کوئٹہ ریلوے اسٹیشن پر سیکیورٹی اہلکاروں کی بڑی تعداد موجود
جعفر ایکسپریس پر حملے کے بعد کوئٹہ ریلوے اسٹیشن پر سیکیورٹی اہلکاروں کی بڑی تعداد پہنچ گئی ہے۔
سیکیورٹی فورسز کی جانب سے ٹرین کے یرغمال بنائے گئے مسافروں کی بازیابی کے لیے آپریشن جاری ہے۔
دوسری جانب کوئٹہ ریلوے اسٹیشن پر سیکیورٹی فورسز کی بڑی تعداد اور ہیلی کاپٹر پرواز کرنے کے مناظر دیکھے گئے ہیں۔
'اگر جعفر ایکسپریس پر حملے کا خطرہ تھا تو اسے چلایا کیوں؟'
اب تک 190 مسافروں کو بازیاب، 30 دہشت گردوں کو ہلاک کیا جا چکا ہے: سیکیورٹی ذرائع
سیکیورٹی ذرائع کا کہنا ہے کہ اب تک جعفر ایکسپریس کے 190 مسافروں کو بازیاب کرا لیا گیا ہے جب کہ 30 دہشت گردوں کو ہلاک کیا گیا ہے۔
سیکیورٹی ذرائع کے مطابق عورتوں اور بچوں کی خود کش بمباروں کے ساتھ موجودگی کی وجہ سے آپریشن میں احتیاط برتی جا رہی ہے۔
ذرائع کے مطابق باقی شدت پسندوں کے خاتمے کے لیے سیکیورٹی فورسز کا آپریشن جاری ہے۔
دہشت گردی کے مقابلے کے لیے پاکستان کی معاونت جاری رکھیں گے: چین
چین نے پاکستان میں بلوچ عسکریت پسندوں کی جانب سے ٹرین ہائی جیکنگ کی مذمت کی ہے۔
بدھ کو وزارتِ خارجہ کی ترجمان ماؤ ننگ نے کہا کہ چین دہشت گردی کی ہر قسم کا مخالف ہے۔
انہوں نے کہا چین دہشت گردی کے مقابلے، اتحاد و استحکام، علاقائی امن اور عوام کی حفاظت کے لیے پاکستان کی کوششں میں اس کی معاونت جاری رکھے گا۔