امریکی فضائی کمپنی ’ڈیلٹا‘ کی کئی ماہ کے لیے اسرائیل کی پروازیں منسوخ
امریکہ کی ڈیلٹا ایئرلائن نے پانچ ماہ کے لیے اسرائیل کے لیے پروازیں منسوخ کر دی ہیں۔
اسرائیلی میڈیا کے مطابق امریکہ کی ڈیلٹا ایئر لائن نے نیو یارک کے جے ایف کے ایئر پورٹ سے تل ابیب کے لیے پروازیں منسوخ کی ہیں۔
ڈیلٹا ایئرلائن کے مطابق 15 اکتوبر 2024 سے 31 مارچ 2024 تک اس کی تل ابیب کے بن گورین ایئرپورٹ کے لیے پروازیں منسوخ کی جا رہی ہیں۔
ڈیلٹا ایئر لائن کا کہنا ہے کہ اس نے خطے میں جاری تنازعے پر سیکیورٹی اور انٹیلی جینس رپورٹ کو دیکھتے ہوئے یہ فیصلہ کیا ہے۔
عالمی ادارۂ صحت کی غزہ میں انسدادِ پولیو مہم جاری
عالمی ادارۂ صحت (ڈبلیو ایچ او) نے کہا ہے کہ اس نے وسطی غزہ میں انسدادِ پولیو مہم کا آغاز کر دیا ہے۔ بیان میں مزید کہا گیا کہ اسرائیل کی بمباری کے باوجود محفوظ قرار دیے گئے علاقے میں ہزاروں بچوں کو انسدادِ پولیو کے قطرے پلائے گئے۔
اقوامِ متحدہ کی ایجنسیوں کا کہنا ہے کہ غزہ میں انسدادِ پولیو مہم کے لیے مقرر کی گئی پناہ گاہوں کو بھی نشانہ بنایا جا رہا ہے۔
حزب اللہ کا اسرائیلی ڈرون تباہ کرنے کا دعویٰ
لبنان کی عسکری تنظیم حزب اللہ نے دعویٰ کیا ہے کہ اس نے اسرائیل کا ایک اور ڈرون مار گرایا ہے۔
منگل کو کی گئی کارروائی سے متعلق بیان میں عسکری تنظیم کا کہنا تھا کہ فضا میں تباہ کیے گئے ڈرون میں لگی آگ زمین سے نظر آ رہی تھی جس وقت اس ڈرون کو نشانہ بنایا گیا وہ اسرائیلی حدود میں ہی تھا۔
حزب اللہ کے مطابق تباہ ہونے والا اسرائیلی ڈرون ’ہرمز 450‘ تھا۔
عسکری تنظیم کا کہنا ہے کہ ڈرون کی تباہی فلسطینی علاقوں سے بھی دیکھی گئی ہے۔
حزب اللہ کے دعوے پر اسرائیل کی فوج نے کوئی تبصرہ نہیں کیا۔
اسرائیلی طیاروں کی جنوبی لبنان پر بمباری
اسرائیل کی فوج نے جنگی جہازوں کے ذریعے لبنان کے جنوبی علاقوں پر بمباری کی ہے۔ لبنانی میڈیا کے مطابق گزشتہ چھ دن میں پہلی بار ان علاقوں کو نشانہ بنایا گیا ہے۔
ابتدائی اطلاعات میں ان فضائی حملوں میں اموات یا زخمیوں کی تعداد سامنے نہیں آ سکی ہے۔ اسرائیل مسلسل یہ دعویٰ کر رہا ہے کہ وہ ان علاقوں میں عسکری تنظیم حزب اللہ کے ٹھکانوں کو نشانہ بنا رہا ہے۔
رپورٹس کے مطابق اسرائیلی فوج نے جنوبی لبنان کے ان علاقوں کو نشانہ بنایا ہے جو گنجان آباد ہیں۔ البتہ ان علاقوں پر لبنان کی طاقت ور عسکری تنظیم حزب اللہ کا کنٹرول ہے۔