حماس کے لیڈر یحییٰ سنوار کون تھے؟
یحییٰ سنوار حماس کے وہ لیڈر تھے جنہوں نے گزشتہ برس اکتوبر میں اسرائیل پر ایک ایسے حملے کا کلیدی منصوبہ تیار کیا تھا جس نے دنیا کو چونکا دیا اور ایسی تباہی کو جنم دیا جو ابھی تک پھیل رہی ہے اور جس کا کوئی خاتمہ نظر نہیں آتا۔
جمعرات کو اسرائیل نے کہا کہ غزہ میں فوجیوں نے سنوار کو ہلاک کر دیا ہے۔ حماس کی جانب سے ان کی موت کی فوری طور پر کوئی تصدیق نہیں کی گئی۔
اس پراسرار شخصیت سے جنگی محاذ کے کے دونوں اطراف لوگ خوفزدہ تھے۔ انہوں نے حماس کے مسلح ونگ کے سربراہ محمد ضیف کے ساتھ مل کر جنوبی اسرائیل پر سات اکتوبر 2023 کا حیران کن حملہ تیار کیا تھا۔ اسرائیل نے کہا تھاکہ اس نے جولائی میں جنوبی غزہ میں ہونے والے اس فضائی حملے میں ضیف کو ہلاک کیا جس میں 70 سےزیادہ فلسطینی ہلاک ہوئے تھے۔
غزہ میں جنگ کی رفتار کے تعین کے لیے 61 سالہ حماس رہنما سے بڑی کوئی بھی شخصیت نہیں تھی۔ جنونی، نظم و ضبط اور آمرانہ مزاج کے حامل ، سنوار شاذ و نادر سامنے آنے والے ایک تجربہ کار عسکریت پسند تھے، جنہوں نے اسرائیلی جیلوں میں گزارے برسوں میں عبرانی زبان سیکھی اور اپنے دشمن کا بغور مطالعہ کیا۔
حماس کے جلاوطن رہنما اسماعیل ہنیہ ایران کے دورے کے دوران ایک دھماکے میں مارے گئے جس کا الزام اسرائیل پر عائد کیا گیا۔ اس کے فورأ بعد سنوار کو حماس کے اعلیٰ رہنما کے طور پر ان کی جگہ لینے کے لیے منتخب کیا گیا، اگرچہ وہ غزہ میں روپوش تھے۔
جمعے کو غزہ پر اسرائیل کے حملے، تین بچوں سمیت متعدد افراد ہلاک
اسرائیل نے حماس کے لیڈر یحیٰ سنوار کو ہلاک کر کے عسکریت پسند گروپ کو ایک بڑا دھچکا پہنچانے کے بعد اسکے خاتمےکی اپنی ایک سالہ جنگ کو آگے بڑھاتے ہوئے جمعے کے روز غزہ پر متعدد شدید حملے کیے ۔
اے ایف پی کے صحافیوں کے مطابق سنوار کی ہلاکت سے غزہ پر اسرائیلی حملوں کا سلسلہ ختم نہیں ہوا ۔ جمعرات کو رات بھر اور جمعے کو علی الصبح تک متعدد حملوں نے علاقے کو ہلا کر رکھ دیا۔
غزہ کے شہری دفاع کے ادارے کے مطابق امدادی کارکنوں نے شمال میں ایک گھر پر علی الصبح کے ایک حملے کے بعد گھر کے ملبے سے تین فلسطینی بچوں کی لاشیں نکالیں ۔
اب جب غزہ میں ایک سال سے زیادہ عرصے کی جنگ سے حماس پہلے ہی کمزور ہو چکی ہے ، سنوار کی موت تنظیم کےلیے ایک شدید دھچکا ہے لیکن یہ واضح نہیں ہے کہ آیا اب اسکی اپنی اسٹریٹیجی میں کوئی تبدیلی واقع ہو گی۔
سنوار کی ہلاکت کا خیر مقدم کرتےہوئےاسرائیلی وزیر اعظم بنجمن نیتن یاہو نے کہا کہ سات اکتوبر2023 کو حماس کے حملے نے جس جنگ کو جنم دیا وہ ختم نہیں ہوئی ہے ، لیکن انہوں نے مزید کہا کہ یہ انجام کی شروعات،ہے۔
یحییٰ سنوار لڑائی کے دوران جان کی بازی ہار گئے ہیں: حماس رہنما کی تصدیق
حماس کے رہنما خلیل الحیا نے تصدیق کی ہے کہ حماس کے سربراہ یحییٰ سنوار جمعرات کو لڑائی کے دوران جان کی بازی ہا ر گئے ہیں۔
خبر رساں ادارے 'ایسوسی ایٹڈ پریس' کے مطابق جمعے کو جاری کیے گئے ایک بیان میں حماس رہنما کا کہنا تھا کہ جب تک ؒغزہ میں جنگ بند نہیں ہو جاتی اور اسرائیلی فوج نکل نہیں جاتی، اس وقت تک یرغمالوں کو رہا نہیں کیا جائے گا۔
اسرائیلی وزیرِ اعظم کی جانب سے لڑائی جاری رکھنے کا اعلان اور جنگ بندی کی ٹوٹتی اُمیدیں
اسرائیل کے وزیرِ اعظم بن یامین نیتن یاہو کی جانب سے حماس کے سربراہ یحییٰ سنوار کی ہلاکت کے باوجود جنگ جاری رکھنے کے اعلان پر مشرقِ وسطیٰ میں جنگ بندی کی اُمیدیں پھر سے دم توڑ رہی ہیں۔
خیال تھا کہ یحیی سنوار کی ہلاکت کے بعد ایک سال سے جاری غزہ جنگ ختم ہو سکتی ہے۔ تاہم اسرائیلی وزیرِ اعظم کا کہنا ہے کہ جب تک حماس ہتھیار نہیں ڈال دیتی اور اسرائیلی یرغمالوں کو بازیاب نہیں کرا لیا جاتا، جنگ جاری رہے گی۔
وزیرِ اعظم نیتن یاہو نے ایران کا نام لیے بغیر کہا ہے کہ "ہمارے پاس برائی کے محور کو روکنے اور ایک بہتر مستقبل بنانے کا ایک بہترین موقع ہے۔"
نیتن یاہو کا بیان صدر بائیڈن اور دیگر مغربی رہنماؤں کے بیانات سے مختلف ہے جس میں ان رہنماؤں نے اُمید ظاہر کی تھی کہ یحییٰ سنوار کی ہلاکت سے جنگ بندی کی راہ ہموار ہو گی۔
اسرائیلی فوج نے یحیٰ سنوار کی ویڈیو جاری کر دی