ایران کی اسرائیلی حملے میں ایک سویلین ہلاکت کی تصدیق، مؤثر جواب دینے کا بھی اعلان

اقوامِ متحدہ کی سلامتی کونسل نے ایران پر اسرائیل کے حملوں پر آج ہنگامی اجلاس طلب کیا ہے۔

سلامتی کونسل کے مطابق ہنگامی اجلاس ایران کی درخواست پر طلب کیا گیا ہے۔

اجلاس میں ایران پر اسرائیل کے ہفتے کو کیے گئے حملوں پر بات چیت کی جائے گی۔

اسرائیل نے یکم اکتوبر کو ایران کی جانب سےحملے کے جواب میں ایران پر حملے کیے تھے۔

ایران نے اتوار کو اجلاس طلب کرنے کی درخواست دی تھی جس کی حمایت الجزائر، چین اور روس نے کی تھی۔

اسرائیل کے وسطی شہر رامات ہاشارون میں اتوار کو ایک ڈرائیور نے اپنا ٹرک بس اسٹاپ پر کھڑے افراد پر چڑھا دیا جس کے نتیجے میں کم از کم 29 افراد زخمی ہوئے ہیں۔

یہ واقعہ خفیہ ایجنسی ’موساد‘ کے ہیڈ کوارٹرز کے قریب پیش آیا ہے۔

پولیس کے مطابق ٹرک ڈرائیور کو گولی مار کر ہلاک کر دیا گیا ہے۔ حکام نے تاحال یہ واضح نہیں کیا کہ یہ حملہ تھا یا واقعہ حادثہ تھا۔

مصر کے صدر جنرل ریٹائرڈ عبد الفتاح السیسی نے غزہ میں دو روزہ جنگ بندی اور محدود تعداد میں یرغمالیوں کی رہائی کی تجویز پیش کی ہے۔

صدر عبد الفتاح السیسی نے یہ تجویز ایسے موقع پر دی ہے جب غزہ میں جاری جنگ کو ایک برس سے زیادہ عرصہ ہو چکا ہے۔ حماس اور اسرائیلی فوج کے درمیان لڑائی جاری ہے جب کہ لگ بھگ سو یرغمالی اب بھی حماس کی تحویل میں ہیں۔

عبد الفتاح السیسی کی جانب سے پیش کی گئی تجویز میں کہا گیا ہے کہ غزہ سے یرغمالوں کی واپسی کے بدلے میں اسرائیلی جیلوں سے فلسطینی قیدیوں کی رہائی کی جائے۔

قاہرہ میں اتوار کو پریس کانفرنس میں مصری صدر نے کہا کہ دو روزہ جنگ بندی میں غزہ سے چار یرغمالوں کو رہا کیا جائے جس کے بدلے میں اسرائیلی جیلوں سے فلسطینیوں کو رہا کیا جائے اور پھر مزید دس دن تک اس پر مذاکرات ہو سکتے ہیں۔

انہوں نے یہ واضح نہیں کیا کہ ان کی یہ تجاویز غزہ کا انتظام سنبھالنے والی عسکری تنظیم حماس یا اسرائیل کو بھی پیش کی جا چکی ہیں۔

مشرقِ وسطیٰ کی صورتِ حال اور گزشتہ روز پیش آنے والے واقعات سے متعلق جاننے کےلیے یہاں کلک کریں۔