’نواز شریف کا راستہ صاف ہے، جلد وطن واپس آئیں گے‘

پاکستان کے سابق وزیرِ اعظم نواز شریف کی صاحب زادی اور مسلم لیگ (ن) کی نائب صدر مریم نواز نے کہا ہے کہ نواز شریف جلد وطن واپس آئیں گے۔ ان کا پاکستان واپسی کا راستہ صاف ہے۔

لاہور میں مسلم لیگ (ن) کے دیگر رہنماؤں کے ہمراہ پریس کانفرنس کرتے ہوئے مریم نواز نے کہا کہ نواز شریف ملک واپس کب آئیں گے؟ اس بات کا فیصلہ وہ خود کریں گے۔

حزب اختلاف پر تنقید کرتے ہوئے انہوں نے کہا کہ عمران خان کو پاکستان کی سیاست سے نکال دیں تو ملک ترقی کرے گا۔ گزشتہ برسوں میں پاکستان تنزلی کی جانب جاتا رہا ہے۔

سابق وزیرِ اعظم کا ذکر کرتے ہوئے انہوں نے کہا کہ عمران خان پر سنگین الزامات ہیں۔ ان کے خلاف ثبوت موجود ہیں، اس لیے ان کو اب کوئی عدالت نہیں بچا سکتی۔

جب بھی انصاف ہوگا عمران خان جیل کی سلاخوں کے پیچھے ہوں گے۔

اسلام آباد ہائی کورٹ کے چیف جسٹس اطہر من اللہ کا نام لے کر مریم نواز کا کہنا تھا کہ وہ ان کی عزت کرتی ہیں۔

اس کے ساتھ ساتھ عمران خان کے خلاف توہینِ عدالت کا کیس ختم کرنے پر انہوں نے کہا کہ فراخ دلی کا مظاہرہ اس قسم کے شیطانی ذہن کے ساتھ نہیں کیا جاتا۔ اگر ایسے انسان کو معاف کیا جائے گا جو جلسوں میں وہ الزامات لگائے تو یہ سلسلہ جاری رہے گا اور وہ جب قانون کی گرفت میں آئے گا تو معافی مانگ لے گا۔

انہوں نے کہا کہ عمران خان نے خاتون جج سے معافی اس لے مانگی تاکہ وہ نااہل نہ ہو جائیں۔ کسی بھی شخص نے خاتون جج سے نہیں پوچھا کہ عمران خان کو معافی ملنی چاہیے یا نہیں۔

پاسپورٹ ملنے کے بعد مریم نواز لندن روانہ

مسلم لیگ ن کی نائب صدر مریم نواز قطر ایئر ویز کی پرواز کے ذریعے لندن روانہ ہو گئی ہیں جہاں وہ لگ بھگ ایک ماہ قیام کریں گی۔

مریم نواز بدھ کی صبح ساڑھے آٹھ بجے لاہور کے علامہ اقبال انٹرنیشنل ایئرپورٹ پہنچیں۔ اس موقع پر مسلم لیگ ن کے کچھ رہنما بھی ان کے ہمراہ تھے۔

مریم نواز نے گزشتہ روز ہی لاہور ہائی کورٹ سے اپنا ضبط شدہ پاسپورٹ وصول کیا تھا۔ عدالتِ عالیہ نے چوہدری شوگر ملز کیس میں ضمانت کے عوض مریم نواز کا پاسپورٹ تحویل میں لیا تھا۔

شریف خاندان کے ذرائع کے مطابق مریم نواز لندن میں اپنے والد نواز شریف کی رہائش گاہ پر قیام کریں گی اور وہ ایک ماہ تک لندن میں ہی رہیں گی۔

مقامی ذرائع ابلاغ میں یہ خبریں بھی گردش کر رہی ہیں کہ مریم نواز اپنے والد اور سابق وزیرِ اعظم نواز شریف کے ہمراہ وطن واپس آئیں گی۔ تاہم آزاد ذرائع سے اس کی تصدیق نہیں ہو سکی ہے۔

