پاکستان مسلم لیگ (ن) اور وفاقی وزیر داخلہ رانا ثنا اللہ کا کہنا ہے کہ اگر عمران خان نے فیصلہ کر لیا ہے تو اسمبلیاں ابھی تحلیل کریں۔ دونوں وزرائے اعلیٰ ان کے ساتھ بیٹھے ہوئے ہیں، دستخط کریں اور بھیج دیں۔
نجی نشریاتی ادارے ’جیو نیوز‘ کے پروگرام ’نیا پاکستان‘ میں گفتگو کرتے ہوئے رانا ثنااللہ کا کہنا تھا کہ اسمبلیاں تحلیل ہونے کے بعد فوری انتخابات کا حامی ہوں لیکن ان کے بقول پارٹی میں دوسری رائے بھی ہے۔
پاکستان تحریک انصاف (پی ٹی آئی) کے چیئرمین اور سابق وزیرِ اعظم عمران خان نے ہفتے کو لاہور کے لبرٹی چوک میں خطاب میں پنجاب اور خیبر پختونخوا کی اسمبلیاں رواں ماہ 23 دسمبر کو تحلیل کرنے کا اعلان کیا تھا۔
SEE ALSO: عمران خان کا 23 دسمبر کو پنجاب اور خیبرپختونخوا اسمبلی تحلیل کرنے کا اعلانعمران خان کا ویڈیو لنک کے ذریعے کیے گئے خطاب میں کہنا تھا کہ انہوں نے ملک کی خاطر دونوں حکومتیں قربان کرنے کا فیصلہ کیا ہے۔
انہوں نے اعلان کیا کہ قومی اسمبلی کے 123 اراکین بھی اسپیکر کے سامنے پیش ہو کر استعفی منظور کرنے کا کہیں گے۔
ہفتے کو لاہور میں اپنی رہائش گاہ سے ویڈیو لنک کے ذریعے لبرٹی چوک سمیت ملک کے مختلف شہروں میں خطاب کرتے ہوئے عمران خان کا کہنا تھا کہ ان اسمبلیوں کی تحلیل کے بعد 66 فی صد پاکستان الیکشن کے لیے تیار ہو گا لہذٰا عقل تو یہ کہتی ہے کہ ملک میں عام انتخابات کرا دیے جائیں۔
عمران خان کے اعلان پر ردِ عمل دیتے ہوئے وفاقی وزیرِ داخلہ رانا ثنا اللہ نے ٹی وی انٹرویو میں مزید کہا کہ صوبوں میں الیکشن میں جایا جائے یا نہ جایا جائے، اس کا حتمی فیصلہ نواز شریف کریں گے۔
اگلے جمعے 23 دسمبر کو پنجاب اور کے پی کے دونوں اسمبلیاں تحلیل کردی جائیں گی۔ چئیرمین عمران خان #لیکر_رہیں_گے_آزادی pic.twitter.com/LtBZdhnqkc
— PTI (@PTIofficial) December 17, 2022
ان کا کہنا تھا چوہدری پرویز الہیٰ کے پاس اب اسمبلی توڑنے کے علاوہ کوئی آپشن نہیں اور مسلم لیگ (ن) میں اب چوہدری پرویز الہی کے لیے قبولیت نہیں ہے جیسے کہ پہلے تھی۔
رانا ثناء اللہ کے بقول چوہدری پرویز الہیٰ 23 دسمبر تک کوئی نیا داؤ لگائیں گے۔
’عمران خان کے فیصلے سے مطمئن ہیں‘
دوسری طرف وزیرِ اعلٰی پنجاب چوہدری پرویز الہیٰ کا کہنا ہے کہ وہ پہلے دن سے ہی عمران خان کے فیصلے سے مطمئن ہیں۔
میں پہلے دن سے ہی عمران خان کے فیصلے سے مطمئن ہوں اور الحمدللہ سب مطمئن ہیں ۔ عمران خان کے ساتھ میری بڑی پرانی سپورٹ ہے۔
— Ch Parvez Elahi (@ChParvezElahi) December 17, 2022
اتوار کو سوشل میڈیا پر پوسٹ کیے گئے بیان میں چوہدری پرویز الہیٰ کا مزید کہنا تھا کہ عمران خان کے ساتھ ان کی بڑی پرانی سپورٹ ہے۔
’ڈر ہے کہ مسلم لیگ (ن) عوام کی عدالت سے مفرور نہ ہو جائے‘
