پاکستان میں الیکشن؛ سیاسی جماعتوں کے جلسے، اُمیدواروں کو ہراساں کرنے کے الزامات

بلوچستان میں مبینہ گم شدگیوں کا معاملہ ہو یا صوبے کی سیاست اور حکومت میں مبینہ مداخلت، سب سے زیادہ پاکستان کی فوج ہی تنقید اور الزامات کی زد میں رہتی ہے۔ لیکن وائس آف امریکہ کے حالیہ سروے میں یہ بات سامنے آئی ہے کہ بلوچستان میں سب سے زیادہ قابلِ اعتماد قومی ادارہ فوج ہے.

وائس آف امریکہ نے یہ سروے بین الاقوامی ادارے اپسوس کے ذریعے کرایا تھا۔ اس سائنٹیفک سروے میں پورے پاکستان سے تعلق رکھنے والے 18 سے 34 برس عمر کے افراد سے رائے لی گئی تھی۔

اس سروے میں قومی اداروں پر اعتماد سے متعلق پوچھے گئے سوال میں پاکستان کے نوجوانوں کی بھاری اکثریت (74 فی صد) نے فوج پر اعتماد کا اظہار کیا ہے۔

سروے کے نتائج کے مطابق دوسرے صوبوں کے مقابلے میں بلوچستان میں فوج پر نوجوانوں کا اعتماد نسبتاً زیادہ ہے۔ سروے کے مطابق بلوچستان سے تعلق رکھنے والے تقریباً 12 فی صد نوجوانون نے فوج پر مکمل عدم اعتماد کا اظہار کیا ہے۔

مزید پڑھیے

اسلام آباد پولیس نے نادرا کے ڈپٹی اسسٹنٹ ڈائریکٹر نجیب اللہ کی گمشدگی کا مقدمہ درج کرلیا ہے۔

مقدمے کا اندراج وزیرِاعظم سیکریٹریٹ میں تعینات ڈپٹی اسسٹنٹ ڈائریکٹر کے بھائی کی مدعیت میں درج کیا گیا ہے۔ ایف آئی آر کے متن کے مطابق ان کے بھائی نجیب اللہ کل رات گھر سے نکلے لیکن واپس نہ آئے۔

مقدمے کے مطابق انہوں نے جب فون پر اپنے بھائی سے بات کی تو وہ گھبرائے ہوئے تھے اور انہوں نے کال پر بتایا کہ انہیں کسی نے بٹھایا ہوا ہے جس کے بعد فون بند ہوگیا۔ ایف آئی آر میں کہا گیا ہے کہ انہیں شک ہے کہ نجیب اللہ کو اغوا کیا گیا ہے۔

سندھ کے نگراں وزیرِ اطلاعات محمد احمد شاہ نے کہا ہے کہ عام انتخابات سے متعلق تمام ابہام ختم ہو چکے ہیں اور الیکشن کمیشن کی ہدایت کے مطابق جن تیاریوں کی ضرورت ہے اس پر عمل درآمد کیا جا رہا ہے۔

الیکشن اور امن و امان کی صورتِ حال پر جمعے کو پریس کانفرنس کے دوران احمد شاہ نے کہا کہ الیکشن کے روز موبائل فون سروس بند نہیں ہونی چاہیے، اگر کسی علاقے میں صورتِ حال کو دیکھتے ہوئے کوئی ایسا فیصلہ کرنا ہوا تو دیکھیں گے۔

نگراں صوبائی وزیرِ اطلاعات نے بتایا کہ حکومتِ سندھ نے ہر قسم کی ضروریات کے لیے فنڈز جاری کر دیے ہیں۔ صوبے میں انیس ہزار پولنگ اسٹیشنز ہیں جن میں سے چھ ہزار 540 حساس ترین پولنگ اسٹیشنز ہیں۔ چھ ہزار سے زائد کیمرے نصب کیے گیے ہیں جب کہ کمپیوٹر اور وائر لیس سسٹم بھی لگا دیا گیا ہے، اگر کوئی خراب صورت حال ہوتی ہے تو ڈیٹا محفوظ ہو گا۔

انہوں نے کہا کہ پانچ فروری سے دس فروری تک حساس پولنگ اسٹیشنز پر افوج پاکستان تعینات رہے گی، پولنگ اسٹیشنز پر تعینات عملے کی چھٹیاں منسوخ کر دی گئی ہیں۔ جو سرکاری ملازم الیکشن میں نیشنل ڈیوٹی پر نہیں جائیں گے ان کے خلاف کارروائی کی جائے گی۔

پاکستان تحریکِ انصاف نے پانچ فروری کو ہونے والے انٹرا پارٹی انتخابات ملتوی کر دیے ہیں۔

مقامی میڈیا کے مطابق پی ٹی آئی رہنما بیرسٹر گوہر نے تصدیق کی ہے کہ انٹرا پارٹی انتخابات بانی چیئرمین عمران خان کی ہدایت پر ملتوی کیے ہیں۔

بیرسٹر گوہر کے مطابق انٹرا پارٹی الیکشن کی وجہ سے پارٹی کے انتخابی امیداروں اور ووٹروں کی توجہ عام انتخابات سے ہٹ سکتی ہے۔ اس لیے انٹرا پارٹی انتخابات اب الیکشن کے بعد ہوں گے۔

واضح رہے کہ پی ٹی آئی نے گزشتہ روز انٹرا پارٹی الیکشن کے لیے شیڈول جاری کیا تھا جس کے تحت الیکشن پانچ فروری کو ہونا تھے۔