انکم ٹیکس گوشوارے جمع کرانے کی تاریخ میں توسیع
فیڈرل بورڈ آف ریونیو (ایف بی آر)نے انکم ٹیکس گوشوارے جمع کرانے کی آخری تاریخ میں 31 اکتوبر تک توسیع کر دی ہے۔
ایف بی آر کے مطابق تاجر تنظیموں اور ٹیکس بار ایسو سی ایشنز کی درخواست اور بینکوں کی چھٹیوں کے پیش نظر ٹیکس گوشوارے جمع کرانے کی آخری تاریخ میں توسیع کی گئی ہے۔
ایف بی آر کا مزید کہنا ہے کہ گوشوارے جمع کرانے کی تاریخ میں توسیع انکم ٹیکس آرڈیننس 2001 کے سیکشن 214A کے تحت کی گئی ہے۔
عمران خان تک رسائی کی حکومتی یقین دہانی کے بعد پی ٹی آئی کا احتجاج مؤخر
پاکستان کی حزبِ اختلاف کی جماعت پاکستان تحریک انصاف نے دارالحکومت اسلام آباد میں شنگھائی تعاون تنظیم کے سربراہی اجلاس کے موقع پر 15 اکتوبر کو ڈی چوک میں طے کردہ احتجاج کو مؤخر کرنے کا اعلان کیا ہے۔
پارٹی نے کہا ہےکہ وزیرِداخلہ محسن نقوی نے یقین دلایا ہے کہ عمران خان کی معالج تک رسائی کو بحال کرتے ہوئے منگل کی صبح ڈاکٹرز کو اڈیالہ جیل بھجوایا جائے گا۔
گزشتہ ہفتے پی ٹی آئی کی جانب سے کارکنوں کو ایک ملک گیر کال جاری کی گئی تھی کہ وہ 15 اکتوبر کو اسلام آباد میں احتجاج کے لیے جمع ہوں۔ تاہم اب چیئرمین پی ٹی آئی بیرسٹر گوہر نے ایک ویڈیو بیان میں کہا ہے کہ وزیرِ داخلہ کی یقین دہانی کے بعد اسلام آباد میں ہونے والے احتجاج کو مؤخر کرنے کا فیصلہ کیا ہے۔
بیرسٹر علی گوہر نے کہا ہے کہ عمران خان کی صحت پارٹی کے ہر کارکن اور عہدیدار کی اولین ترجیح ہے۔
واضح رہے کہ پی ٹی آئی نے عمران خان سے پارٹی رہنماؤں اور خاندان کے افراد کو فوری ملنے کی اجازت کا مطالبہ کیا تھا۔
'ایس سی او' اجلاس کے بعد آئینی ترمیم کا مسودہ پارلیمان میں لانے کی تیاریاں
- By ایم بی سومرو
پاکستان میں حکمراں اتحاد کی جانب سے آئینی ترمیمی بل پر مشاورتی عمل آخری مراحل میں داخل ہو گیا ہے۔ حکومتی ارکان کے مطابق حکومت شنگھائی تعاون تنظیم (ایس سی او) اجلاس کے بعد آئینی مسودہ قومی اسمبلی میں لانے کا ارادہ رکھتی ہے۔
حکمراں اتحاد نے اپنے ارکانِ پارلیمنٹ کو 16 اکتوبر تک اسلام آباد پہنچنے کی ہدایت کر دی ہے اور آئینی ترمیمی بل کی منظوری کے لیے قومی اسمبلی اور سینیٹ کا اجلاس 17 اکتوبر کے بعد بلانے پر غور کیا جا رہا ہے۔
تجزیہ کاروں کا کہنا ہے کہ آئینی ترمیمی بل پر مشاورتی عمل جاری رہنا اس بات کا اشارہ ہے کہ ترمیمی بل کی منظوری کا کوئی نہ کوئی راستہ نکل آئے گا۔ لیکن نمبر گیم پوری کرنے کے لیے کچھ لو اور کچھ دو کی بنیاد پر بات ہو گی۔
سینئر صحافی اور تجزیہ کار سہیل وڑائچ کہتے ہیں کہ لگ رہا ہے کہ حکومت 25 اکتوبر سے پہلے آئینی ترمیمی بل منظور کرا لی گی۔
سہیل وڑائچ کا کہنا تھا کہ پاکستان میں اکثریت اقلیت اور اور اقلیت اکثریت میں بدلنے میں دیر نہیں لگتی۔
اُن کا کہنا تھا کہ زیادہ دُور کی بات نہیں ہے جب چیئرمین سینیٹ کے انتخاب میں اپوزیشن کے پاس زیادہ نمبر ہونے کے باوجود وہ اپنا چیئرمین سینیٹ منتخب نہیں کرا سکی تھی۔ لہذٰا یہ ایک طرح کی 'جادو نگری' ہے جہاں کچھ بھی ہو سکتا ہے۔
