شہباز شریف وزیرِ اعظم منتخب؛ مخالفین کو 'میثاقِ مفاہمت' کی پیش کش

قائدِ ایوان کے انتخاب سے قبل سنی اتحاد کونسل (پی ٹی آئی) کے ارکان نعرے بازی کر رہے ہیں۔

سنی اتحاد کونسل کے اراکین نے عمران خان کے پوسٹرز اُٹھا رکھے ہیں۔ سابق وزیرِ عظم نواز شریف، بلاول بھٹو زرداری، آصف زرداری سمیت دیگر رہنما بھی ایوان میں موجود ہیں۔

جمعیت علمائے اسلام (ف) نے وزیرِ اعظم کے انتخاب کی کارروائی کا بائیکاٹ کر دیا ہے۔

جمعیت علمائے اسلام (ف) نے انتخابات میں بڑے پیمانے پر دھاندلی کے الزامات عائد کیے تھے۔ نواز شریف نے مولانا فضل الرحمٰن کو شہباز شریف کی حمایت کے لیے منانے کی کوششیں کی تھیں جو ناکام رہی تھیں۔

نئے قائدِ ایوان کے انتخاب کے لیے قومی اسمبلی کا اجلاس شروع ہو گیا ہے۔ اسپیکر قومی اسمبلی سردار ایاز صادق اجلاس کی صدارت کر رہے ہیں۔

مسلم لیگ (ن) کے شہباز شریف جب کہ سنی اتحاد کونسل (پی ٹی آئی) کے عمر ایوب مدِ مقابل ہیں۔

وزیر اعظم کے انتخاب کے لیے قومی اسمبلی کا اجلاس صبح 11 بجے شروع ہونا تھا، تاہم اجلاس ایک گھنٹے کی تاخیر سے شروع ہوا۔