پیر کو مذکور کیس کی سماعت کے دوران مریم کے وکلا نے مؤقف اختیار کیا کہ نیب نے اب تک مریم کے خلاف کیس فائل نہیں کیا اس کے باوجود ان کا پاسپورٹ چار برس سے عدالتی تحویل میں ہے۔ کسی کی نقل و حرکت کو روکنا بنیادی حقوق کا معاملہ ہے۔

عدالت نے مریم نواز کی پاسپورٹ واپسی کی درخواست منظور کرتے ہوئے پاسپورٹ حوالے کرنے کا حکم دیا تھا۔

عمران خان کی بیرونی سازش کا بھانڈا پھوٹ گیا ہے: خواجہ آصف

وزیرِ دفاع خواجہ محمد آصف نے کہا ہے کہ عمران خان کی بیرونی سازش کا بھانڈا پھوٹ چکا ہے۔ عمران خان جلسوں میں پاکستان کی سیکیورٹی فورسز کے خلاف سخت زبان استعمال کرتے ہیں، لیکن اندرونِ خانہ اُن کے پاؤں پڑ جاتے ہیں۔

خواجہ آصف کا کہنا تھا کہ عمران خان نے صدرِ پاکستان کے ذریعے فوجی قیادت کو پیغام بھجوایا اور ایوانِ صدر میں ہی بیٹھ کر فوجی قیادت کے سامنے ہاتھ جوڑے۔

بدھ کو اسلام آباد میں نیوز کانفرنس کرتے ہوئے خواجہ آصف کا کہنا تھا کہ عمران خان کو صرف نومبر کی فکر ہے۔ کیوں کہ اُنہیں لگتا تھا کہ نہ صرف اپنی حکومت کی پہلی مدت پوری کریں گے بلکہ اگلے پانچ سال بھی وہی اقتدار میں رہیں گے۔

وزیرِ دفاع کا مزید کہنا تھا کہ ہم چاہتے ہیں کہ آئین اور قانون کے دائرے میں رہتے ہوئے، عمران خان پر ہاتھ ڈالیں۔

سائفر کے حوالے سے تبصرہ کرتے ہوئے خواجہ آصف کا کہنا تھا کہ عمران خان نے کہا تھا کہ اُن کے پاس سائفر کی کاپی ہے تو اب ہم پوچھتے ہیں کہ اب وہ کاپی کہاں ہے۔

خواجہ آصف نے کہا کہ نومبر میں آئین اور قانون کے مطابق سارے مرحلے عبور ہوں گے۔ عمران خان کے ترلوں اور بھڑکوں کے درمیان فرق ہر شخص کو پتاچل چکا ہے۔ کیوں کہ آڈیو لیکس کے بعد سچ سب کے سامنے آ گیا ہے۔

خیال رہے کہ رواں برس نومبر میں موجودہ آرمی چیف جنرل قمر جاوید باجوہ کی مدتِ ملازمت پوری ہو رہی ہے اور وزیرِ اعظم کو پانچ سینئر ترین جنرلز میں سے کسی ایک کو بطور آرمی چیف تعینات کرنا ہے۔

جنرل باجوہ کی میزبانی پر خوشی ہوئی: لائیڈ آسٹن

امریکہ کے وزیرِ دفاع لائیڈ آسٹن نے پاکستان کی بری فوج کے سربراہ جنرل قمر جاوید باجوہ سے ملاقات کے حوالے سے ایک بیان جاری کیا ہے۔

انہوں نے ایک ٹویٹ میں کہا کہ ہم پاک امریکہ تعلقات کے 75 سال کا جشن منا رہے ہیں اور اس موقع پر پاکستان کے آرمی چیف کی پینٹاگان میں میزبانی پر خوشی ہوئی۔

لائیڈ آسٹن کے مطابق جنرل باجوہ سے ملاقات میں دفاعی شراکت داری اور باہمی امور پر بات چیت ہوئی۔