صدر ٹرمپ نے حلف اٹھالیا، امریکہ کو دوبارہ 'عظیم' بنانے کا اعلان

روایت کے برخلاف ڈونلڈ ٹرمپ کی تقریبِ حلف برداری اِن ڈور ہو رہی ہے لیکن امریکہ میں ایسے مواقع پہلے بھی آتے رہے ہیں۔

حالیہ تاریخ میں 1985 میں اس وقت دوبارہ منتخب ہونے والے ری پبلکن صدر رونلڈ ریگن کی حلف برداری بھی کیپیٹل ہل پر کھلی فضا میں منعقد نہیں ہو پائی تھی۔

وائٹ ہاؤس کے اس وقت کے ریکارڈ کے مطابق حلف برداری کی اِن ڈور منتقلی پر اس وقت کے صدر رونلڈ اور ان کی اہلیہ نینسی ریگن بہت اداس تھے۔ لیکن انہیں بھی سردی کی شدت کی وجہ سے یہ فیصلہ کرنا پڑا تھا۔

سال 1985 میں وائٹ ہاؤس کے پریس سیکریٹری لیری اسپیکس کے مطابق صدر اور خاتونِ اول کو احساس تھا کہ ان کے پاس اس کے علاوہ کوئی راستہ نہیں تھا۔

مزید پڑھیے

امریکہ کے منتخب صدر ڈونلڈ ٹرمپ صدارت کا حلف اُٹھانے سے قبل تقریب میں شرکت کے لیے واشنگٹن ڈی سی کے سینٹ جونز چرچ پہنچ گئے ہیں۔

حلف برداری سے قبل امریکہ کے نو منتخب صدور کی وائٹ ہاؤس کے نزدیک واقع اس چرچ کی سروس میں شرکت بھی ایک روایت ہے۔

امریکہ کے منتخب صدر سینٹ جونز چرچ میں سروس میں شرکت کے بعد وائٹ ہاؤس کے لیے روانہ ہو گئے ہیں۔ جہاں صدر جو بائیڈن اور اُن کی اہلیہ منتخب صدر اور اُن کی اہلیہ میلانیا ٹرمپ کا استقبال کریں گی۔

ڈونلڈ ٹرمپ اور اُن کی اہلیہ سبک دوش ہونے والے صدر جو بائیڈن اور اُن کی اہلیہ کے ساتھ چائے پر ملاقات کریں گے جس کے بعد وہ کیپٹل ہل کے لیے روانہ ہوں گے۔