امریکہ کی یمن میں حوثی باغیوں کے گولہ بارود کے ذخیرے پر بمباری
امریکہ کے وزیرِ دفاع لائیڈ آسٹن نے کہا ہے کہ امریکی فوج نے یمن میں حوثی باغیوں کے گولہ بارود کے ذخیرے پر بمباری کی ہے۔
بدھ کو کی جانے والی بمباری میں امریکہ کی فورسز نے بی ٹو بمبار طیاروں کا استعمال کیا ہے۔
لائیڈ آسٹن کا کہنا تھا کہ یہ امریکہ کا ان املاک کو نشانہ بنانے کا انوکھا مظاہرہ ہے جنہیں مخالفین امریکہ سے مخفی رکھنے کی کوشش کر رہے تھے۔ ان کے بقول اس سے کوئی فرق نہیں پڑتا کہ زیرِ زمین گولہ بارود کے ذخائر کس قدر گہرائی میں سختی یا مضبوطی کے ساتھ چھپائے گئے ہوں۔
غزہ جنگ کے آغاز کے بعد سے حوثی فلسطینیوں کی حمایت کرتے ہوئے خلیج عدن اور بحیرۂ احمر میں ان بحری جہازوں کو نشانہ بنانے کا دعویٰ کر رہے ہیں جن کا کسی بھی طرح اسرائیل سے تعلق ہو۔
حوثی باغی، جن کو ایران کی پشت پناہی حاصل ہے، گزشتہ برس غزہ میں اسرائیل کی حماس کے خلاف جنگ شروع ہونے کے بعد اپنی مہم کے دوران کشتیوں، راکٹوں اور ڈرون سے بحری جہازوں کو نشانہ بنا رہے ہیں۔
امریکہ اور برطانیہ نے متعدد بار حوثیوں پر حملے کیے ہیں تاکہ بین الاقوامی جہاز رانی کی روانی برقرار رہے۔ کیوں کہ بحیرۂ احمر کے مقابلے میں بحری جہازوں کے لیے دوسرے سمندری راستے طویل ہیں۔
غزہ میں اسرائیل کی فاقہ کشی کی پالیسی ناقابلِ قبول ہوگی؛ سلامتی کونسل میں امریکی سفیر کا بیان
امریکہ اسرائیل کی جانب سے یہ یقین دہانی حاصل کرنے کی کوشش کررہا ہے کہ اس کی زمینی کارروائیوں سے یہ ظاہر ہو کہ وہ شمالی غزہ میں" فاقہ کشی کی پالیسی"پر عمل نہیں کر رہا۔ یہ بات اقوام متحدہ میں امریکی سفیر نے بدھ کو سلامتی کونسل کو بتائی۔
لنڈا تھامس گرین فیلڈ نے 15 رکنی کونسل کو بتایا کہ ایسی پالیسی "خوفناک اور ناقابل قبول ہوگی اور اس کے بین الاقوامی قانون اور امریکی قانون کے تحت مضمرات ہوں گے۔"
تھامس گرین فیلڈ نے امریکہ کے دیرینہ اتحادی کی جانب امریکی موقف میں شدت پر زور دیتے ہوئے کہا ،"اسرائیل کی حکومت نے کہا ہے کہ یہ ان کی پالیسی نہیں ہے، خوراک اور دیگر دوسری ضروری رسد کو منقطع نہیں کیا جائے گا ، اور ہم اس بات پر نظر رکھے ہوئے ہیں کہ اسرائیل کے زمینی اقدامات اس بیان سے ہم آہنگ ہوں ۔"
’ایران کی ایٹمی تنصیبات پر اسرائیل کے حملے کے امکانات بہت کم ہیں‘
یہ دعوی کرتے ہوئے کہ ایران کی ایٹمی تنصیبات پر اسرائیلی حملہ کامیاب نہیں ہوگا یا اس سے کوئی خاص نقصان ہوگا ایران کی ایٹمی ایجنسی نے پیش گوئی کی ہے ملک پر اسرائیل کی جانب سے ایسے حملے کے امکانات بہت کم ہیں۔
ایرانی ایٹمی ایجنسی کے ترجمان کی جانب سے یہ بیان ایسے وقت میں دیا گیا ہے جب ایران کے اسرائیل پر تقریباً دوسو میزائل حملوں کے جواب میں خطہ میں توقع کی جاری ہے کہ اسرائیل اس پر ردعمل کا اظہارکرے گا۔
واضح رہے کہ یکم اکتوبر کو اسرائیل پر کیا جانے والا ایرانی میزائل حملہ اس سال ہونے والی ایسی دوسری کارروائی تھی جو تہران نے حزب اللہ کے رہنما حسن نصراللہ اور پاسداران انقلاب کے جنرل عباس نیلفور شان کی ستمبر کی 27 ہلاکت کے بعد کیا۔
اس سے قبل فلسطینی عسکریت پسند تنظیم حماس کے سیاسی رہنما اسماعیل ہنیہ کی 31 جولائی کو تہران میں ہلاکت کا الزام بھی اسرائیل پر لگایا گیا تھا۔
یورپی یونین اور خلیج تعاون کونسل کا سربراہی اجلاس؛ غزہ اور لبنان میں جنگ بندی کا مطالبہ
مشرق وسطیٰ میں پھیلی افرا تفری کے درمیان یورپی یونین اور چھ خلیجی ممالک کے رہنماؤں نے بدھ کے روز ایک سربراہی اجلاس کے لیے ملاقات کی جس میں یوکرین کی جنگ اور روس کے ساتھ تعلقات پر متفقہ مؤقف تلاش کرنے کی کوشش کی گئی۔
روس کا تذکرہ صرف اقوامِ متحدہ کی ایک قرارداد کے حوالے سے کیا گیا جس میں روسی جارحیت پر تنقید کی گئی اور یہ مطالبہ کیا گیا تھا کہ وہ یوکرین سے اپنی فوجیں نکا لے۔
ناقدین کا کہنا ہے کہ یوکرین کے تنازع میں بین الاقوامی قوانین کی خلاف ورزیوں پر یورپی یونین کے ممالک بار بار روس کا نام لیتے ہیں، لیکن غزہ میں اسرائیل کی جنگ میں انہی معیارات کو لاگو کرنے میں ناکام رہتے ہیں۔
قطر کے امیر شیخ تمیم بن حماد الثانی نے کہا کہ قریبی تعلقات کا مطلب بین الاقوامی انصاف سے زیادہ سے زیادہ وابستگی اور دوہرے معیار کی پالیسیوں سے دوری ہونا چاہیے۔