رپورٹر ڈائری؛ جب نواز شریف کو اسلام آباد ایئرپورٹ سے باہر نہیں نکلنے دیا گیا
تین مرتبہ پاکستان کے وزیرِ اعظم رہنے والے نواز شریف ایک بار پھر وطن واپس آرہے ہیں لیکن آج کے حالات اس وقت سے بہت مختلف ہیں جب وہ ستمبر 2007 اسلام آباد پہنچے تھے۔
اس وقت ملک میں جنرل پرویز مشرف صدر اور آرمی چیف تھے جنہوں نے 12 اکتوبر 1999 کو نواز شریف کی حکومت کا تختہ الٹ دیا تھا۔ تقریباً سات سال تک سعودی عرب کے شہر جدہ میں قیام کے بعد نوازشریف کی یہ وطن واپسی کی پہلی کوشش تھی جسےاس وقت کی حکومت نے ناکام بنا دیا اور سابق وزیرِ اعظم کو ایئرپورٹ کی عمارت سے بھی باہر نکلنے نہیں دیا گیا تھا۔
نواز شریف 10 ستمبر 2007 کو لندن سے پاکستان پہنچنے والے تھے لیکن اس سے بہت پہلے ہی حالات خاصے کشیدہ ہوگئے تھے۔ وہ مسلم لیگ(ن) کے لیے مشکل وقت تھا اور اس کے لیے کسی جلسہ جلوس کا تصور بھی محال تھا جس طرح آج تحریکِ انصاف کے لیے ہوچکا ہے۔
میں اس وقت معروف ٹی وی چینل’ جیو نیوز‘ کے لیےرپورٹنگ کرتا تھا جہاں ابصار عالم اسلام آباد میں ہمارے بیورو چیف تھے۔ نواز شریف کی سات سال بعد وطن واپسی کی کوریج ایک بڑا نیوز ایونٹ تھا جس کے لیے کئی دن قبل میٹنگز شروع ہوگئی تھیں۔
میں ہر میٹنگ میں بطور کرائم رپورٹر شریک ہوتا تھا اور اپنے دفتر والوں کو پہلے ہی آگاہ کرچکا تھا کہ راول پنڈی اسلام آباد کے سنگم پر ائیرپورٹ تک جانا ہی بہت مشکل ہوگا کیوں کہ پولیس نے پلان بنایا تھا کہ ایئر پورٹ کی طرف جانے والے تمام راستے بند کردیے جائیں گے۔ میری رائےتھی کہ اس صورتِ حال میں ائیرپورٹ کے باہر سے کوریج کا کوئی فائدہ نہیں تھا کیوں کہ نواز شریف کو واپسی پر گرفتار کرنے کی باتیں ہورہی تھیں۔
انتقام کی تمنا نہیں، ریاست کے ستونوں کو مل کر کام کرنا ہوگا: نواز شریف
سابق وزیرِ اعظم نواز شریف نے کہا ہے کہ ان کے دل میں انتقام کی بالکل بھی تمنا نہیں۔ آج فیصلہ کرنا ہو گا کہ ہمیں کس طرح اپنے پاؤں پر کھڑا ہونا ہے۔
ہفتے کو مینارِ پاکستان پر جلسے سے خطاب کرتے ہوئے نواز شریف نے کہا کہ گزشتہ 23 برس میں سے پندرہ برس وہ یا تو ملک سے باہر رہے، جیل میں رہے یا مقدمات بھگتتے رہے۔ ان کے بقول اگر یہ 23 سال پاکستان کو دیے ہوتے تو پاکستان اس وقت جنت بن چکا ہوتا۔
انہوں نے کہا کہ آج ملک کو ایک نئے سفر کا آغاز کرنا ہے جس کے لیے اس بنیادی مرض کو دور کرنا پڑے گا جس کی وجہ سے ملک بار بار حادثے کا شکار ہو جاتا ہے۔
سابق وزیرِ اعظم نے کہا کہ ہمسائیوں کے ساتھ لڑائی کر کے ترقی نہیں کر سکتے۔ آئین پر عمل کے لیے سب کو اکٹھا ہونا ہوگا، اپنی قومی غیرت اور وقار کو بلند کرنا ہوگا، غربت کا خاتمہ کرنا ہوگا، خودمختار خارجہ پالیسی بنانا ہوگی اور دنیا کے ساتھ تعلقات کو استوار کرنا ہوگا۔
