اسرائیل کا جامع دفاعی میزائل نظام کس طرح کام کرتا ہے؟
گزشتہ ایک عشرے میں اسرائیل نے راکٹ اور میزائل حملوں کے دفاع کے لیے ایک جامع دفاعی میزائل نظام تشکیل دیا ہے۔ یہ نظام تب ہی حرکت میں آتا ہے جب یہ راکٹ یا میزائل شہری، سرکاری یا فوجی عمارتوں کو نشانہ بنا رہے ہوں۔
اسرائیلی رہنماؤں کا کہنا ہے کہ یہ نظام سو فی صد کامیابی نہیں دیتا لیکن بہت سی جانوں اور املاک کے نقصان کو بچاتا ہے۔
یہاں اسرائیلی دفاعی میزائل نظام کے مختلف تہوں کا ذکر ہے۔
دی ایرو
یہ نظام امریکہ میں تیار کیا گیا تھا اور یہ دور مار کرنے والے میزائلوں، جن میں منگل کے روز ایران کی جانب سے فائر کیے جانے والے بیلسٹک میزائل بھی شامل ہیں کے خلاف کام آتا ہے۔ دی ایرو، یعنی تیر زمین کی فضا سے باہر کام کرتا ہے اور حالیہ تنازع کے دوران یمن میں حوثی باغیوں کی جانب سے فائر کیے گئے میزائلوں کے خلاف بھی استعمال کیا گیا ہے۔
ڈیوڈز سلنگ
یہ نظام بھی امریکہ میں تیار کیا گیا اور یہ درمیانے فاصلے پر مار کرنے والے میزائلوں کے لیے استعمال کیا جاتا ہے۔ جیسے حزب اللہ کے پاس موجود میزائلوں کے خلاف اسے استعمال کیا گیا۔ حالیہ تنازع کے دوران اسے کئی بار استعمال کیا گیا۔
لبنانی ریڈ کراس کی لوگوں سے خون کے عطیے کی اپیل
لبنان کے امدادی ادارے ریڈ کراس نے جمعے کو لوگوں سے اپیل کی ہے کہ وہ زخمیوں اور لوگوں کی جانیں بچانے کے لیے خون کے عطیات دیں۔
خبر رساں ادارے رائٹرز کے مطابق لبنان کے سیکیورٹی ذرائع نے بتایا ہے کہ ملک کے جنوبی علاقوں میں حزب اللہ سے تعلق رکھنے والے تین ریسکیو ورکرز زخمی ہوئے ہیں۔
ایرانی وزیرِ خارجہ کی لبنانی وزیرِ اعظم سے ملاقات
ایران کے وزیرِ خارجہ عباس عراقچی نے جمعے کو لبنان کے نگراں وزیرِ اعظم نجیب مکاتی سے بیروت میں ملاقات کی ہے۔
ایرانی وزیرِ خارجہ ایسے موقع پر بیروت کے دورے پر ہیں جب اسرائیل کی جانب سے لبنانی دارالحکومت پر اسرائیل کے فضائی حملے جاری ہیں۔جمعے کی علی الصباح بھی اسرائیل نے بیروت ایئرپورٹ کے قریب ایک عمارت پر بمباری کی ہے۔
مغربی کنارے میں اسرائیلی فوج کی کارروائی، حماس کے مقامی کمانڈر کو ہلاک کرنے کا دعویٰ
اسرائیلی فورسز نے جمعے کو مغربی کنارے میں طولکرم پناہ گزین کیمپ پر فضائی حملہ کیا ہے جس کے نتیجے میں 18 فلسطینی ہلاک ہو گئے ہیں۔
فلسطینی وزارتِ صحت نے بھی اسرائیلی حملے میں 18 فلسطینیوں کے ہلاک ہونے کی تصدیق کی ہے جب کہ اسرائیلی فورسز نے حملے میں حماس کے مقامی کمانڈر کو ہلاک کرنے کا دعویٰ کیا ہے۔
اسرائیلی فورسز نے اپنے ایک بیان میں کہا ہے کہ طولکرم میں حماس کے نیٹ ورک کے سربراہ ذہی یاسر عبدالرازق اوفی کو ہلاک کر دیا ہے۔
ہر ملک جارحیت کے خلاف دفاع کا حق رکھتا ہے، ایرانی سپریم لیڈر
ایران کے سپریم لیڈر آیت اللہ علی خامنہ ای نے کہا ہے کہ مسلم ممالک کا ایک مشترکہ دشمن ہے اور ہر ملک کو جارحیت کے خلاف اپنے دفاع کا حق حاصل ہے۔
خبر رساں ادارے 'رائٹرز' کے مطابق خامنہ ای نے تہران میں نمازِ جمعہ کے اجتماع سے خطاب کرتے ہوئے کہا کہ مسلم ممالک کو افغانستان سے یمن اور ایران سے غزہ و لبنان تک ایک دفاعی لائن کھینچنی ہو گی۔
اسرائیل پر حالیہ میزائل حملوں کا حوالہ دیتے ہوئے ایرانی سپریم لیڈر نے کہا کہ ہماری مسلح افواج کا چند روز قبل ایکشن شاندار تھا جو مکمل طور پر جائز اور قانونی تھا۔
انہوں نے کہا کہ ہم اسرائیل کو جواب دینے میں تاخیر نہیں کریں گے۔
خامنہ ای کے بقول اسرائیل عام لوگوں کو قتل کر کے جیتنے کی کوشش کر رہا ہے۔