پاکستان کے صوبے بلوچستان کے ضلع لسبیلہ میں ریلیف آپریشن کے دوران لاپتا ہونے والے فوجی ہیلی کاپٹر کا ملبہ مل گیا ہے۔ واقعے میں کور کمانڈر کوئٹہ لیفٹننٹ جنرل سرفراز علی سمیت چھ فوجی افسران ہلاک ہوئے ہیں۔
پاکستان فوج کے شعبہ تعلقات عامہ (آئی ایس پی آر) نے ایک ٹویٹ میں کہا کہ ''بدقسمت ہیلی کاپٹر کا ملبہ لسبیلہ کے علاقے وندر کے موسیٰ گوٹھ سے مل گیا ہے۔''
آئی ایس پی آر کے مطابق اس واقعے میں لیفٹننٹ جنرل سرفراز علی سمیت تمام چھ افسران اور اہلکار جان کی بازی ہار گئے ہیں۔
فوجی ترجمان کا کہنا ہے کہ ابتدائی تحقیقات کے مطابق حادثہ خراب موسم کے باعث پیش آیا۔
The wreckage of unfortunate hel which was on flood relief ops found in Musa Goth, Windar, Lasbela. All 6 offrs & sldrs incl Lt Gen Sarfraz Ali embraced shahadat. اِنّا لِلَّٰهِ وَإِنَّا إِلَيْهِ رَاجِعُونَAccident occurred due to bad weather as per initial investigations . DTF pic.twitter.com/dnyano2vqC
— DG ISPR (@OfficialDGISPR) August 2, 2022
وزیرِ اعظم شہباز شریف نے ہیلی کاپٹر حادثے میں اعلٰی فوج افسران کی جانیں جانے پر افسوس کا اظہار کرتے ہوئے کہا کہ یہ تمام افراد سیلاب زدگان کی مدد کے لیے سرگرم تھے۔
اُن کا کہنا تھا کہ پوری قوم پاک فوج کے ان بہادر سپوتوں کی شہادت پر افسردہ ہے۔
Nation is deeply grieved on the martyrdom of Lt. General Sarfraz Ali & 5 other officers of Pakistan Army. They were doing a sacred duty of providing relief to flood affectees. Will remain eternally indebted to these sons of soil. My heartfelt condolences to the bereaved families!
— Shehbaz Sharif (@CMShehbaz) August 2, 2022
اس سے قبل ایس ایچ او ساکران پولیس اسٹیشن نبی بخش نے وائس آف امریکہ کے نمائندے مرتضیٰ زہرہ کو تصدیق کی تھی کہ گزشتہ شب لسبیلہ کے علاقے حاجی موسیٰ گوٹھ کے قریب سے ہیلی کاپٹر کا ملبہ ملا ہے۔
واضح رہے کہ پیر کو پاکستان فوج کے ترجمان نے بتایا تھا کہ بلوچستان میں ریلیف آپریشن میں مصروف ایک فوجی ہیلی کاپٹر لاپتا ہوگیا ہے۔ جس میں کور کمانڈر 12 کور (کوئٹہ) سمیت چھ افراد سوار تھے۔
وائس آف امریکہ کے نمائندے مرتضیٰ زہری سے گفتگو کرتے ہوئے ایس ایچ او کا کہنا تھا کہ ہیلی کاپٹر کے قریب سے دو لاشیں ملی ہیں جن کی شناخت اب تک نہیں ہوسکی ہے۔ البتہ دیگر افراد کی تلاش جاری ہے۔
ان کے بقول مقامی چراوہوں نے پولیس کو بتایا ہے کہ حاجی موسیٰ گوٹھ میں رات کے وقت ایک دھماکے کی آواز سنی گئی تھی جو ہیلی کاپٹر تباہ ہونے کی آواز تھی۔
ان کا کہنا تھا کہ پولیس اور دیگر فورسز مقامی افراد کی مدد سے اس مقام پر پہنچنے میں کامیاب ہوئی۔
ایس ایچ او کے مطابق سیکیورٹی فورسز نے گزشتہ شب لاپتا ہونے والے ہیلی کاپٹر کی تلاش شروع کی تھی اور اس آپریشن میں پاکستان فوج کے دو ہیلی کاپٹر بھی حصہ لے رہے تھے۔
اس سے قبل پیر کو ترجمان پاکستان فوج نے بتایا تھا کہ آرمی ایوی ایشن کا ہیلی کاپٹر بلوچستان کے علاقے لسبیلہ میں سیلاب زدگان کی امدادی کارروائیوں میں مصروف تھا کہ اس ایئرٹریفک کنٹرول سے رابطہ منقطع ہوگیا۔
انہوں نے کہا تھا کہ کور کمانڈر بلوچستان میں امدادی سرگرمیوں کی نگرانی کر رہے تھے۔
اگرچہ فوج کی جانب سے ہیلی کاپٹر میں موجود افراد کی شناخت نہیں بتائی گئی تھی مگر سوشل میڈیا پر یہ اطلاعات زیرِ گردش تھی کہ اس میں کور کمانڈر کوئٹہ لیفٹیننٹ جنرل سرفراز کے علاوہ دو میجر رینک کے پائلٹس، دو بریگیڈیئر اور ایک لانس نائیک موجود تھے۔
کورکمانڈر کوئٹہ لیفٹننٹ جنرل سرفراز علی پاکستان فوج کی اہم کورکی کمان کر رہے تھے۔ اس سے پہلے وہ ملٹری انٹیلی جنس کے سربراہ بھی رہ چکے ہیں۔