عمران خان تک رسائی کی حکومتی یقین دہانی کے بعد پی ٹی آئی کا احتجاج مؤخر
پاکستان کی حزبِ اختلاف کی جماعت پاکستان تحریک انصاف نے دارالحکومت اسلام آباد میں شنگھائی تعاون تنظیم کے سربراہی اجلاس کے موقع پر 15 اکتوبر کو ڈی چوک میں طے کردہ احتجاج کو مؤخر کرنے کا اعلان کیا ہے۔
پارٹی نے کہا ہےکہ وزیرِداخلہ محسن نقوی نے یقین دلایا ہے کہ عمران خان کی معالج تک رسائی کو بحال کرتے ہوئے منگل کی صبح ڈاکٹرز کو اڈیالہ جیل بھجوایا جائے گا۔
گزشتہ ہفتے پی ٹی آئی کی جانب سے کارکنوں کو ایک ملک گیر کال جاری کی گئی تھی کہ وہ 15 اکتوبر کو اسلام آباد میں احتجاج کے لیے جمع ہوں۔ تاہم اب چیئرمین پی ٹی آئی بیرسٹر گوہر نے ایک ویڈیو بیان میں کہا ہے کہ وزیرِ داخلہ کی یقین دہانی کے بعد اسلام آباد میں ہونے والے احتجاج کو مؤخر کرنے کا فیصلہ کیا ہے۔
بیرسٹر علی گوہر نے کہا ہے کہ عمران خان کی صحت پارٹی کے ہر کارکن اور عہدیدار کی اولین ترجیح ہے۔
واضح رہے کہ پی ٹی آئی نے عمران خان سے پارٹی رہنماؤں اور خاندان کے افراد کو فوری ملنے کی اجازت کا مطالبہ کیا تھا۔
شنگھائی تعاون تنظیم (ایس سی او) کے سربراہی اجلاس کے سلسلے میں وزیرِ اعظم پاکستان شہباز شریف کی جانب سے مہمانوں کے اعزاز میں عشائیہ دیا گیا ہے۔
بھارتی وزیرِ خارجہ جے شنکر سمیت رُکن ممالک کے وزرائے اعظم اور دیگر مندوبین بھی عشائیے میں شریک ہیں۔ وزیرِ اعظم شہباز شریف نے مندوبین کا استقبال کیا۔ بھارتی وزیرِ خارجہ نے بھی وزیرِ اعظم شہباز شریف کے ساتھ مصافحہ کیا اور کچھ دیر تک گفتگو بھی کرتے رہے۔
خیال رہے کہ نو برس بعد یہ کسی بھی بھارتی وزیرِ خارجہ کا پہلا دورۂ پاکستان ہے۔
بھارت کے وزیرِ خارجہ کی نو سال بعد پاکستان آمد