تحریکِ انصاف کے آزادی مارچ کے دوران پیش آئے واقعات کی تحقیقات کے لیے ٹربیونل قائم

پاکستان تحریکِ انصاف کے 25 مئی کو 'آزادی مارچ' کے دوران پیش آنے والے واقعات کی تحقیقات کے لیے ایک رکنی ٹربیونل قائم کر دیا گیا ہے۔

وزیرِ اعلیٰ پنجاب چوہدری پرویز الہیٰ کے مطابق صوبائی حکومت نے ٹربیونلز آف انکوائری آرڈیننس 1969 کی شق تین کے تحت ٹربیونل قائم کیا ہے۔

جسٹس ریٹائرڈ شبر رضا رضوی پر مشتمل ایک رکنی ٹربیونل 25 مئی کے واقعات کی تحقیقات کرے گا۔ اس حوالے سے جاری ہونے والے نوٹی فکیشن پر 24 ستمبر کی تاریخ درج ہے۔

'اب ہم نے صرف کھیلنا ہے امریکہ کا نام نہیں لینا': عمران خان کی سائفر پر مبینہ آڈیو بھی لیک

سابق وزیرِ اعظم عمران خان کی بھی مبینہ آڈیو لیک ہو گئی ہے جس میں انہیں سائفر کو بیرونی سازش بنا کر پیش کرنے کی بات کرتے ہوئے سنا جا سکتا ہے۔

لیک ہونے والی مبینہ آڈیو میں عمران خان اپنے پرنسپل سیکریٹری اعظم خان سے گفتگو کرتے ہوئے یہ کہہ رہے ہیں کہ اب ہم نے صرف کھیلنا ہے امریکہ کا نام نہیں لینا جس پر اعظم خان سابق وزیرِ اعظم کو کہتے ہیں کہ سائفر پر ایک میٹنگ کر لیتے ہیں۔

اعظم خان کہتے ہیں شاہ محمود قریشی [وزیرِ خارجہ] یہ کریں گے کہ وہ لیٹر پڑھ کر سنائیں گے اور جو وہ پڑھیں گے اسے کاپی میں بدل دیں گے اور وہ میں منٹس میں تبدیل کر لوں گا کہ سیکریٹری خارجہ نے یہ چیز بنا دی ہے۔ پھر اینلسز اپنی مرضی کے منٹس میں کر دیں گے تاکہ منٹس آفس کے ریکارڈ میں ہو۔ ان کے بقول اینلیسز یہ ہوگا کہ یہ تھریٹ ہے اور سفارتی زبان میں اسے تھریٹ کہتے ہیں۔

اعظم خان, عمران خان کو ایک میٹنگ کرنے کا مشورہ دیتے ہیں جس پر سابق وزیرِ اعظم سوال پوچھتے ہیں کہ میٹنگ میں شاہ محمود قریشی، آپ، میں اور سہیل [سیکریٹری خارجہ] کو بلائیں۔ جس پر اعظم خان اثبات میں جواب دیتے ہیں۔

سابق وزیرِ اعظم عمران خان نے دعویٰ کیا تھا کہ امریکہ نے ان کی حکومت گرانے کی دھمکی دی تھی اور امریکہ میں موجود سفیر نے اس حوالے سے سائفر بھیجا تھا۔

واضح رہے کہ رواں برس اپریل میں اپوزیشن جماعتوں نے قومی اسمبلی سے عدم اعتماد کی تحریک منظور کراتے ہوئے عمران خان کی حکومت کا خاتمہ کر دیا تھا۔

سائفر پر ابھی کھیلا نہیں، ایکسپوز کریں گے تو کھیلیں گے: عمران خان

شہباز شریف حکومت نے لیک کی ہے اور یہ اچھا ہوا ہے کہ آڈیو لیک ہوئی ہے کیوں کہ وہ چاہتے ہیں کہ پورا سائفر لیک ہو۔

اسلام آباد میں صحافیوں سے گفتگو کرتے ہوئے عمران خان نے کہا کہ وہ چاہتے ہیں کہ پورا سائفر لیک ہو تاکہ سب کو پتا چلے کہ کتنی بڑی بیرونی سازش ہوئی ہے۔

جب عمران خان سے سوال پوچھا گیا کہ آڈیو لیک میں آپ کہہ رہے کہ اس پر کھیلیں گے اس کا دفاع کس طرح کریں گے؟ جس پر انہوں نے کہا کہ ابھی انہوں نے اس پر کھیلا ہی نہیں ابھی یہ ایکسپوز کریں گے تو اس پر کھیلیں گے۔

آڈیو لیکس کا معاملہ: وزیرِ اعظم شہباز شریف نے کابینہ کا ہنگامی اجلاس طلب کر لیا

وزیرِ اعظم شہباز شریف نے آڈیو لیکس کے معاملے پر وفاقی کابینہ کا ہنگامی اجلاس طلب کر لیا ہے۔

ذرائع کے مطابق وزیرِ اعظم نے جمعے کو کابینہ کا اجلاس طلب کیا ہے جس میں نیشنل سیکیورٹی کمیٹی کے فیصلوں کی توثیق کیے جانے کا امکان ہے۔

بدھ کو نیشنل سیکیورٹی کمیٹی کے اجلاس میں سائبر سیکیورٹی سے متعلق لیگل فریم ورک کی تیاری کا فیصلہ کیا گیا تھا جب کہ آڈیو لیکس کے معاملے پر تحقیقات کے لیے اعلیٰ اختیاراتی کمیٹی تشکیل دینے کی بھی منظوری دی گئی تھی جس کے سربراہ وزیرِ داخلہ رانا ثناء اللہ ہوں گے۔