اس سال کے ٹینس گرینڈ سلیم مقابلے ومبلڈن کو کرونا وائرس کی وجہ سے منسوخ کردیا گیا ہے۔ یہ ٹورنامنٹ 29 جون سے 12 جولائی تک کھیلا جانا تھا۔ دوسری جنگ عظیم کے بعد یہ پہلا موقع ہے کہ ومبلڈن کو منسوخ کیا گیا ہے۔
It is with great regret that the AELTC has today decided that The Championships 2020 will be cancelled due to public health concerns linked to the coronavirus epidemic.The 134th Championships will instead be staged from 28 June to 11 July 2021.https://t.co/c0QV2ymGAt
— Wimbledon (@Wimbledon) April 1, 2020
گراس کورٹ پر ومبلڈن کے مقابلے ہر سال لندن میں منعقد کیے جاتے ہیں۔ ان سے پہلے مئی میں شیڈول گرینڈ سلیم فرنچ اوپن کو ستمبر تک ملتوی کردیا گیا تھا۔لیکن ومبلڈن کے منتظمین نے ایونٹ کو ملتوی کرنے کے بجائے منسوخ کرنے کا فیصلہ کیا۔
ومبلڈن کی انتظامیہ کے پاس اپریل کے آخر تک صورتحال دیکھ کر فیصلہ کرنے کا وقت تھا لیکن اس نے آج ہی اعلان کردیا۔ ومبلڈن کے منسوخ ہونے سے منتظمین کو 20 کروڑ پاؤنڈ کا نقصان ہوگا جو انشورنس سے پورا کیا جائے گا۔
برطانیہ میں بدھ تک کرونا وائرس کے لگ بھگ 30 ہزار کیس سامنے آچکے تھے جبکہ 2300 سے زیادہ افراد ہلاک ہوئے تھے۔ گزشتہ 24 گھنٹوں میں ساڑھے پانچ سو اموات ایک دن میں سب سے زیادہ جانی نقصان ہے۔
I’m Shooked https://t.co/dS0cNcCdm0
— Serena Williams (@serenawilliams) April 1, 2020
آل انگلینڈ لان ٹینس کلب کے چئیرمین ایان ہیوٹ نے کہا کہ یہ فیصلہ آسان نہیں تھا لیکن ہمیں عوام اور ٹینس سے محبت کرنے والوں کی صحت کی خاطر ایسا کرنا پڑرہا ہے۔
ٹینس کے کھلاڑیوں نے ومبلڈن کے منسوخ ہونے پر افسوس کا اظہار کیا ہے۔ شائقین کا دکھ ان سے سوا ہے جو کئی ماہ پہلے سے مہنگے ٹکٹ خرید لیتے ہیں۔ ایک دن میں 40 ہزار تماشائی میچ دیکھنے آجاتے ہیں۔
Devastated https://t.co/Fg2c1EuTQY pic.twitter.com/cm1wE2VwIp
— Roger Federer (@rogerfederer) April 1, 2020
اس سال کا ایونٹ منسوخ ہونے سے سربیا کے نوواک جوکووچ اور رومانیہ کی سیمونا ہیلپ مزید ایک سال چیمپین رہیں گے جنھوں نے گزشتہ سال مردوں اور خواتین کے سنگلز مقابلے جیتے تھے۔
کرونا وائرس کی وجہ سے دنیا بھر میں کھیلوں کی سرگرمیاں معطل ہیں اور اولمپک گیمز اور یورو فٹبال جیسے بڑے ایونٹس کو ایک سال کے لیے موخر کردیا گیا ہے۔ پیشہ ور ٹینس کے تمام مقابلے 13 جولائی تک روکے گئے ہیں لیکن کسی کو بھی یقین نہیں کہ اس تاریخ کو کھیل دوبارہ شروع ہوسکے گا۔
سابق ومبلڈن چیمپین امیلی مورسیمو نے چند دن پہلے ایک ٹوئیٹ میں ٹینس کے مستقبل کی طرف اشارہ کردیا تھا۔ انھوں نے لکھا تھا، نو ویکسین، نو ٹینس۔