عمران خان اٹک جیل منتقل؛ احتجاج کرنے والے پی ٹی آئی کے متعدد کارکن گرفتار

اسلام آباد کی سیشن عدالت نے ہفتے کو توشہ خانہ کیس کا فیصلہ سناتے ہوئے عمران خان کو تین سال قید اور ایک لاکھ روپے جرمانے کا حکم سنایا تھا۔ عدالتی فیصلے کے بعد پنجاب پولیس نے لاہور میں عمران خان کی رہائش گاہ زمان پارک سے انہیں حراست میں لیا جس کے بعد انہیں سخت سیکیورٹی میں اٹک جیل پہنچا دیا۔

پاکستان تحریکِ انصاف نے پارٹی چیئرمین اور سابق وزیرِ اعظم عمران خان کی گرفتاری کے خلاف ملک گیر پرامن احتجاج کی کال دی ہے۔ صوبۂ خیبر پختونخوا میں امن و امان کی صورتِ حال خراب ہونے کے خدشے کے پیشِ نظر کئی اضلاع میں دفعہ 144 بھی نافذ کر دی گئی ہے۔

عمران خان کی گرفتاری کے بعد پی ٹی آئی کے وائس چیئرمین شاہ محمود قریشی کی سربراہی میں ہفتے کو پارٹی کی کور کمیٹی کا اجلاس ہوا جس میں اسلام آباد کی سیشن عدالت کے فیصلے کے بعد پیدا ہونے والی صورتِ حال کا جائزہ لیا گیا۔

پی ٹی آئی نے ایک بیان میں کہا ہے کہ تحریک انصاف اپنے چیئرمین کی تلقین و ہدایات کی روشنی میں مکمل طور پر پرامن اور آئین و قانون کے دائرے میں رہ کر احتجاج کرے گی۔

پی ٹی آئی کی کور کمیٹی نے کارکنوں کو ہدایت کی ہے کہ وہ عوام کے ساتھ مل کر مکمل نظم و ضبط اور آئین و قانون کے دائرے میں رہ کر احتجاج کریں۔

اسلام آباد کی سیشن عدالت نے ہفتے کو توشہ خانہ کیس کا فیصلہ سناتے ہوئے عمران خان کو تین سال قید اور ایک لاکھ روپے جرمانے کی سزا سنائی ہے۔ عدالتی فیصلے کے بعد سابق وزیرِ اعظم کو لاہور میں ان کی رہائش گاہ زمان پارک سے گرفتار کیا گیا ہے۔

امکان ظاہر کیا جار ہا ہے کہ عمران خان کو اڈیالہ جیل میں رکھا جائے گا جہاں سیکیورٹی سخت کر دی گئی ہے۔

خیبر پختونخوا کے ضلع مردان میں پولیس نے دفعہ 144 کی خلاف ورزی کے الزام میں پی ٹی آئی کے 20 کارکنوں کو حراست میں لے لیا ہے۔ گرفتار افراد میں پی ٹی آئی کے سابق رکنِ صوبائی اسمبلی کے دو صاحبزادے عارف اور طارق بھی شامل ہیں۔

پولیس نے گرفتار کارکنوں کو نامعلوم مقام پر منتقل کر دیا ہے۔