تحریکِ انصاف کے رہنما فواد چوہدری کا کہنا ہے کہ انہیں امید ہے کہ مسلم لیگ (ن) اب انتخابات سے بھاگنے کے لیے خود یا اپنی سبسڈری الیکشن کمیشن کا استعمال نہیں کرے گی۔
فواد چوہدری کا اتوار کو سوشل میڈیا پر ایک بیان میں کہنا تھا کہ ڈر یہ ہے کہ اپنے پارٹنرز کی مدد سے مسلم لیگ (ن) عوام کی عدالت سے بھی مفرور نہ ہو جائے۔ ان کا پیچھا کیا جائے گا۔
امید ہے نون لیگ اب انتخابات سے بھاگنے کیلئے خود یا اپنی سبسڈری الیکشن کمیشن کا استعمال نہیں کرے گی، ڈر یہ ہے کہ اپنے پارٹنرز کی مدد سے نون لیگ عوام کی عدالت سے بھی مفرور نہ ہو جائے ، ان کا پیچھا کیا جائیگا، جمہوریت میں عوام کو حتمی فیصلوں کا اختیار ہے اس حق کو تسلیم کیا جائے
— Ch Fawad Hussain (@fawadchaudhry) December 18, 2022
عمران خان کے اسمبلیاں توڑنے کے اعلان کے بعد فواد چوہدری کا کہنا تھا کہ پی ڈی ایم کو اسمبلیاں توڑنے کے فیصلے کو خوش آمدید کہنا چاہیے۔
PeeDeeEmm کو اسمبلیاں توڑنے کے فیصلے کو خوش آمدید کہنا چاہئیے نواز شریف کو واپس بلائیں اور کمپین پلان کریں ، جس گھبراہٹ اور سراسمیگی کا اظہار PeeDeeEmm کے ترجمان کر رہے ہیں اس سے تو لگتا ہے وہ عوام سے شدید خوفزدہ ہیں
— Ch Fawad Hussain (@fawadchaudhry) December 17, 2022
ان کامزید کہنا تھا کہ نواز شریف کو واپس بلائیں اور انتخابی مہم کی تیاری کریں۔
’عمران خان نے سارے سیاست دانوں کو چت کر دیا‘
تحریکِ انصاف کی ایک اور اتحادی جماعت عوامی مسلم لیگ کے سربراہ شیخ رشید کا عمران خان کے فیصلے پر کہنا ہے کہ 560 سے زائد سیٹوں پر انتخابات ملک کی سیاست کی درو دیوار ہلا دیں گے۔ جو کہتے تھے وہ اسمبلیاں نہیں توڑے گا، ان کو منہ کی کھانی پڑی۔
560سےزائدسیٹوں پرانتخابات ملک کی سیاست کی درودیوارہلادیں گےجوکہتےتھےوہ اسمبلیاں نہیں توڑےگااُن کومنہ کی کھانی پڑی اکیلےعمران خان نےسارےسیاست دانوں کوچت کردیاجواپنےآپ کوگروسمجھتےتھےجوعمران خان کودیوارکےساتھ لگاناچاہتےتھےوه ہی دیواراُن پرگرگئی ہےالیکشن میں ہررکاوٹ حکومت کےگلےپڑے گی
— Sheikh Rashid Ahmed (@ShkhRasheed) December 18, 2022
شیخ رشید کا اتوار کو ایک بیان میں کہنا تھا کہ عمران خان نے سارے سیاست دانوں کو چت کر دیا۔ الیکشن میں ہر رکاوٹ حکومت کے گلے پڑے گی۔
حکومت عوام کی حالت پےرحم کرےرکاواٹیں مت کھڑی کرےاورنوازشریف کوبلا ئے نوازشریف نیوائیرلندن میں منائیں بیماری کابہانہ ختم کریں پاکستان آئیںKPK میں دوتہائی اکثریت ہےپنجاب میں سپریم کورٹ کافیصلہ موجودہےاس لیےتحریک عدم اعتماد نہیں آسکتی نہ ہی گورنرراج لگ سکتاہےقوم الیکشن کی تیاری کرے
— Sheikh Rashid Ahmed (@ShkhRasheed) December 18, 2022
ان کا مزید کہنا ہے کہ خیبر پختونخوا میں دو تہائی اکثریت ہے۔ پنجاب میں سپریم کورٹ کا فیصلہ موجود ہے۔ اس لیے تحریک عدم اعتماد نہیں آ سکتی نہ ہی ان کے بقول گورنر راج لگ سکتا ہے۔