگو میں علی امین گنڈا پور نے کہا کہ تحریکِ انصاف انتخابات میں ہونے والی دھاندلی اور مخصوص نشستیں نہ ملنے کے خلاف پشاور میں اتوار پر امن احتجاج کرے گی۔

علی امین گنڈا پور کے مطابق وہ خود احتجاج کی قیادت کریں گے۔

ان کا مزید کہنا تھا کہ عمران خان سے خیبر پختونخوا کی صوبائی کابینہ کے حوالے سے مشاورت ہو گئی ہے۔ ایک بہترین ٹیم لے کر آ رہے ہیں۔

سپریم کورٹ آف پاکستان ذوالفقار علی بھٹو کیس پر صدارتی ریفرنس پر بدھ کو اپنی رائے سنائے گی۔

چیف جسٹس قاضی فائز عیسیٰ کی سربراہی میں نو رکنی لارجر بینچ نے چار مارچ کو صدارتی ریفرنس پر رائے محفوظ کی تھی۔

واضح رہے کہ ذوالفقار علی بھٹو کی پھانسی کے خلاف صدارتی ریفرنس 2011 میں دائر کیا گیا تھا۔

پاکستان فوج کے شعبہ تعلقاتِ عامہ آئی ایس پی آر کی جانب سے جاری کردہ کور کمانڈرز کانفرنس کے اعلامیے کے مطابق مسلح افواج نے دیے گئے مینڈیٹ کے مطابق عام انتخابات کے انعقاد کے لیے عوام کو محفوظ ماحول فراہم کیا اور افواجِ پاکستان کا انتخابی عمل سے کوئی تعلق نہیں تھا۔

اعلامیے کے مطابق کچھ مخصوص مگر محدود سیاسی عناصر، سوشل میڈیا اور میڈیا کے کچھ سیگمنٹس مداخلت کے غیر مصدقہ الزامات کے ساتھ پاکستان کی مسلح افواج کو بدنام کر رہے ہیں جو قابلِ مذمت ہے۔

آئی ایس پی آر کے اعلامیے کے مطابق آرمی چیف کی زیرِ صدارت کور کمانڈرز کانفرنس میں اس بات پر تشویش کا اظہار کیا گیا کہ بعض عناصر کی جانب سے معاشرے میں مایوسی اور تقسیم ڈالنے کے لیے جھوٹی اور جعلی خبریں پھیلائی جا رہی ہیں۔

کور کمانڈرز کانفرنس کے اعلامیے میں کہا گیا کہ وزیرِ اعظم کے عزم کے مطابق نو مئی کے منصوبہ سازوں، اشتعال دلانے والوں، حوصلہ افزائی کرنے والوں اور شہدا کی یادگاروں کی بے حرمتی کرنے والوں اور فوجی تنصیبات پر حملہ کرنے والوں کو یقینی طور پر قانون اور آئین کی متعلقہ دفعات کے تحت انصاف کے کٹہرے میں لایا جائے گا۔