پاکستان کو واپس ترقی کی جانب لائیں گے: نواز شریف
سابق وزیرِ اعظم نواز شریف نے کہا ہے کہ ملک آج بربادیوں کی حدوں کو چھو رہا ہے جسے واپس ترقی کی جانب لے کر آئیں گے۔
مینارِ پاکستان پر جلسے سے خطاب کرتے ہوئے ان کا کہنا تھا کہ 1990 میں پہلی بار وزیرِ اعظم بننے کے بعد جو کام شروع کیے تھے اگر ان کا سلسلہ جاری رہتا تو پاکستان میں آج کوئی بے روزگار نہ ہوتا اور ملک میں غربت نام کی کوئی چیز نہ ہوتی۔
انہوں نے کہا آج حالات اتنے خراب ہیں کہ سوچنا پڑتا ہے کہ بجلی کا بل دیا جائے یا بچوں کا پیٹ بھرا جائے۔
نواز شریف نے اپنے گزشتہ ادوارِ حکومت میں ہونے والے ترقیاتی منصوبوں اور کاموں کی تفصیلات دہراتے ہوئے کہا کہ ہمارے دور میں دھرنے ہو رہے تھے لیکن ہم اپنے کام کر رہے تھے۔
انہوں نے جلسے کے شرکا کو مخاطب کرتے ہوئِے کہا کہ آپ کو پتا ہے ناں کہ دھرنے کون کرا رہا تھا۔ان کا کہنا تھا کہ ان کے دل میں کسی سے بدلہ لینے کی کوئی تمنا نہیں ہے بلکہ وہ صرف قوم کی خدمت کرنا چاہتے ہیں۔
'کون ہے جو ہر چند سال بعد نواز شریف کو قوم سے جدا کر دیتا ہے؟'
سابق وزیرِ اعظم نواز شریف نے کہا ہے کہ آج عوام سے ملنے کے بعد اپنے سارے دکھ درد بھول گیا لیکن کچھ درد ایسے ہوتے ہیں جنہیں انسان بھلا نہیں سکتا لیکن انہیں ایک طرف رکھ سکتا ہے۔
چار سال کی خود ساختہ جلا وطنی سے واپسی کے بعد مینارِ پاکستان پر مسلم لیگ (ن) کے جلسے سے خطاب کرتے ہوئے نواز شریف نے کہا کہ وہ اپنے والد اور والدہ کو قبر میں اتار نہ سکے اور انہیں اہلیہ کی وفات کی خبر جیل میں ملی۔ ان کے بقول یہ وہ زخم ہیں جو کبھی بھریں گے نہیں۔
سابق وزیرِ اعظم نے کہا کہ انہیں جیلوں میں ڈالا گیا، ملک بدر کیا، جعلی کیسز بنائے گئے لیکن مسلم لیگ (ن) کا جھنڈا کسی نے اپنے ہاتھ سے نہیں چھوڑا۔
نواز شریف نے سوال کیا کہ کون ہے جو ہر چند سالوں بعد نواز شریف کو اپنی قوم سے جدا کر دیتا ہے۔ ہم تو پاکستان کی تعمیر کرنے والوں میں ہیں۔ ہم نے ملک کو ایٹمی طاقت بنایا اور ہم نے لوڈشیڈنگ ختم کی۔
نواز شریف نے جب قوم کی تقدیر بدلی توانہیں اقتدار سے ہٹا دیا گیا: شہباز شریف
مسلم لیگ (ن) کے صدر میاں شہباز شریف نے کہا ہے کہ نواز شریف نے جب بھی پاکستانی قوم کی تقدیر بدلی تو انہیں اقتدار سے ہٹا دیا گیا۔
مینارِ پاکستان پر مسلم لیگ (ن) کے جلسے سے خطاب کرتے ہوئے شہباز شریف نے دعویٰ کیا کہ نواز شریف کے پاکستان آنے کے بعد ملک سے غربت اور بے روزگاری کا خاتمہ ہو گا۔