جرمنی کا غزہ میں جنگ بندی کا مطالبہ
جرمنی کے چانسلر اولاف شولز نے غزہ جنگ کو ایک سال مکمل ہونے پر جنگ بندی کا مطالبہ کیا ہے۔
انہوں نے اپنے بیان میں دنیا میں بڑھتی ہوئی یہود مخالفت پر بھی تشویش کا اظہار کیا۔
ان کا کہنا تھا کہ بدقسمتی سے حماس کے اسرائیل پر دہشت گرد حملے سے مشرقِ وسطیٰ میں مفاہمت کے امکانات انتہائی کم ہوگئے ہیں۔
جرمن چانسلر نے کہا کہ غزہ کی پٹی میں شہری آبادی کے تحفظ اور اسرائیل یرغمالوں کی واپسی کے لیے جنگ بندی بہت ضروری ہے۔
اسرائیل کا جنوبی لبنان کے مزید علاقے خالی کرنے کا انتباہ
اسرائیلی فوج نے جنوبی لبنان میں مزید علاقے خالی کرنے کی نئی وارننگ جاری کر دی ہے۔
فوج کے ترجمان کے تازہ بیان میں جنوبی لبنان کے 25 علاقوں کے رہائشیوں کا خبردار کیا گیا ہے کہ وہ فوری طور پر شمال کی جانب منتقل ہوجائیں۔
اسرائیل کی شمالی غزہ میں کارروائیاں تیز، 26 ہلاکتیں
اسرائیل کے شمالی غزہ میں حملوں میں تیزی آگئی ہے جس کے باعث مزید ہلاکتیں ہوئی ہیں۔
حماس کے زیر انتظام غزہ کی وزارتِ صحت کا کہنا ہے کہ غزہ میں مسجد اور پناہ گزینوں کے لیے اسکول میں بنائے گئے شیلٹر پر حملے کیے گئے ہیں۔ ان حملوں میں 26 افراد ہلاک ہوچکے ہیں۔
وسطی غزہ میں الاقصیٰ شہدا اسپتال کے قریب واقع مسجد میں بھی پناہ گزینوں نے پناہ لے رکھی تھی۔
اسپتال کے ریکارڈ کے مطابق ہلاک ہونے والے تمام مرد تھے جب کہ کئی دیگر زخمی بھی ہوئے ہیں۔
اسرائیل نے تاحال اس کارروائی پر کوئی موقف جاری نہیں کیا ۔
القسام بریگیڈ اسرائیلی فورسز سے لڑ رہی ہے؛ حماس کا دعویٰ
عسکری تنظیم حماس نے دعویٰ کیا ہے کہ اس کے عسکری ونگ القسام بریگیڈ کے جنگجوؤں اور اسرائیلی فورسز کے درمیان شمالی غزہ میں جھڑپیں جاری ہیں۔
خلیجی نشریاتی ادارے ’الجزیرہ‘ کے مطابق حماس نے میسجنگ ایپ ٹیلی گرام پر اپنے چینل پر دعویٰ کیا ہے کہ اس کے جنگجو شمالی غزہ میں لڑ رہے ہیں۔
غزہ کے صحت کے حکام کے مطابق ہفتے کی شب سے شمالی غزہ میں ہونے والے حملوں میں 20 افراد ہلاک ہوچکے ہیں۔