ملالہ یوسف زئی کی پاکستان آمد، سیلاب متاثرہ علاقوں کا دورہ کریں گی

ملالہ یوسف زئی اپنے والدین کے ہمراہ پاکستان پہنچ گئی ہیں جہاں وہ سیلاب سے متاثرہ علاقوں کا دورہ کریں گی۔

ملالہ قطر ائیرلائن کی پرواز 604 کے ذریعے منگل کی صبح کراچی کے جناح انٹرنیشنل ایئرپورٹ پہنچیں جہاں سے انہیں سخت سیکیورٹی میں رہائش گاہ پہنچایا گیا۔

نوبیل انعام یافتہ ملالہ منگل کو کراچی میں ہی قیام کریں گی جس کے بعد وہ سندھ حکومت کے حکام کے ہمراہ سیلاب سے متاثرہ دادو کا دورہ کریں گے۔

سوات سے تعلق رکھنے والی ملالہ یوسف زئی 2015 میں طالبان کے حملے میں شدید زخمی ہو گئی تھیں جس کے بعد انہیں علاج کے لیے برطانیہ روانہ کیا گیا۔ ملالہ ان دنوں برطانیہ میں ہی مقیم ہیں. وہ دوسری مرتبہ پاکستان آئی ہیں۔

وزیرِ خزانہ اسحاق ڈار آئی ایم ایف اور عالمی بینک سے مذاکرات کے لیے واشنگٹن روانہ

وفاقی وزیرِ خزانہ اسحاق ڈار امریکہ کے لیے روانہ ہو گئے ہیں جہاں وہ عالمی مالیاتی ادارے [آئی ایم ایف] اور ورلڈ بینک کی ٹیموں سے مذاکرات کریں گے۔

وزیرِ خزانہ اسحاق ڈار نے حال ہی میں ایک پریس کانفرنس کے دوران کہا تھا کہ حکومت عالمی اداروں کے ساتھ طے پانے والے معاہدوں کی مکمل پاسداری کرے گا اور وقت پر قرض ادا کرے گا۔

دورۂ امریکہ کے دوران اسحاق ڈار کی آئی ایم ایف اور ورلڈ بینک کی ٹیموں کے ساتھ مذاکرات میں قرض کی ادائیگیوں کے معاملات پر بات چیت ہو گی۔

تحریکِ انصاف نے آصف زرداری کے خلاف توشہ خانہ ریفرنس جمع کرا دیا

پاکستان تحریکِ انصاف نے سابق صدر آصف علی زرداری کے خلاف توشہ خانہ ریفرنس قومی اسمبلی سیکریٹریٹ میں جمع کر ادیا ہے۔

ریفرنس میں مؤقف اختیار کیا گیا ہے کہ سابق صدر نے سابق وزیرِ اعظم یوسف رضا گیلانی کے دور میں توشہ خانہ سے تین مہنگی گاڑیاں لیں اور قوانین سے انحراف کیا۔ ریفرنس میں سابق صدر کو نااہل قرار دینے کا مطالبہ کیا گیا ہے۔

ریفرنس تحریکِ انصاف کے رہنما زلفی بخاری اور افتحار درانی کی جانب سے دائر کیا گیا۔

ریفرنس میں مؤقف اختیار کیا گیا ہے کہ سابق صدر بطور صدر توشہ خانہ سے تحائف لینے کے اہل نہیں تھے۔

وزارتِ داخلہ کی استدعا مسترد، الیکشن کمیشن کا 16 اکتوبر کو ہی ضمنی الیکشن کرانے کا اعلان

الیکشن کمیشن آف پاکستان نے وفاقی وزارتِ داخلہ کی استدعا مسترد کرتے ہوئے قومی اور صوبائی اسمبلی کے 12 حلقوں میں ضمنی انتخابات 16 اکتوبر کو ہی کرانے کا اعلان کیا ہے جب کہ کراچی ڈویژن کے تمام اضلاع میں بلدیاتی انتخابات 23 اکتوبر کو ہوں گے۔

منگل کو چیف الیکشن کمشنر سکندر سلطان راجہ کی زیرِ صدارت ہونے والے اجلاس میں طویل مشاورت کے بعد یہ فیصلہ کیا گیا۔

وزارتِ داخلہ نے ملک کی سیکیورٹی صورتِ حال اور سیلاب کے پیشِ نظر انتخابات 90 روز تک ملتوی کرنے کی درخواست کی تھی۔

الیکشن کمیشن نے اجلاس کے دوران چاروں صوبوں کے پولیس حکام اور چیف سیکریٹریز سے مشاورت کی جس کے بعد فیصلہ کیا گیا کہ انتخابات 16 اکتوبر کو ہی ہوں گے۔تاہم این اے 45 کرم میں ضمنی الیکشن 23 اکتوبر کو کرانے کا اعلان کیا گیا ہے۔

الیکشن کمیشن کے مطابق جن حلقوں میں 16 اکتوبر کو پولنگ شیڈول ہے، ان میں این 22 مردان، این اے 24 چارسدہ، این 31 پشاور، این اے 108 فیصل آباد،این اے 157 ملتان، این اے 118 ننکانہ صاحب، این اے 237 ملیر کراچی اور این اے 239 کورنگی کراچی شامل ہیں۔ اسلام آباد ہائی کورٹ نے این اے 246 سے تحریکِ انصاف کے رُکن قومی اسمبلی شکور شاد کی درخواست پر اس نشست کو خالی قرار دینے کا الیکشن کمیشن کا نوٹی فکیشن معطل کر دیا تھا۔

یہ نشتیں اسپیکر قومی اسمبلی راجہ پرویز اشرف کی جانب سے تحریکِ انصاف کے اراکین کے استعفے منظور کیے جانے کے فیصلے پر الیکشن کمیشن نے خالی قرار دی تھیں۔ ان میں نو جنرل نشستیں اور دو مخصوص نشستیں شامل ہیں۔