صدر ابراہیم رئیسی کی ہیلی کاپٹر حادثے میں ہلاکت، ایران میں پانچ روزہ سوگ کا اعلان

ایران کے صدر ابراہیم رئیسی کے ہیلی کاپٹر کو حادثہ پیش آنے کے بعد برطانیہ میں بعض ایرانی افراد کے خوشی کا اظہار کرنے کی ویڈیوز سامنے آئی ہیں۔

وائس آف امریکہ کی فارسی سروس کی ایک ویڈیو میں دیکھا جا سکتا ہے کہ لندن میں کچھ افراد ایرانی سفارت خانے کے باہر موسیقی پر رقص کر رہے ہیں۔

اس طرح کی متعدد ویڈیوز سوشل میڈیا پر شیئر کی جا رہی ہیں جن میں مبینہ طور پر ایرانی شہری خوشی کا اظہار کر رہے ہیں۔

ایران نے صدر کی موت کا سرکاری طور پر بھی اعلان کر دیا ہے۔

ایرانی صدر کی ویب سائٹ پر جاری بیان میں کہا گیا ہے کہ اسلامی جمہوریہ ایران کے صدر، ایرانی عوام اور امام رضا کے خادم کی موت ہو گئی ہے۔

بیان میں مزید کہا گیا ہے کہ ابراہیم رئیسی نے اتوار کو صوبہ مشرقی آذر بائیجان کا دورہ کیا تھا جہاں انہوں نے دو تعمیراتی منصوبہ کا افتتاح بھی کیا تھا۔

وہاں سے واپسی پر ورزقان کے مقام پر ان کا ہیلی کاپٹر حادثے کا شکار ہوا۔ یہ حادثہ امام رضا کے یومِ پیدائش کی شام ہوا، جس میں ابراہیم رئیسی کی موت واقع ہوئی۔

بیان میں مزید کہا گیا کہ ابراہیم رئیسی کے ہمراہ وزیرِ خارجہ حسین امیر عبد الہیان، تبریز میں نمازِ جمعہ کے امام آیت اللہ آلِ ہاشم، مشرقی آذربائیجان کے گورنر جنرل مالک رحمتی، صدر کی سیکیورٹی ٹیم کے سربراہ، ہیلی کاپٹر کے پائلٹ اور عملہ کے افراد بھی ہلاک ہو گئے ہیں۔

ایران کے صدر ابراہیم رئیسی کی ہیلی کاپٹر حادثے میں موت کے بعد عالمی رہنماؤں کی جانب سے تعزیتی بیانات کا سلسلہ جاری ہے۔

پاکستان کے صدر آصف علی زرداری، وزیرِ اعظم میاں محمد شہباز شریف نے بھی تعزیتی بیانات جاری کیے ہیں۔

صدر آصف زرداری کا بیان میں کہنا تھا کہ صدر ابراہیم رئیسی امتِ مسلمہ کے اتحاد کے بڑے حامی تھے۔ عالمِ اسلام ایک عظیم رہنما سے محروم ہو گیا۔

بھارت کے وزیرِ اعظم نریندر مودی نے بھی صدر ابراہیم رئیسی کی موت پر افسوس کا اظہار کیا۔

اس کے علاوہ تھائی لینڈ کے وزیرِ اعظم، عراق کے وزیرِ اعظم، مالدیپ کے وزیرِ خارجہ سمیت دیگر ممالک کی اعلیٰ شخصیات نے بھی بیان جاری کیے ہیں۔