پاکستان میں الیکشن؛ سیاسی جماعتوں کے جلسے، اُمیدواروں کو ہراساں کرنے کے الزامات

لاہور ہائی کورٹ کے جج جسٹس شاہد جمیل خان اپنے عہدے سے مستعفی ہو گئے ہیں۔ا نہوں نے اپنا استعفیٰ صدر مملکت ڈاکٹر عارف علوی کو ارسال کردیا ہے۔

جسٹس شاہد نے جمعے کو اپنے استعفے میں لکھا کہ وہ 10 سال تک عدالت عظمٰی کے جج رہے اور اب ذاتی وجوہات کی بنا پر منصب چھوڑ رہے ہیں۔

نگراں وزیرِ اطلاعات بلوچستان جان اچکزئی نے کہا ہے کہ صوبائی اسمبلی کے حلقہ پی بی 13 اور پی بی 14 نصیر آباد میں عوامی اجتماعات پر پابندی عائد ہے۔ تاہم سیکیورٹی معاملات پر انتخابی امیدواروں کو آن بورڈ لیا جا رہا ہے۔

جان اچکزئی نے ایک بیان میں کہا ہے کہ آٹھ فروری وک انتخابات ضرور ہوں گے اور انتخابی عمل میں کوئی رکاوٹ قبول نہیں کی جائے گی۔

واضح رہے کہ ڈپٹی کمشنر نصیرآباد نے گزشتہ روز ایک اعلامیے میں کہا تھا کہ دہشت گردی کی لہر اور امن و امان کی خراب صورتِ حال کے باعث حلقہ پی بی 13 اور پی بی 14 میں جلسوں، کارنر میٹنگ اور عوامی اجتماعات پر پابندی ہو گی۔ ڈپٹی کمشنر نے تمام امیدواروں کو انتخابی مہم بھی محدود کرنے کی ہدایت کی تھی۔

نگراں وزیرِ اعلاعات جان اچکزئی نے کہا کہ بلوچستان کے 18 پولنگ اسٹیشنز کو حساس قرار دیا ہے جنہیں فل پروف سیکیورٹی دیں گے۔ حکومت عوام سے اپیل کرتی ہے کہ وہ الیکشن کے روز گھروں سے باہر نکلیں اور اپنا حقِ رائے دہی استعمال کریں۔

کراچی سے صوبائی اسمبلی کے حلقہ پی ایس 110 جنوبی کے ریٹرننگ افسر نے الیکشن ڈیوٹی پر حاضر نا ہونے والے محکمۂ ہیلتھ کے 267 ملازمین کے وارنٹ گرفتاری جاری کر دیے ہیں۔

ریٹرننگ افسر محمد حیات نے ایس ایس پی جنوبی کو حکم دیا ہے کہ الیکشن ڈیوٹی پر نہ آنے والے ملازمین کو گرفتار کر کے آج ہی پیش کیا جائے۔

ریٹرننگ افسر کے مطابق سرکاری ملازمین قومی ذمے داری کی ادائیگی سے گریزاں ہیں جن میں خواتین بھی شامل ہیں۔

پاکستان مسلم لیگ (ن) آج فیصل آباد میں انتخابی مہم کے سلسلے میں پاور شو کرے گی۔

مسلم لیگ (ن) کے قائد نواز شریف اور چیف آرگنائزر مریم نواز ان دنوں پنجاب کے مختلف علاقوں میں جلسوں سے خطاب کر رہے ہیں اور آج وہ فیصل آباد میں لیگی کارکنان سے خطاب کریں گے۔