پاکستانی فوج کے 12 میجر جنرلز کی بطور لیفٹننٹ جنرلز ترقی

پاکستانی فوج کے 12 میجر جنرلز کو لیفٹننٹ جنرل بنا دیا گیا ہے۔ جن افسران کو ترقی دی گئی ہے، ان میں ڈی جی آئی ایس پی آر میجر جنرل بابر افتحار، میجر جنرل انعام حیدر ملک، میجر جنرل فیاض حسین شاہ، میجر جنرل نعمان زکریا، میجر جنرل محمد ظفر اقبال، میجر جنرل ایمن بلال صفدر شامل ہیں۔

افواجِ پاکستان کے ترجمان ادارے آئی ایس پی آر کے مطابق میجر جنرل احسن گلزار، میجر جنرل سید عامر رضا، میجر جنرل شاہد امتیاز، میجر جنرل محمد منیر افسر، میجر جنرل یوسف جمال، میجر جنرل کاشف نذیر کو بھی لیٖفٹننٹ جنرل بنا دیا گیا ہے۔

ممنوعہ فنڈنگ کیس میں عمران خان کے خلاف مقدمہ درج

پاکستان کے وفاقی تحقیقاتی ادارے (ایف آئی اے) نے سابق وزیرِ اعظم اور پاکستان تحریکِ انصاف (پی ٹی آئی) کے چیئرمین عمران خان کے خلاف فارن فنڈنگ کیس میں مبینہ ممنوع فنڈنگ پر مقدمہ درج کر لیا ہے۔

مقامی میڈیا کے مطابق ایف آئی اے کے اسلام آباد کے کارپوریٹ بینکنگ سرکل نے عمران خان سمیت تحریکِ انصاف کے پانچ رہنماؤں، نجی بینک کے مینیجر اور تحریکِ انصاف کی مالی امور کو مقدمے میں شامل کیا ہے۔

رپورٹس کے مطابق مقدمے میں تحریکِ انصاف کے جن دیگر رہنماؤں کو نامزد کیا گیا ہے ان میں سینیٹر سیف اللہ نیازی، سردار طارق، سید یونس، عامر کیانی، طارق شفیع سمیت دیگر شامل ہیں۔

مقدمے کے مطابق ملزمان نے فارن ایکسچینج ایکٹ کی خلاف ورزی کی ہے۔

مقامی میڈیا کی رپورٹس کے مطابق ایف آئی آر میں کہا گیا ہے کہ تحریک انصاف کا بحیثیت جماعت ایک نجی بینک میں اکاؤنٹ تھا۔ یہ اکاؤنٹ ’نیا پاکستان‘ اسکیم کے تحت کھولا گیا تھا جب کہ غیر قانونی طور پر یہ اکاؤنٹ آپریٹ کرنے کے سبب بینک کے مینیجر کو مقدمے میں نامزد کیا گیا ہے۔

پنجاب کے وزیرِ داخلہ کرنل (ر) ہاشم ڈوگر نے اپنے عہدے سے استعفی دے دیا ہے۔

ہاشم ڈوگر نے منگل کو ایک ٹویٹ میں مستعفی ہونے کا اعلان کیا ۔ اپنی ٹویٹ میں ہاشم ڈوگر کا کہنا تھا کہ وہ ذاتی وجوہات کی بنیاد پر مستعفی ہو رہے ہیں۔

ہاشم ڈوگر کا کہنا تھا کہ وہ بطور کارکن پاکستان تحریکِ انصاف کے لیے کام کرتے رہیں گے۔

مقامی ذرائع ابلاغ کی رپورٹس کے مطابق تحریکِ انصاف کی قیادت 25 مئی کو تحریکِ انصاف کا اسلام آباد کی جانب لانگ مارچ روکنے والے بیورو کریٹس اور مسلم لیگ (ن) کے رہنماؤں کے خلاف مؤثر کارروائی نہ ہونے پراُن سے نالاں تھی۔

ممنوعہ فنڈنگ کیس: رجسٹرار اسلام آباد ہائی کورٹ کا عمران خان کی حفاظتی ضمانت پر اعتراض

رجسٹرار اسلام آباد ہائی کورٹ نے سابق وزیرِ اعظم اور چیئرمین پاکستان تحریکِ انصاف عمران خان کی ممنوعہ فنڈنگ کیس میں حفاظتی ضمانت کی درخواست پر اعتراضات لگا دیے ہیں۔

اسلام آباد سے وائس آف امریکہ کے نمائندے عاصم علی رانا کے مطابق عمران خان نے ممنوعہ فنڈنگ کیس میں گرفتاری کے خدشے کے پیشِ نظر بدھ کو اسلام آباد ہائی کورٹ میں حفاظتی ضمانت کے لیے درخواست دائر کی۔

رجسٹرار آفس نے سابق وزیرِ اعظم کی درخواست پر تین اعتراضات اٹھاتے ہوئے کہا کہ درخواست گزار نے بائی میٹرک نہیں کرایا اور درخواست کے ساتھ ایف آئی آر کی غیر مصدقہ نقل لگائی گئی ہے۔

رجسٹرار نے یہ اعتراض بھی اٹھایا کہ درخواست گزار خصوصی عدالت سے پہلے ہائی کورٹ کیسے آ سکتے ہیں۔