امریکی بحریہ کے ایک اہلکار نے ریاست ہوائی کے تاریخی فوجی اڈے 'پرل ہاربر' میں فائرنگ کر کے دو افراد کو ہلاک کر دیا ہے۔ بعد ازاں بندوق بردار شخص نے خود کو بھی گولی مار لی۔
خبر رساں ادارے 'رائٹرز' کے مطابق فائرنگ کا واقعہ بدھ کی شب اُس وقت پیش آیا جب امریکی نیوی کی وردی میں ملبوس شخص نے پرل ہاربر میں اچانک فائرنگ شروع کر دی۔
فوجی حکام کے مطابق بندوق بردار شخص نے لوگوں پر فائرنگ کے بعد خود کو بھی گولی مار کر ہلاک کر لیا۔ واقعے میں تین افراد ہلاک اور ایک زخمی ہوا ہے۔
البتہ حکام نے واقعے میں ہلاک ہونے والوں اور امریکی بحریہ کے اہلکار کی شناخت ظاہر نہیں کی ہے۔
Base security, Navy investigative services and other agencies are investigating the incident. The names of the victims will not be released until the next of kin have been notified. 5/5
— Joint Base Pearl Harbor-Hickam (@JointBasePHH) December 5, 2019
ریجنل کمانڈر ایڈمرل رابرٹ چیڈوک نے دو سویلین کی ہلاکت کی تصدیق کرتے ہوئے بتایا کہ حملہ آور امریکی بحریہ کا اہلکار ہے جو اپنی ہی فائرنگ سے خود بھی ہلاک ہو گیا ہے۔
اس سے قبل پرل ہاربر کے حکام نے ٹوئٹر پر کہا تھا کہ ہلاک ہونے والے تینوں افراد سویلین اور امریکی محکمۂ دفاع کے ملازم تھے۔
فوجی حکام نے نیوز بریفنگ کے دوران بتایا کہ زخمی ہونے والا شخص اسپتال میں زیرِ علاج ہے اور اس کی حالت اب خطرے سے باہر ہے۔
Joint Base Pearl Harbor-Hickam security forces responded to a reported shooting at a dry dock at @PHNSYIMF. Initial reports indicate the shooter & two shipyard civilian employees are deceased, & one shipyard civilian is in stable condition at a local hospital. 1/5 #PearlHarbor
— Joint Base Pearl Harbor-Hickam (@JointBasePHH) December 5, 2019
دوسری جانب ہوائی کے گورنر ڈیوڈ آئج نے ٹوئٹر پر اپنے بیان میں کہا ہے کہ وہ دکھ کی اس گھڑی میں ہوائی کے لوگوں کے ساتھ کھڑے ہیں۔ انہوں نے کہا کہ اس واقعے پر ہمارے دل دکھی ہیں اور ہمیں ان لوگوں کا احساس بھی ہے جو فائرنگ سے متاثر ہوئے ہیں۔
گورنر نے کہا کہ واقعے سے متعلق مزید اطلاعات موصول ہو رہی ہیں اور سیکیورٹی فورسز تحقیقات جاری رکھے ہوئے ہیں۔
I join in solidarity with the people of Hawai‘i as we express our heartbreak over this tragedy and concern for those affected by the shooting. Details are still emerging as security forces at Joint Base Pearl Harbor Hickam investigate. #PearlHarbor
— Governor David Ige (@GovHawaii) December 5, 2019
واقعے سے متعلق وائٹ ہاؤس کے ترجمان نے کہا ہے کہ صدر ڈونلڈ ٹرمپ کو فائرنگ کے واقعے سے متعلق آگاہ کر دیا گیا ہے اور وہ صورتِ حال پر نظر رکھے ہوئے ہیں۔
ہوائی کے ایک مقامی ٹی وی ہوائی نیوز کو انٹرویو دیتے ہوئے ایک عینی شاہد نے بتایا کہ اس نے فائرنگ کی آواز سنی اور دیکھا کہ ایک بندوق بردار شخص نے اپنے سر پر بندوق رکھ کر خود کو گولی مار لی۔
عینی شاہد کا کہنا تھا کہ بندوق بردار شخص امریکی بحریہ کے یونی فارم میں ملبوس تھا۔
خیال رہے کہ یہ واقعہ ایسے وقت پیش آیا ہے جب پرل ہاربر پر 7 دسمبر 1941 کو ہونے والے حملے کو 78 برس مکمل ہونے میں صرف تین دن باقی ہیں۔ اس روز جاپان نے امریکی بحریہ کے اس اڈے پر حملہ کیا تھا اور امریکہ جاپان کے خلاف جنگ کا اعلان کرتے ہوئے جنگ عظیم دوئم میں شامل ہو گیا تھا۔