امریکہ کے سنہری دور کا ابھی صرف آغاز ہے: صدر ڈونلڈ ٹرمپ

صدر ٹرمپ نے مشترکہ اجلاس کے خطاب کے اختتام پر کہا کہ "امریکہ کے سنہری دور کا ابھی صرف آغاز ہے۔"

ان کے خطاب کے اختتام پر ری پبلکن قانون سازوں نے کھڑے ہو کر خوشی کا اظہار کیا اور 'فائٹ! فائٹ! فائٹ!' کے نعرے لگاتے ہوئے ہوا میں ہاتھ بلند کیے۔

اس موقع پر ڈیموکریٹس اراکین تیزی سے چیمبر سے باہر چلے گئے اور ری پبلکن اراکین صدر سے مصافحہ کرنے لگے۔

امریکہ کے صدر ڈونلڈ ٹرمپ نے مشترکہ اجلاس سے خطاب کے دوران پانامہ کینال کو دوبارہ حاصل کرنے کے عزم کا اظہار بھی کیا۔

صدر ٹرمپ نے کہا کہ ان کی حکومت پانامہ کینال کو واپس حاصل کرے گی اور ہم نے اس پر پہلے ہی کام شروع کر دیا ہے۔صدر ٹرمپ کے بقول ہم نے یہ کینال چین کو نہیں پانامہ کو دیا تھا اور ہم اسے واپس لے رہے ہیں۔

انہوں نے کہا کہ امریکیوں نے پانامہ کینال کو دوسروں کے لیے نہیں بلکہ امریکیوں کے لیے بنایا تھا۔ لیکن دیگر لوگ اسے استعمال کر سکتے ہیں۔

صدر ٹرمپ نے مشترکہ اجلاس سے خطاب کے دوران یوکرین کے صدر ولودیمیر زیلنسکی سے ملنے والے خط کا ذکر بھی کیا۔

صدر ٹرمپ کے بقول انہیں صدر زیلنسکی کی طرف سے ایک اہم خط موصول ہوا ہے۔ جس میں کہا گیا ہے کہ یوکرین مذاکرات کی میز پر آنے کو تیار ہے تاکہ امن لایا جا سکے۔

صدر ٹرمپ کا کہنا تھا کہ "ہماری روس کے ساتھ سنجیدہ بات چیت ہوئی ہے اور ہمیں مضبوط اشارے ملے ہیں کہ وہ امن کے لیے تیار ہیں۔"