صدر ٹرمپ نے حلف اٹھالیا، امریکہ کو دوبارہ 'عظیم' بنانے کا اعلان

روس کے صدر ولادیمیر پوٹن نے امریکہ کے منتخب صدر ڈونلڈ ٹرمپ کو مبارک باد دی ہے۔

ڈونلڈ ٹرمپ کی حلف برداری سے قبل روس کی قومی سلامتی کونسل کے ارکان کے ساتھ ویڈیو کال میں روسی صدر کا کہنا تھا کہ "ہم ٹرمپ اور اُن کی ٹیم کی جانب سے روس کے ساتھ تعلقات بحال کرنے کے بیانات سنتے رہتے ہیں۔"

صدر پوٹن کا کہنا تھا کہ یہ تعلقات سبک دوش ہونے والی امریکی انتظامیہ نے ہماری کسی بھی غلطی کے بغیر ختم کر دیے گئے تھے۔

صدر پوٹن کا کہنا تھا کہ ہم ڈونلڈ ٹرمپ کا یہ بیان بھی سن چکے ہیں جس میں اُنہوں نے کہا تھا کہ تیسری عالمی جنگ روکنے کے لیے اقدامات کرنا ہوں گی۔ صدر پوٹن کا کہنا تھا کہ ہم ڈونلڈ ٹرمپ کے اس نقطہ نظر کا خیر مقدم کرتے ہیں اور اُنہیں دوبارہ صدارت کا منصب سنھالنے پر مبارک باد دیتے ہیں۔

صدر پوٹن کا مزید کہنا تھا کہ روس، یوکرین کے معاملے پر بات چیت کے لیے بھی تیار ہے۔

امریکہ کے سابق نائب صدر مائیک پینس بھی منتخب صدر ڈونلڈ ٹرمپ کی حلف برداری کی تقریب میں شریک ہوں گے۔

پہلی مدت کے اختتام پر انتخابی نتائج کی توثیق کے معاملے پر صدر ٹرمپ اور مائیک پینس کے تعلقات خراب ہو گئے تھے۔

''ایکس' پر اپنی پوسٹ میں مائیک پینس کا کہنا تھا کہ آج وہ دن ہے جب امریکی شہری جمہوریت اور اقتدار کی پرامن منتقلی کا جشن مناتے ہیں۔

اُن کا کہنا تھا کہ "ہم اپنے تمام ساتھی امریکیوں کی حوصلہ افزائی کرتے ہیں کہ وہ صدر ٹرمپ اور نائب صدر وینس کے لیے دعا کرنے کے لیے ہمارے ساتھ شامل ہوں کیوں کہ وہ اس عظیم قوم کی قیادت کی زبردست ذمہ داری سنبھال رہے ہیں۔"

سبک دوش ہونے والے امریکی صدر جو بائیڈن نے کہا ہے کہ اُنہوں نے منتخب صدر ڈونلڈ ٹرمپ کے نام خط لکھا ہے۔

امریکہ میں یہ بھی روایت ہے کہ سبک دوش ہونے والا صدر آنے والے صدر کے نام ایک خط لکھتا ہے جو وائٹ ہاؤس کے اوول آفس کے دراز میں رکھا جاتا ہے۔

خبر رساں ادارے 'ایسوسی ایٹڈ پریس' کے مطابق صدر بائیڈن نے یہ نہیں بتایا کہ اُنہوں نے خط میں کیا لکھا ہے۔ ڈونلڈ ٹرمپ نے بھی چار سال قبل صدارت سے سبک دوش ہونے سے قبل جو بائیڈن کے نام خط لکھا تھا۔

مزید تفصیلات دیکھیے اس ویڈیو میں۔۔

امریکہ کے منتخب صدر ڈونلڈ ٹرمپ اپنی اہلیہ میلانیا ٹرمپ کے ہمراہ وائٹ ہاؤس پہنچ گئے ہیں۔ سبک دوش ہونےو الے صدر جو بائیڈن اور اُن کی اہلیہ نے استقبال کیا۔

ڈونلڈ ٹرمپ اور اُن کی اہلیہ وائٹ ہاؤس میں جو بائیڈن اور اُن کی اہلیہ جل بائیڈن سے چائے پر ملاقات کریں گے جس کے بعد وہ حلف برداری کے لیے کیپٹل ہل جائیں گے۔