انٹربینک میں ڈالر 3 روپے 12 پیسے سستا

انٹربینک میں ڈالر کے مقابلے میں روپے کی قدر مستحکم ہو رہی ہے۔ بدھ کو ٹریڈنگ کے دوران ڈالر تین روپے 12 پیسے سستا ہو کر 229 روپے کا ہو گیا ہے۔

گزشتہ پانچ روز میں انٹربینک میں ڈالر 10 روپے 71 پیسے سستا ہو چکا ہے۔

اسی طرح اوپن مارکیٹ میں ڈالر ایک روپے پچاس پیسہ سستا ہو کر 230 روپے 50 پیسے کا ہو گیا ہے۔

سائفر معاملے پر حکومت مزید تحقیقات کرنا چاہے گی: وفاقی وزیرِ قانون

وفاقی وزیرِ قانون اعظم نذیر تارڑ نے کہا ہے کہ قومی سلامتی کمیٹی نے سائفر کے معاملے پر گفتگو کی۔ اس مسئلے پر حکومتِ پاکستان مزید تحقیق کرنا چاہے گی تاکہ آئندہ قومی سلامتی کے حساس معاملات پر کوئی بھی اپنی مرضی مسلط نہ کر سکے جس سے ریاست کے معاملات متاثر ہوں۔

اسلام آباد میں پریس کانفرنس کرتے ہوئے وزیرِ قانون نے کہا کہ عمران خان نے خطرناک کھیل کھیلا ہے اور جو اس کھیل میں شریک سرکاری افسران کو احساس ہونا چاہیے تھا کہ وہ ریاست کے ملازم ہیں انہیں کسی سیاسی جماعت کے ایجنڈے کے لیے استعمال نہیں ہونا چاہیے تھا۔

انہوں نے کہا کہ پوری قوم نے سائفر کی کہانی کی بنیاد دیکھ لی ہے جب کہ عمران خان کا یہ کہنا مضحکہ خیز ہے کہ موجودہ وزیرِ اعظم نے آفیشل سیکریٹ ایکٹ کی خلاف ورزی کی ہے۔

وفاقی وزیرِ قانون کا کہنا تھا کہ امریکہ اور پاکستان کے تعلقات کی ایک طویل تاریخ ہے اور ان تعلقات میں نشیب و فراز بھی آتے رہے ہیں لیکن عمران خان نے سائفر پر جو کھیل کھیلا ہے اس سے بہت نقصان ہوا ہے۔

سائفر سنگین معاملہ ہے جو معافی تلافی سے ختم نہیں ہوگا: سینیٹر شیری رحمٰن

سینیٹر شیری رحمٰن نے کہا ہے کہ سائفر پر کھیلنے کے بیانیے سے عمران خان کو ضرور فائدہ پہنچا ہوگا لیکن پاکستان کو اس کا ناقابلِ تلافی نقصان ہوا ہے۔ یہ ایک سنگین معاملہ ہے جو معافی تلافی سے ختم نہیں ہوگا۔

شیری رحمٰن نے ٹوئٹر تھریڈ میں کہا کہ عمران خان کی آڈیو لیک کی اعلیٰ سطح پر تحقیقات ہونی چاہیے۔ ہم ان سے غیر مشروط معافی کا مطالبہ نہیں کریں گے۔

انہوں نے کہا کہ جس وقت عمران خان پاکستان کے مفادات کے خلاف سازشی بیانیہ گھڑ رہے تھے اس وقت انہوں نے ملک کے مفادات کا تحفظ کرنے کا حلف اٹھایا ہوا تھا۔ یہ افسوس ناک گفتگو عمران خان کی نہیں، پاکستان کے وزیر اعظم کی ہے۔ کوئی عام شخص نہیں بلکہ اس وقت کا وزیراعظم ملک کے مفادات کا سمجھوتا کر رہا تھا۔

شیری رحمٰن کا مزید کہنا تھا کہ "میں پہلے دن سے کہہ رہی ہوں یہ 'عمران بچاؤ' تحریک ہے، یہ خود کو اور اپنی سیاست کو بچانے کے لیے کچھ بھی کرنے کو تیار ہیں۔ غداری اور ملک دشمنی کے سرٹیفکیٹ بانٹنے والے خود ملک اور اداروں کے خلاف سازش کرتے رہے۔"

ایوان فیلڈ ریفرنس میں سزا کے خلاف اپیلیں منظور، مریم نواز اور کیپٹن (ر) صفدر کو بری کرنے کا حکم

اسلام آباد ہائی کورٹ نے مسلم لیگ (ن) کی نائب صدر مریم نواز اور اُن کے شوہر کیپٹن (ر) صفدر کو ایون فیلڈ اپارٹمنٹس ریفرنس میں باعزت بری کرنے کا حکم دیا ہے۔

جمعرات کو مختصر فیصلے میں اسلام آباد ہائی کورٹ نے احتساب عدالت کے فیصلے کو کالعدم قرار دیتے ہوئے مریم نواز کو بری کرنے کا حکم دیا۔

عدالتی فیصلے میں کہا گیا ہے کہ نیب مریم نواز اور کیپٹن (ر) صفدر کے خلاف کیس ثابت کرنے میں ناکام رہا۔

ایون فیلڈ ریفرنس میں نیب عدالت نے 2018 میں نواز شریف کو 10 سال، مریم نواز کو سات سال جب کہ کیپٹن (ر) صفدر کو ایک سال قید کی سزا سنائی تھی۔ تاہم اسلام آباد ہائی کورٹ نے مریم نواز اور کیپٹن صفدر کا کیس نواز شریف کے کیس سے الگ کر دیا تھا۔