بجلی کی خرابی کی وجہ سے آگ کا اضافہ
کویتی حکام نے جمعرات کو کہا کہ ایک رہائشی عمارت میں اس آتش زدگی کی تحقیقات میں تین افراد کو ہلاکتوں کے الزام میں حراست میں لیا گیا ہے جس میں 50 غیر ملکی کارکن ہلاک ہوئے، جن میں زیادہ تر بھارتی تھے۔
کویت کی پبلک پراسیکیوشن سروس نے بتایا کہ ایک کویتی اور دو غیر ملکی باشندوں کو حفاظتی طریقہ کار اور آگ کے ضوابط نظر انداز کرنے کی وجہ سے غفلت کے ذریعے قتل کے شبہ میں حراست میں لیا گیا ہے۔
کویت کے فائر ڈیپارٹمنٹ نے معائنے کے بعد بتایا کہ آگ گراؤنڈ فلور پر گارڈ کے کمرے میں بجلی کی خرابی سے لگی۔
کویت اور بیرون ملک اس المیے میں ہلاک ہونے والوں کے رشتہ دار اور دوست سوگ میں ڈوبے ہوئے ہیں۔
تیل کی دولت سے مالا مال کویت کی 40 لاکھ سے زیادہ آبادی غیر ملکیوں پر مشتمل ہے، جن میں سے اکثر کا تعلق جنوبی اور جنوب مشرقی ایشیا سے ہے جو زیادہ تر تعمیرات اور خدمات کی صنعتوں میں کام کرتے ہیں۔
آگ بدھ کی صبح منگاف کے علاقے میں ایک چھے منزلہ رہائشی عمارت میں لگی تھی جہاں تقریباً 200 مزدوروں رہتے تھے۔ مکینوں میں اکثریت غیر ملکیوں کی تھی۔
بدھ کو 49 افراد کی ہلاکت کا اعلان کرنے کے بعد کویتی وزیر خارجہ عبداللہ ال یحییٰ نے نامہ نگاروں کو بتایا کہ "زخمیوں میں سے ایک کا رات گئے انتقال ہوگیا۔"اس طرح ہلاکتوں کی تعداد پچاس ہو گئی ہے۔
انہوں نے مزید کہا کہ مرنے والوں میں اکثریت بھارتیوں کی ہے۔ انہوں نے کہا کہ دیگر قومیتوں کے لوگ بھی ہیں، لیکن ان کی تفصیل نہیں بتائی.
فائر ڈپارٹمنٹ کے ایک ذریعہ کے مطابق، آگ کی وجہ سے عمارت میں پھنس جانے کے بعد بہت سے لوگ دھؤیں میں دم گھٹ جانے کی وجہ سے ہلاک اور زخمی ہوئے۔
بدھ کے روز، وزیر داخلہ شیخ فہد الیوسف نے عمارتوں میں کارکنوں کی گنجائش سے زیادہ رہائش کے مسئلےسے نمٹنے کا عزم کیا اور دھمکی دی کہ حفاظتی اصولوں کی خلاف ورزی کرنے والی عمارتوں کو بند کر دیا جائے گا۔
لاکھوں ایشیائی باشندے کویت میں رہتے ہیں اور اپنے خاندانوں کو رقم بھیجنے کے لیےخلیج کے اس امیر ملک میں کام کرتے ہیں، وہ اس سانحے پر صدمے میں تھے۔
جنوبی ہندوستان کی ریاست کیرالہ کے کولم ضلع سے تعلق رکھنے والے 33 سالہ شمیر عمر الدین کے رشتہ دار، سیف نے کہا انکا پورا گاؤں سوگ میں ہے۔ "وہ ایک پیارا انسان تھا۔ جو ہر ایک کا دوست تھا۔"
"وہ غریب خاندان کا تھا، اس لیے ان کا کویت جانا ان کے خاندان کے لیے بہتر حالات کا موقع تھا۔"انہوں نے کہا
ریجی ورگیس نے بتایا کہ ان کے قریبی دوست لوکوز چھٹی منزل پر مقیم تھے۔ ان کی موت کی اطلاع ایک اور کارکن نے دی جس نے آگ سے بچنے کے لیے دوسری منزل سے چھلانگ لگا دی تھی، اس کی ٹانگ ٹوٹ گئی ہے۔
ورگیز نے کہا، "میں ابھی تک اس پر یقین کرنے کے قابل نہیں ہوں۔ ہمیں اس خبر پر یقین ہی نہیں آیا۔"
انہوں نے کہا"میں نے پچھلے ہفتے ہی ان سے بات کی تھی... یہ خبر ایک بڑا صدمہ ہے۔"
بدھ کے روز، بھارتی وزیر اعظم نریندر مودی نے اس خوفناک سانحے کے متاثرین کے لیے مدد کا وعدہ کیا، اور لواحقین کو دو لاکھ روپے دینے کا اعلان کیا۔
ڈی این اے ٹیسٹنگ
بھارت کے جونیئر وزیر خارجہ کیرتی وردھن سنگھ زندہ بچ جانے والوں کی مدد کرنے اور بھارتی فضائیہ کے ایک طیارے میں ہلاک ہونے والوں کی باقیات کی وطن واپسی کا انتظام کرنے کے لیے کویت میں ہیں۔
انہوں نے بھارتی میڈیا سے بات کرتے ہوئے کہا، ’’کچھ (نعشیں) اتنی جل چکی ہیں کہ شناخت سے باہر ہیں، لہٰذا شناخت کے لیے ڈی این اے ٹیسٹ جاری ہیں۔‘‘
منیلا میں، مائیگرنٹ ورکرز کے محکمے نے کہا کہ تین فلپینی شہری ہلاک ہوئے ہیں، دو کی حالت تشویشناک ہے جبکہ چھ بچ گئے ہیں۔
مائیگرنٹ ورکرز کے سیکریٹری ہنس لیو جے کیڈاک نے ایک بیان میں کہا، "ہم تمام متاثرہ خاندانوں کے ساتھ رابطے میں ہیں۔"
یہ آگ کویت میں لگنے والی بدترین آگ تھی، جس کی سرحدیں عراق اور سعودی عرب سے ملتی ہیں اور دنیا کے تقریباً سات فیصد تیل کے ذخائر پر واقع ہیں۔
یہ رپورٹ اے ایف پی کی معلومات پر مبنی ہے۔
فورم