اسرائیلی فورسز کی جنوبی لبنان پر بمباری، تین لبنانی فوجی ہلاک

لبنان کی فوج کا کہنا ہے کہ اسرائیل نے اتوار کو جنوبی لبنان میں ایک علاقے میں فوج کی گاڑی کو نشانہ بنایا ہے۔

فوج کے بیان میں مزید کہا گیا ہے کہ فوجی گاڑی پر کیے جانے والے اسرائیلی حملے میں تین فوجی ہلاک ہوئے ہیں۔

اسرائیل کے وزیرِ اعظم بن یامین نیتن یاہو کی اتوار کو سابق امریکی صدر ڈونلڈ ٹرمپ سے بات چیت ہوئی ہے۔

اس دوران اسرائیلی وزیراعظم بن یامین نیتن یاہو کا کہنا تھا کہ اسرائیل، امریکہ کی جانب سے اٹھائے گئے نکات کو مدِ نظر رکھے گا۔

نیتن یاہو کے بقول آخر میں اسرائیل اپنے فیصلے اپنے قومی مفاد میں ہی کرے گا۔

لبنان کی طاقت ور عسکری تنظیم سرگرم حزب اللہ نے دعویٰ کیا ہے کہ اس نے اتوار کو اسرائیل کے ایک شمالی ٹاؤن میں آرمی بیس پر راکٹ فائر کیے ہیں۔

خبر رساں ادارے ‘اے ایف پی’ کے مطابق حزب اللہ کا کہنا ہے کہ یہ حملے لبنان کے دفاع اور اسرائیل کے دیہاتوں اور گھروں پر کیے جانے والے حملوں کے خلاف کیے گئے۔

اسرائیل نے اتوار کو لبنان میں حزب اللہ کے دو ٹھکانوں پر فضائی کارروائی کی جن میں دارالحکومت بیروت پر کی جانے والے کارروائی میں اسرائیل نے حزب اللہ کے سینٹرل کمانڈ کو نشانہ بنانے کا دعویٰ کیا ہے۔

دوسری طرف غزہ میں امدادی اداروں نے رپورٹ کیا ہے کہ اسرائیل کے ایک حملے میں 73 افراد ہلاک ہوئے ہیں۔

خبر رساں ادارے ’ایسوسی ایٹڈ پریس‘ کے مطابق حزب اللہ کے مضبوط ٹھکانے پر کی جانے والی اسرائیلی کارروائی وزیر اعظم بن یامین نیتن یاہو کی رہائش گاہ پر حزب اللہ کے ڈرون حملے کی کوشش کے بعد کی گئی ہے۔

اسرائیلی فوج کا یہ بھی کہنا ہے کہ اس نے حزب اللہ کے انٹیلی جینس ہیڈ کوارٹر کے کمانڈ سینٹر اور زیرِ زمین اسلحے کے ٹھکانے کو نشانہ بنایا۔

فوج کا مزید کہنا تھا کہ اس نے حزب اللہ کے تین جنگجوؤں کو بھی نشانہ بنایا ہے۔