اسلام آباد میں پی ٹی آئی کا احتجاج روکنے کے لیے حکومتی کوششیں، مرکزی راستے سیل

پاکستان کے سابق وزیرِ اعظم عمران خان کی اہلیہ بشریٰ بی بی کے خلاف سعودی عرب سے متعلق بیان دینے پر ایف آئی آر درج کر دی گئی ہے۔

بشریٰ بی بی کے خلاف ایف آئی آر ڈیرہ غازی خان میں ٹیلی گراف ایکٹ 1885 کے تحت درج کی گئی ہے۔ ایف آئی آر میں کہا گیا ہے کہ انہوں نے لوگوں کو ورغلانے کی کوشش کی۔

بشریٰ بی بی کا سعودی عرب سے متعلق متنازع بیان پاکستان میں موضوعِ بحث بنا ہوا ہے۔ حکومت کی جانب سے اس معاملے پر شدید ردِعمل بھی سامنے آ رہا ہے۔

تحریکِ انصاف کے رہنماؤں کا کہنا ہے کہ بشریٰ بی بی کے بیان کو سیاق و سباق سے ہٹ کر پیش کیا جا رہا ہے۔

پاکستان کے وزیرِ اعظم شہباز شریف کا کہنا ہے کہ قوم سعودی عرب کے خلاف پروپیگنڈا اور ملکی سلامتی سے کھیلنے والوں کے ہاتھ توڑ دے گی۔

بشریٰ بی بی نے جمعرات کو جاری کیے گئے ایک ویڈیو بیان میں کہا تھا کہ عمران خان جب ننگے پاؤں مدینہ گئے تو جنرل باجوہ سے کہا گیا کہ یہ کسے اُٹھا لائے ہو، ہم یہاں شریعت ختم کر رہے ہیں۔ ہمیں ایسے لوگ نہیں چاہئیں۔

ترجمان نیشنل ہائی ویز اینڈ موٹر وے پولیس کا کہنا ہے کہ 24 نومبر کے احتجاج کے حوالے سے مصدقہ اطلاعات موصول ہوئی ہیں کہ مشتعل مظاہرین امن امان کی صورتِ حال کو خراب کرنے اور نجی و سرکاری املاک کو نقصان پہنچانے کا منصوبہ بنا چکے ہیں۔

ترجمان کے مطابق کسی ناگہانی صورتِ حال سے بچنے اور عوام کی جان و مال کی حفاظت کو ملحوظِ خاطر رکھتے ہوۓ موٹر ویز کو مختلف مقامات سے بند کردیا گیا ہے۔

ترجمان نے دعویٰ کیا ہے کہ انٹیلی جینس اطلاعات ہیں کہ مظاہرین، ڈنڈوں اور غلیلوں سے لیس ہو کر آ رہے ہیں، قانون ہاتھ میں لینے والوں سے سختی سے نمٹا جائے گا۔

پاکستان تحریکِ انصاف کے احتجاج کے پیشِ نظر انتظامیہ نے فیض آباد سمیت اسلام آباد داخلے کے سات مختلف مقامات کو کنٹینرز لگا کر بند کر دیا ہے۔

انتظامیہ کے مطابق فیض آباد، آئی جے پی روڈ، روات ٹی چوک، کیرج فیکٹری، مندرہ اور ٹیکسلا کو بند کر دیا گیا ہے جب کہ کچہری چوک کو یک طرفہ ٹریفک کے طور پر چلایا جائے گا۔

جڑواں شہروں کی تمام 33 رابطہ سڑکوں کو مکمل طور پر سیل کیا جائے گا۔

واضح رہے کہ تحریک انصاف کے بانی عمران خان نے 24 نومبر کو اسلام آباد میں احتجاج کی کال دے رکھی ہے۔ تحریک انصاف کا مطالبہ ہے کہ ان کے بانی کو رہا کیا جائے جب کہ حکومت کا کہنا ہے کہ پی ٹی آئی کو احتجاج کی اجازت نہیں دی جا سکتی۔