بشارالاسد کی حکومت کا خاتمہ، دہائیوں کے جبرکے بعد انصاف کا بنیادی عمل ہے، صدر بائیڈن

امریکہ کے صدر جو بائیڈن مقامی وقت کے مطابق اتوار کی صبح اپنی سیکیورٹی ٹیم سے ملاقات کریں گے۔

وائٹ ہاؤس کے مطابق اس ملاقات میں صدر کو شام کی تازہ ترین صورتِ حال سے آگاہ کیا جائے گا۔

اتوار کو شام میں باغیوں کی جانب سے بشار الاسد حکومت کے خاتمے کا اعلان ہونے کے بعد یہ بائیڈن کی اپنی سیکیورٹی ٹیم کے ساتھ پہلی ملاقات ہوگی۔

شام میں بشار حکومت کے خلاف لڑنے والے اسلامسٹ جنگجو گروپ ہیئت تحریر الشام (ایچ ٹی ایس) کے سربراہ نے دمشق کی تاریخی اموی مسجد کا دورہ کیا ہے۔

ایچ ٹی ایس کے رہنما ابو محمد الجولانی نے اموی مسجد میں موجود لوگوں سے خطاب بھی کیا ہے۔

سوشل میڈیا پلیٹ فورم ٹیلی گرام پر جاری ہونے والی ایک ویڈیو میں دکھایا گیا ہےکہ جولانی کے مسجد پہنچنے پر وہاں موجود مجمع ان کا خیر مقدم کر رہا ہے۔

پاکستان کی وزارتِ خارجہ نے کہا ہے کہ شام کی وحدت، خود مختاری اور علاقائی سالمیت کے حامی رہے ہیں اور اس متعلق اصولی مؤقف میں کوئی تبدیلی نہیں آئی ہے۔

بیان میں کہا گیا ہے کہ شام میں بدلتی صورتِ حال کا جائزہ لے رہے ہیں۔

وزارتِ خارجہ کے مطابق شام میں موجود پاکستانی محفوظ ہیں اور انہیں نقل و حرکت میں احتیاط برتنے کا مشورہ دیا گیا ہے۔

بیان میں کہا گیا ہے کہ دمشق ایئرپورٹ بند ہوچکا ہے۔ پاکستانی سفارت خانہ شام میں پھنسے زائرین سے رابطے میں ہے اور ایئرپورٹ فعال ہوتے ہی انہیں وطن واپس لانے کے لیے اقدامات کیے جائیں گے۔

شام میں دہائیوں حکمرانی کرنے والے بشار الاسد کے ملک چھوڑنے کی تصدیق ہوچکی ہے تاہم تاحال یہ واضح نہیں ہے کہ وہ کہاں موجود ہیں۔

بشار الاسد کے دیرینہ اتحادی روس نے ان کے ملک چھوڑنے کی تصدیق کی ہے تاہم ان کے بارے میں مزید تفصیلات فراہم نہیں کی ہیں۔

شامی فوج کے کئی سینیئر حکام بھی بشار الاسد کے ملک چھوڑنے کی تصدیق تو کرچکے ہیں لیکن ان کی اگلی منزل کے بارے میں لاعلمی کا اظہار کر رہے ہیں۔

پروازوں کی ٹریکنگ کرنے والی ویب سائٹ فلائٹ ریڈار کے مطابق جس وقت باغیوں نے دمشق میں داخل ہونے کا اعلان کیا تھا، اس کے آس پاس ہی دمشق ایئرپورٹ سے ایک پرواز روانہ ہونے کا ڈیٹا ملتا ہے۔

فلائٹ ریڈار کے مطابق اس پرواز نے شام کی ساحلی پٹی کا رُخ کیا تھا جہاں بشار الاسد کے علویہ فرقے کے مضبوط گڑھ ہیں۔ لیکن کچھ ہی دیر بعد اس فلائٹ نے یوٹرن لیا اور اس کے بعد نقشے سے غائب ہوگئی۔

فلائٹ ریڈار 24 کے مطابق شام سے اڑنے والے جس واحد طیارے کا سراغ لگایا جاسکا ہے اس نے باغٰیوں کے قبضے کے وقت حمص سے متحدہ عرب امارات کے لیے پرواز کی تھی۔ تاہم تاحال کسی ذرائع سے ان تفصیلات کی تصدیق نہیں ہوسکی ہے۔