بھارت کی ریاست مدھیا پردیش میں ایک فیملی کو 34 ارب روپے کا بجلی کا بل موصول ہوا۔ یہ بل کئی برسوں کا نہیں بلکہ ایک ماہ میں استعمال کی گئی بجلی کا تھا جسے دیکھ کر اہلِ خانہ کی طبیعت خراب ہو گئی۔
بھارتی اخبار 'ہندوستان ٹائمز' کے مطابق یہ واقعہ گوالیار شہر کی شیوا ویہار کالونی میں رہائش پذیر سنجیو کانکانے کے گھر پیش اس وقت پیش آیا جب بجلی کے محکمے نے ان کے گھر 20 جولائی کو بجلی کا بل ارسال کیا۔
چونتیس ارب روپے کا بجلی کا بل دیکھ کر سنجیو کی اہلیہ پریانکا گپتا اور سسر راجیندرا پرساد گپتا کو اسپتال لے جایا گیا۔
سنجیو کے مطابق بجلی کا بل دیکھ کر ان کی اہلیہ کی طبیعت خراب ہو گئی جب کہ سسر کا بلڈ پریشر انتہائی بلند ہو گیا تھا۔
رپورٹس کے مطابق بجلی کے محکمے نے موبائل ایس ایم ایس کے ذریعے اس خاندان کو آگاہ کیا تھا کہ ان کے بجلی کا بل 34 ارب 19 کروڑ 53 لاکھ 25 ہزار 293 روپے آیا ہے۔
एमपी अजब है और बिजली कंपनियां तो गजबई हैं.ग्वालियर में गुप्ता दंपत्ति को भेजा "3400 करोड़" रुपए का बिल,पत्नी का बढ़ा बीपी,ससुर अस्पताल में भर्ती.@PradhumanGwl pic.twitter.com/fouKqR40fE
— Anurag Amitabhانوراگ امیتابھअनुराग अमिताभ (@anuragamitabh) July 26, 2022
سنجیو کانکانے نے بتایا کہ انہوں نے بجلی کے محکمے کے آن لائن پورٹل پر بل دوبارہ دیکھا تو وہاں بھی یہ رقم درج تھی۔
ریاستی وزیر پردیمان سنگھ تومر نے یہ معاملہ ذرائع ابلاغ میں آنے پر فوری طور پر تحقیقات کا حکم دیا۔ ان کا کہنا تھا کہ تحقیقات میں سامنے آیا کہ بجلی کے محکمے کے ملازمین کی جانب سے بل کا ڈیٹا درج کرتے وقت رقم کی جگہ صارف نمبر لکھ دیا گیا تھا، جس سے یہ سارا معاملہ بنا۔
ریاست کے وزیرِ توانائی پردیمان سنگھ تومر کا کہنا تھا کہ اس قدر بڑی رقم کا بل غلطی سے جاری ہوا تھا اور یہ غلطی درست کرتے ہوئے متاثرہ خاندان کو نیا بل جاری کر دیا گیا ہے جو 1300 روپے کا ہے۔
انہوں نے بتایا کہ غلطی کے مرتکب بجلی کے محکمے کے دو ملازمین کے خلاف کارروائی بھی کی گئی ہے۔
ریاستی وزیر نے خاندان کو جاری کیا گیا نیا بل سوشل میڈیا پر بھی شیئر کیا ہے جس میں بل 1358 روپے ہو گیا ہے جب کہ بل سے واضح ہوتا ہے کہ اس خاندان نے گزشتہ بل بھی جمع نہیں کرایا اور اس پر لگ بھگ ساڑھے سات ہزار روپے کا بل واجب الادا ہے۔
आदरणीय पत्रकार महोदय जी यह भी देखिए, बिल same day पर सुधार दिया गया था, लाहपरवाही बरतने वालो के खिलाफ उचित कार्यवाही भी हुई है। https://t.co/XuBUoFgxFv pic.twitter.com/tjL2cv9Sis
— Pradhuman Singh Tomar (@PradhumanGwl) July 26, 2022
اس کے ساتھ ساتھ انہوں نے ملازمین کے خلاف کارروائی کا اعلان کرتے ہوئے بتایا کہ ایک ملازم کو نوکری سے نکال دیا گیا ہے جب کہ دوسرے کو معطل کر دیا گیا ہے۔
اس کے ساتھ ساتھ ایک جونیئر انجینئر کو بھی اظہار وجوہ کا نوٹس جاری کیا گیا ہے۔
بجلی کے محکمے کے سربراہ نیتن مانگلک کا کہنا تھا کہ یہ ایک انسانی غلطی تھی جس کو درست کر لیا گیا تھا۔