وائٹ ہاؤس کا کہنا ہے کہ وہ تمام غیر قانونی تارکین وطن کو ان شہروں میں بھیجنے پر غور کر رہا ہے جو انہیں پناہ دیتے ہیں اور انہیں ڈیپورٹ ہونے سے بچاتے رہے ہیں۔ تاہم سرکاری اداروں کا کہنا ہے کہ ایسا کرنا عملی طور پر ممکن نہیں ہے اور اس مقصد کے لیے کسی طرح کے فنڈز نہیں رکھے گئے۔
وائٹ ہاؤس کی پریس سیکرٹری سارہ سینڈرز نے اتوار کو فاکس نیوز سے بات کرتے ہوئے کہا کہ ‘‘ہم تمام امکانات کو سامنے رکھ رہے ہیں جب تک کہ ڈیموکریٹ پارٹی یہ تسلیم نہیں کر لیتی کہ سرحد پر ایک بحرانی کیفیت جاری ہے۔’’
ہفتے کے روز صدر ٹرمپ نے اپنے ایک ٹوئٹ میں کہا تھا کہ ‘‘ڈیموکریٹس کو جلد از جلد امیگریشن کے قوانین تبدیل کرنے چاہیئیں۔ ورنہ مرکزی حکومت کے قوانین کو اہمیت نہ دینے والے شہروں کو تمام غیرقانونی تارکین وطن کو اپنے پاس لے لینا چاہیے جن میں گینگ کے ارکان، منشیات کا کاروبار کرنے والے، انسانی اسمگلر اور ہر قسم اور سائز کے جرائم پیشہ افراد شامل ہیں۔ ان شہروں کو اپنے قوانین فوری تبدیل کرنے چاہیئیں۔’’
Democrats must change the Immigration Laws FAST. If not, Sanctuary Cities must immediately ACT to take care of the Illegal Immigrants - and this includes Gang Members, Drug Dealers, Human Traffickers, and Criminals of all shapes, sizes and kinds. CHANGE THE LAWS NOW!
— Donald J. Trump (@realDonaldTrump) April 14, 2019
ایک اور ٹوئٹ میں انہوں نے لکھا کہ ‘‘امریکہ کے پاس یہ مکمل اختیار ہے کہ ان تمام غیر قانونی تارکین وطن کو انہیں محفوظ ٹھکانے مہیا کرنے والے شہروں میں بھیج دے۔ ہم مطالبہ کرتے ہیں کہ ان کا اعلیٰ پیمانے پر خیال رکھا جائے، خاص طور پر ریاست کیلی فورنیا، جو اپنی بدانتظامی اور زیادہ ٹیکسوں کی وجہ سے شہرت رکھتی ہے۔’’
Just out: The USA has the absolute legal right to have apprehended illegal immigrants transferred to Sanctuary Cities. We hereby demand that they be taken care of at the highest level, especially by the State of California, which is well known or its poor management & high taxes!
— Donald J. Trump (@realDonaldTrump) April 14, 2019
ریاست واشنگٹن کے گورنر نے جے انزلی نے اس کے جواب میں کہا ہے کہ ان کی ریاست ان تمام لوگوں کو خوش آمدید کہتی ہے جو پناہ کے حصول سے متعلق عدالتی کارروائی کا انتظار کر رہے ہیں۔
ان کا کہنا تھا کہ کسی کو اس بات سے ڈرایا نہیں جا سکتا ہے جس سے وہ ڈرتا ہی نہ ہو، اور ہم اپنی ریاست میں تنوع سے نہیں ڈرتے۔’’
انہوں نے تارکین وطن کے مسئلے سے متعلق صدر ٹرمپ کے طرزعمل پر نکتہ چینی کرتے ہوئے کہا کہ ایسا نظام بنانا چاہئے جو پناہ سے متعلق زیادہ سے زیادہ مقدمات کو نمٹا سکے اور انہیں شہریت دے سکے۔ ان کا کہنا تھا کہ ہمیں تارکین وطن کو قبول کرنا چاہئے کیوں کہ ہم انسانیت پر یقین رکھنے والی قوم ہیں۔’’
امریکہ میں سرحد کے قریب پناہ کے حصول کے لیے ہزاروں افراد مقیم ہیں اور اب حکام کے پاس انہیں دینے کو بستر کم پڑ گئے ہیں۔ اس صورت حال میں حکام بہت سے افراد کو اس وعدے پر ملک میں داخلے کی اجازت دے رہے ہیں کہ وہ اپنے مقدمے کی تاریخ پر حاضر ہو جائیں۔
ہوم لینڈ سیکورٹی کا کہنا ہے کہ کانگریس نے غیرقانونی تارکین وطن کو سرحد سے انہیں پناہ دینے والے شہروں میں منتقلی کے لیے فنڈ مختص نہیں کئے ہیں جب کہ کسٹم انفورسمنٹ ایجنسی کا کہنا ہے کہ یہ نیا آئیڈیا ‘‘غیر ضروری بوجھ ہو گا۔’’
ریپبلکن پارٹی کے ایک اہم رہنما لنزی گراہم نے فاکس نیوز سے بات کرتے ہوئے کہا ہے کہ کانگریس کی حالیہ چھٹیوں کے بعد وہ ایک ایسا قانون لائیں گے جس کے بعد حکام کو چھوٹے بچوں کو بھی 20 روز سے زیادہ عرصے تک حراست میں رکھنے کا اختیار مل جائے گا۔
انہوں نے کہا کہ پناہ کے حصول سے متعلق قوانین کو سخت کرنے کی ضرورت ہے جس کے تحت تارکین وطن کے بچوں کو بھی اپنے ملکوں میں واپس بھیجنے کی گنجائش ہو۔
انہوں نے کہا کہ ‘‘عام تصور یہ ہے کہ اگر کوئی چھوٹے بچوں کے ساتھ امریکہ کی سرزمین پر اپنا قدم رکھ دے تو کوئی بھی اسے واپس نہیں بھیج سکتا۔ ہمیں اس بیانیئے کو بدلنا ہو گا۔ ہمیں سرحد پر فوج تعینات کرنی چاہیے۔ ہمیں یہ قوانین بدلنے ہوں گے۔