سعودی عرب نے معاشی مدد کے طور پر پاکستان کے مرکزی بینک میں جمع کرائے گئے تین ارب ڈالر کی مدت میں توسیع کردی ہے۔
جمعے کو ترقی پذیر ممالک کی مالی معاونت کے لیے قائم کیے گئے سعودی عرب کے ادارے سعودی ڈیولپمنٹ فنڈ نے سوشل میڈیا پر جاری کیے گئے اپنے بیان میں پاکستان کے مرکزی بینک میں جمع کرائے گئے فنڈ کی مدت میں توسیع کا اعلان کیا ہے۔
بیان کے مطابق خادم الحرمین الشریفین سلمان بن عبدالعزیز اور ولی عہد محمد بن سلمان کی ہدایت پر عمل کرتے ہوئے اسٹیٹ بینک آف پاکستان میں رکھے گئے تین ارب ڈالر کی مدت میں اضافہ کردیا گیا ہے۔
بیان میں بتایا گیا ہے کہ اسٹیٹ بینک میں جمع کیے گئے تین ارب ڈالر کی رقم کی مدت میں توسیع نومبر 2021 میں ہونے والے معاہدے کے تحت کی گئی ہے۔
In implementation of the directives of the Custodian of the Two Holy Mosques & HRH Crown Prince & Prime Minister & in support of the economy of the Islamic Republic of #Pakistan; #SFD extends the term of the $3 billion deposit provided by #KSA to the @StateBank_Pak. pic.twitter.com/0VACcJo2m9
— الصندوق السعودي للتنمية (@SaudiFund_Dev) December 2, 2022
اس معاہدےکے تحت سعودی عرب نے اسلامی جمہوریہ پاکستان کو ایکسٹرنل سیکٹر کے مسائل اور پائیدار معاشی ترقی کے اہداف حاصل کرنے کے لیے بطور معاونت یہ رقم اسٹیٹ بینک میں رکھوائی تھی۔
واضح رہے کہ پاکستان کو جاری کھاتوں کے خسارے اور زرِ مبادلہ کے ذخائر میں کمی جیسے چیلنجز کا سامنا رہا ہے جس کی وجہ سے مقامی سطح پر روپے کی قدر میں گراوٹ، بڑھتی ہوئی مہنگائی اور بین الاقوامی ادائیگوں کے لیے حکومت کو مشکلات کا سامنا رہا ہے۔