اسرائیل نے کتنے یرغمالی رہا کرا لیے، کتنے اب بھی قید؟
حماس نے ایک برس قبل جب اسرائیل پر حملہ کیا تو اس کے جنگجو 251 افراد کو یرغمال بنا کر اپنے ساتھ غزہ لے گئے تھے۔ اس جنگ کو ایک سال گزرنے کے بعد اب بھی 63 افراد حماس کی قید میں ہیں۔
یرغمال بنائے گئے 251 میں سے 117 افراد رہا ہو چکے ہیں جن میں زیادہ تر خواتین، بچے اور غیر ملکی شامل ہیں۔
اسرائیل سمجھتا ہے کہ 63 یرغمالی اب بھی زندہ ہیں اور غزہ میں حماس کی قید میں ہیں۔ ان 63 میں سے 56 اسرائیلی شہری ہیں لیکن ان میں سے کچھ دوہری شہریت بھی رکھتے ہیں۔ اس کے علاوہ چھ تھائی اور ایک نیپالی شہری بھی یرغمالوں میں شامل ہیں۔
ان 63 یرغمالوں میں 51 مرد، 10 خواتین اور دو بچے ہیں۔ ان افراد میں 11 فوجی بھی ہیں۔
اسرائیلی فوج اور یرغمالوں کے اہلِ خانہ کی تنظیم 71 افراد کی ہلاکت کی تصدیق کر چکے ہیں جن میں سے 34 کی لاشیں غزہ میں ہی موجود ہیں۔
امریکہ کے محکمۂ خزانہ کی حماس پر مزید پابندیاں
امریکہ نے سات اکتوبر کے حملوں کو ایک سال مکمل ہونے پر فلسطینی عسکریت پسند تنظیم حماس پر مزید پابندیاں عائد کردی ہیں۔
امریکی محکمۂ خارجہ کے جاری کردہ بیان کے مطابق یہ پابندیاں حماس کے لیے رقوم جمع کرنے والے ایک نیٹ ورک کے خلاف عائد کی گئی ہیں۔
بیان میں کہا گیا ہے کہ یہ ’نام نہاد عطیات‘ کا نیٹ ورک حماس کے بڑے بین الاقوامی مددگاروں میں شامل ہیں۔ غزہ میں قائم اس گروپ کے ’انتاج بینک‘ پر بھی پابندی عائد کی گئی ہے۔
محکمۂ خزانہ نے حماس کو مدد فراہم کرنے والے ترکیہ میں مقیم ایک یمنی بزنس مین اور ان کے نو کاروباری اداروں پر بھی پابندی عائد کی ہے۔
صدر پوٹن آئندہ جمعے اپنے ایرانی ہم منصب سے ملاقات کریں گے
روس کے صدر پوٹن آئندہ جمعے اپنے ایرانی ہم منصب مسعود پزشکیان سے ملاقات کریں گے۔
پوٹن کے مشیر برائے خارجہ امور نے صحافیوں کو بتایا ہے کہ یہ ملاقات ترکمانستان میں ہوگی جہاں دونوں رہنما اشک آباد میں ایک تقریب میں شریک ہو رہے ہیں۔
روسی عہدے دار نے کہا ہے کہ یہ ملاقات انتہائی اہمیت کی حامل ہے جس میں دو طرفہ تعلقات اور مشرقِ وسطیٰ میں جاری کشیدہ صورتِ حال پر بات چیت ہوگی۔
یمن سے اسرائیل پر میزائل حملہ
وسطی اسرائیل پریمن سے ایک میزائل فائر کیا گیا ہے۔
اسرائیلی فوج کے بیان کے مطابق یمن سے فائر کیا گیا میزائل زمین سے زمین پر مار کرنے کی صلاحیت رکھتا تھا۔
میزائل کے اسرائیلی حدود میں داخل ہوتے ہی فضائی حملے کے سائرن بجنا شروع ہوگئے جس کے بعد مقامی آبادی شیلٹرز میں منتقل ہوگئی۔
حزب اللہ نے لبنان سے 135 راکٹ فائر کیے: اسرائیلی فوج
اسرائیل کی فوج نے کہا ہے کہ لبنانی عسکری تنظیم حزب اللہ نے پیر کو اسرائیل پر 135 راکٹ فائر کیے ہیں۔
بیان میں کہا گیا ہے کہ حزب اللہ نے لبنان سے مقامی وقت کے مطابق پانچ بجے 135 راکٹس کیے جو اسرائیلی حدود میں داخل ہوئے۔
یہ حملے شمالی اسرائیل میں کیے گئے جس کے باعث مسلسل سائرن بجتے رہے۔
حزب اللہ کا راکٹ حملہ سات اکتوبر کو حماس کے اسرائیل پر کیے گئے حملے کو ایک سال مکمل ہونے پر کیے گئے ہیں۔