اسرائیل کی لبنان پر بمباری میں 27 افراد ہلاک
اسرائیل کے لبنان کے مختلف علاقوں پر فضائی حملے جاری ہیں۔ گزشتہ 24 گھنٹوں میں کیے گئے حملوں کے دوران 27 افراد ہلاک ہو چکے ہیں۔
لبنانی حکام کا کہنا ہے کہ اسرائیل کے حملوں میں زیادہ تر جنوبی علاقوں کو نشانہ بنایا گیا ہے جہاں گزشتہ روز سے اب تک ایک درجن سے زائد افراد مارے گئے ہیں۔ ان میں ایک شہر کی بلدیہ کا میئر بھی شامل ہے۔
لبنان کے وزیرِ اعظم نجیب میقاتی نے اسرائیل پر الزام لگایا ہے کہ اس نے بدھ کو قصداََ النبطیہ کی بلدیہ کی عمارت کو نشانہ بنایا ہے جہاں میئر کی صدارت میں امدادی امور سے متعلق اجلاس جاری تھی۔
بلدیہ کی اس عمارت پر حملے میں چھ افراد ہلاک ہوئے تھے۔
دوسری جانب اسرائیل کی جانب سے مسلسل دعویٰ کیا جا رہا ہے کہ وہ حزب اللہ کے جنگجوؤں کو نشانہ بنا رہا ہے۔
غزہ میں آپریشن کے دوران حماس لیڈر یحییٰ سنوار کی ہلاکت کا امکان دیکھ رہے ہیں: اسرائیلی فوج
اسرائیل کی فوج نے کہا ہے کہ وہ حماس کے لیڈر یحییٰ سنوار کی ہلاکت کے امکانات کو دیکھ رہے ہیں۔
خبر رساں ادارے 'رائٹرز' کے مطابق جمعرات کو اسرائیلی فوج نے ایک بیان میں کہا ہے کہ غزہ کی پٹی میں ایک آپریشن کے دوران تین عسکریت پسندوں کو نشانہ بنایا گیا جس میں یحییٰ سنوار کی ہلاکت کے امکانات کو بھی دیکھ رہے ہیں۔
اپنے بیان میں فوج نے کہا کہ "اس موقع پر دہشت گردوں کی شناخت کی تصدیق نہیں کرسکتے۔"
فوج کے بقول جس عمارت میں تین عسکریت پسندوں کو ہلاک کیا گیا اس عمارت میں یرغمالوں کی موجودگی کے کوئی اشارے نہیں ملے۔
اسرائیلی فوج کی جانب سے اس آپریشن کی جگہ اور مزید تفصیلات فراہم نہیں کی گئیں۔
حماس نے اسرائیلی فوج کے اس بیان پر فوری طور پر کوئی تبصرہ نہیں کیا ہے۔
یحییٰ سنوار کو سات اکتوبر 2023 کے حماس کے اسرائیل پر حملے کا ماسٹر مائنڈ سمجھا جاتا ہے۔ انہیں حماس کے سابق سربراہ اسماعیل ہنیہ کے ایران میں قتل کے بعد فلسطینی عسکریت تنظیم حماس کا سربراہ بنایا گیا تھا۔
اسرائیل اور حماس کے تنازع کا آغاز حماس کے سات اکتوبر 2023 کو جنوبی اسرائیل پر دہشت گرد حملے کے بعد ہوا تھا۔ اسرائیلی حکام کے مطابق حملے میں 1200 افراد ہلاک ہوئے تھے جب کہ حماس کے زیرِ انتظام غزہ کے محکمۂ صحت کے مطابق جنگ میں تقریباً 42 ہزار فلسطینی ہلاک ہو چکے ہیں۔
اسرائیل کا حزب اللہ کے ایک اور کمانڈر کو ہلاک کرنے کا دعویٰ
اسرائیل کی فوج نے جمعرات کو جنوبی لبنان میں حزب اللہ کے ایک کمانڈر کو ہلاک کرنے دعویٰ کیا ہے۔
اسرائیل ڈیفنس فورسز (آئی ڈی ایف) کے مطابق ہلاک ہونے والے کمانڈر کی شناخت حسین عواضہ کے نام سے ہوئی ہے جو سرحد پار سے اسرائیل پر راکٹ داغنے کا ذمہ دار تھا۔
دوسری جانب اسرائیل نے لبنان کے مختلف حصوں سے لوگوں کو انخلا کے مزید احکامات جاری کیے ہیں۔
ادھر لبنان کی وزارتِ صحت کا کہنا ہے کہ بدھ کو ہونے والے اسرائیلی فضائی حملوں میں نباتیہ کے علاقے میں 16 افراد ہلاک اور 50 سے زیادہ زخمی ہوئے تھے۔
غزہ پر اسرائیلی بمباری میں 17 افراد ہلاک
غزہ میں طبی حکام نے جمعرات کو کہا ہے کہ اسرائیل کے غزہ پر بمباری میں مزید 11 فلسطینیوں کی موت ہوئی ہے۔
اسرائیل نے اپنی فوج کو ٹینک شمالی غزہ میں جبالیہ بھیج دیے ہیں۔ اس علاقے میں مقامی افراد کے ساتھ ساتھ اقوامِ متحدہ کی جانب خوراک کی کمی کے حوالے سے انتباہ جاری کیا جا چکا ہے۔
فلسطینیوں کا کہنا ہے کہ جبالیہ میں اسرائیل کے ٹینکوں نے گولہ باری سے کئی عمارتوں کو تباہ کر دیا ہے جب کہ متعدد عمارتوں میں بارودی مواد نصب کرکے ان میں دھماکے کیے گئے ہیں۔
امدادی رضا کاروں کا کہنا ہے کہ انہوں نے کئی زخمیوں کو جبالیہ میں ان اسکولوں سے منتقل کیا ہے جہاں بے گھر افراد کی پناہ گاہیں قائم تھیں۔ اسرائیلی ٹینکوں کی گولہ باری سے ان پناہ گاہوں میں آگ لگ گئی تھی۔
فلسطینیوں کا کہنا ہے کہ اسرائیل کی فوج نے بیت الحنون، جبالیہ اور بیت الہیہ کا رابطہ دیگر علاقوں سے مؤثر انداز سے منقطع کر دیا ہے۔ ان علاقوں میں کسی قسم کے سفر کی اجازت نہیں ہے۔ صرف ان خاندانوں کو یہ علاقے چھوڑنے کی اجازت دی جا رہی ہے جن کے پاس نقل مکانی کے اجازت نامے موجود ہیں۔
حزب اللہ کا اسرائیلی ٹینک تباہ کرنے کا دعویٰ
لبنان کی طاقت ور عسکری تنظیم حزب اللہ نے دعویٰ کیا ہے کہ اس نے لبنانی سرحد کے قریب اسرائیل کا ایک ٹینک تباہ کر دیا ہے۔
حزب اللہ کا کہنا ہے کہ اس نے اسرائیلی ٹینک کو گائیڈڈ میزائل سے نشانہ بنایا ہے۔
ایک روز قبل بھی حزب اللہ نے سرحدی علاقے میں اسرائیلی ٹینک تباہ کرنے کا دعویٰ کیا تھا۔
عسکری تنظیم کے ان دعوؤں پر اسرائیل کی فوج کی جانب سے کوئی بھی تبصرہ نہیں کیا گیا۔