کرونا وائرس پر افغان طالبان کی تشویش
افغان طالبان نے کرونا وائرس کے پیشِ نظر افغانستان کی جیلوں میں قید طالبان قیدیوں کی مناسب دیکھ بھال کا مطالبہ کیا ہے۔
طالبان کی طرف سے جاری کیے گئے ایک بیان میں کہا گیا ہے کہ اُنہیں جیلوں میں قید اپنے ساتھیوں کی صحت کے حوالے سے تشویش ہے۔ لہذٰا صحت کی عالمی تنظیمیں اور دیگر ادارے ان قیدیوں کا اس وائرس سے تحفظ یقینی بنائیں۔
طالبان نے دعویٰ کیا ہے کہ افغانستان کی جیلوں میں اس وقت 40 ہزار قیدی ہیں اور انہیں صحت کی مناسب سہولتیں میسر نہیں ہیں۔
افغانستان کے انسانی حقوق کے کمیشن نے طالبان سے کہا ہے کہ وہ صحت کے کارکنوں کو اپنے زیر اثر علاقوں میں جانے کی اجازت دیں تاکہ وہ کرونا وائرس ے متعلق آگاہی دے سکیں۔
طالبان کے مطابق کابل انتظامیہ کی جیلوں میں مبینہ طور پر صحت و صفائی کی سہولیات کا فقدان ہے۔ وہاں گنجائش سے زیادہ قیدی ہیں، جو اُن کی صحت کے لیے تشویش اور خطرے کی بات ہے۔
افغانستان کی قومی سلامتی کے مشیر کے ترجمان جاوید فیصل نے کہا ہے کہ افغان حکومت ملک بھر کی جیلوں میں صحت کی سہولیات کی فراہمی کے لیے بین الاقوامی امدادی تنظیم (آئی سی آر سی) کے ساتھ مل کر کام کر رہی ہے۔
اطلاعات کے مطابق طالبان کے زیادہ تر قیدی بگرام اور پل چرخی کی جیلوں میں ہیں۔ البتہ جاوید فیصل نے کہا کہ قیدیوں کی صحت کی صورتِ حال سے زیادہ امن عمل کی کامیابی میں طالبان کے حقیقی عزم کی ضرورت ہے۔ جس کا اُن کے بقول فقدان ہے۔
کراچی ایئرپورٹ پر مسافروں کے بیٹھنے کی بینچز ہٹا لی گئیں
ایوی ایشن ڈویژن کی ہدایت پر سول ایوی ایشن نے کراچی کے جناح انٹرنیشنل ایئرپورٹ میں مسافروں کے بیٹھنے کے لیے موجود کرسیاں ہٹا لی گئیں۔ حکام کا کہنا ہے کہ کرونا وائرس کا پھیلاؤ روکنے کے لیے ایسا کیا گیا ہے۔
تفتان سے آئے مزید 11 افراد میں کرونا وائرس کی تشخیص
وزیر اعلیٰ سندھ سید مراد علی شاہ نے پیر کو کراچی میں پریس کانفرنس کے دوران کہا کہ سب سے پہلے چین سے آنے والے 34 افراد کا کرونا وائرس کا ٹیسٹ کیا گیا اور تمام افراد کا ٹیسٹ منفی آیا۔ چین سے کوئی کیس پاکستان منتقل نہیں ہوا۔ اللہ کا شکر ہے اب تک صورتِ حال قابو میں ہے۔
وزیر اعلٰی سندھ کا کہنا تھا کہ آغا خان اسپتال میں تفتان سے آئے 23 افراد کے نمونے بھجوائے گئے تھے، جن میں سے 11 افراد میں وائرس کی تشخیص ہوئی ہے۔
وزیر اعلٰی سندھ نے کہا کہ وائرس سے بچنے کا واحد طریقہ یہی ہے کہ لوگ 14 روز تک گھروں میں محدود رہیں۔
انہوں نے خدشہ ظاہر کیا کہ کرونا وائرس مزید پھیلنے کا خدشہ ہے۔ جو لوگ خود علاج کرا سکتے ہیں وہ کرائیں۔ مراد علی شاہ نے خدشہ ظاہر کیا کہ تفتان میں قائم قرنطینہ میں سب کو ایک ساتھ بٹھا دیا گیا۔ کسی ایک شخص کو کرونا وائرس تھا جو باقی افراد کو بھی لگ گیا۔
وزیر اعلٰی سندھ نے کہا کہ سکھر میں اپارٹمنٹس میں قرنطینہ مرکز قائم کیا گیا ہے۔ جہاں 2048 کمرے ہیں، ہر کمرے میں ایک مریض کو رکھا جا رہا ہے۔
سندھ میں کرونا وائرس کے جو کیسز منتقل ہوئے ان میں سے تین افراد وہ ہیں جو ایران سے آئے جب کہ سعودی عرب پانچ، شام سے 11، دبئی سے تین، قطر سے ایک اور بلوچستان سے آنے والے ایک شخص میں کرونا وائرس کی تصدیق ہوئی۔
ایران میں ہلاکتوں کی تعداد 853 ہو گئی
ایران میں کرونا وائرس کے باعث پیر کو مزید 129 افراد ہلاک ہو گئے ہیں۔ جس کے بعد ہلاکتوں کی مجموعی تعداد 853 ہو گئی ہے۔ وائرس سے متاثرہ کیسز کی مجموعی تعداد 15 ہزار تک پہنچ گئی ہے۔
وائرس کے باعث ہلاک ہونے والوں میں ایران کے رہبر اعلٰی کے انتخاب کے لیے قائم مجلس کے رُکن 78 سالہ آیت اللہ ہاشم بھی شامل ہیں۔ ایران کے متعدد اراکین پارلیمنٹ، پاسدران انقلاب کے کمانڈر اور دیگر اہم شخصیات بھی کرونا وائرس کا شکار ہیں۔
ایران کے سرکاری ٹی وی کے مطابق وبا پھوٹنے کے بعد ایک ہی دن میں ہلاک ہونے والے کی یہ سب سے زیادہ تعداد ہے۔ کرونا وائرس کا پھیلاؤ روکنے کے لیے لبنان کی حکومت نے لاک ڈاؤن کا اعلان کر دیا ہے جب کہ عراقی حکومت بھی کرفیوں کے نفاذ پر غور کر رہی ہے۔ عراق میں وزارتِ صحت کے حکام نے کرونا وائرس سے نو ہلاکتوں کی تصدیق کی ہے جب کہ ملک بھر میں کیسز کی مجموعی تعداد 124 تک پہنچ گئی ہے۔