جعفر ایکسپریس حملہ: سیکیورٹی فورسز کا آپریشن مکمل کرنے اور یرغمالوں کی رہائی کا دعویٰ

امریکہ نے بلوچستان میں جعفر ایکسپریس پر حملے اور مسافروں کو یرغمال بنانے کی مذمت کی ہے۔

بدھ کو اسلام آباد میں امریکی سفارت خانے کی جانب سے جاری کیے گئے بیان میں کہا گیا ہے کہ اس حملے کی ذمہ داری بلوچ لبریشن آرمی (بی ایل اے) نے قبول کی ہے، جسے امریکہ نے ایک عالمی دہشت گرد گروپ قرار دیا ہے۔

بیان میں کہا گیا ہے کہ پاکستانی عوام کو تشدد اور خوف سے آزاد زندگی گزارنے کا حق حاصل ہے۔ امریکہ پاکستان کا مضبوط شراکت دار رہے گا تاکہ وہ اپنے تمام شہریوں کی حفاظت اور سلامتی کو یقینی بنا سکے۔ ہم اس مشکل وقت میں پاکستان کے ساتھ کھڑے ہیں۔

جعفر ایکسپریس پر حملے میں یرغمال بنائے گئے مسافروں میں شامل 11 افراد فرار ہو کر کوئٹہ پہنچنے میں کامیاب ہو گئے ہیں۔

یہ 11 افراد کوئٹہ میں ڈپٹی کمشنر آفس پہنچ چکے ہیں۔

حکام کا نام ظاہر نہ کرنے کی شرط پر کہنا تھا کہ عسکریت پسندوں کے چنگل سے 13 افراد فرار ہوئے تھے تاہم حملہ آوروں کی فائرنگ سے ان میں سے دو افراد زخمی ہوگئے۔

یہ دونوں زخمی افراد بھی کوئٹہ پہنچنے میں کامیاب ہو گئے ہیں جنہیں فوج کے زیرِ انتظام اسپتال سی ایم ایچ منتقل کر دیا گیا ہے۔

بلوچ لبریشن آرمی کے ترجمان جیئند بلوچ نے میڈیا کو جاری بیان میں کہا ہے کہ سرمچاروں نے گزشتہ 24 گھنٹوں سے جعفر ایکسپریس اور اس میں موجود یرغمالوں پر مکمل کنٹرول برقرار رکھا ہے۔

بیان میں دعویٰ کیا گیا ہے کہ "دشمن کے 200 سے زائد حاضر سروس فوجی، انٹیلی جینس ایجنٹس، پولیس اور نیم فوجی اہلکار بی ایل اے کی تحویل میں ہیں۔"

ترجمان نے کہا کہ بی ایل اے نے بین الاقوامی جنگی قوانین اور انسانی حقوق کو مدِنظر رکھتے ہوئے پاکستانی ریاست کو قیدیوں کے تبادلے کے لیے 48 گھنٹوں کی مہلت دی تھی۔ تاہم 'قابض' ریاست کی ہٹ دھرمی، بے حسی اور مسلسل تاخیری حربے یہ ثابت کر رہے ہیں کہ پاکستان اپنے ہی فوجی اہلکاروں کی زندگیاں بچانے میں سنجیدہ نہیں ہے۔

ترجمان نے کہا کہ اگر یہی رویہ برقرار رہا تو مہلت ختم ہونے کے بعد ہر گزرتے گھنٹے کے ساتھ پانچ یرغمالوں کو بلوچ قومی عدالت کے فیصلے کے مطابق سزا دی جائے گی۔

بلوچستان میں جعفر ایکسپریس پر حملے کی ذمہ داری قبول کرنے والی علیحدگی پسند تنظیم بلوچ لبریشن آرمی (بی ایل اے) نے حملے کی ایک مبینہ ویڈیو جاری کی ہے۔

بی ایل اے کی جاری کردہ ویڈیو میں دیکھا جا سکتا ہے کہ پہاڑوں کے درمیان سے گزرنے والی ٹرین کے ٹریک پر دھماکہ ہوتا ہے جس کے بعد ٹرین رک جاتی ہے۔

حملے کی مبینہ ویڈیو میں بی ایل اے کے عسکریت پسند کو پہاڑ پر پوزیشن لیے ہوئے بھی دکھایا گیا ہے۔

بی ایل اے کی جاری کردہ ویڈیو میں ٹرین کے رک جانے کے بعد باہر متعدد افراد کو زمین پر بیٹھے اور مسلح افراد کو گشت کرتے دکھایا گیا ہے۔