پاکستان تحریک انصاف کے چئیرمین عمران خان نے کراچی سے پارٹی کے سینئر رہنما عمران اسماعیل کو نیا گورنر سندھ بنانے کی منظوری دے دی ہے۔
اس بات کا اعلان عمران خان کی طرف سے اسلام آباد میں اپنی رہائش گاہ بنی گالہ میں عمران اسماعیل سے ملاقات کے بعد کیا گیا۔
ملاقات کے بعد، میڈیا سے بات کرتے ہوئے نامزد گورنر سندھ عمران اسماعیل کا کہنا تھا کہ ’’اعتماد کرنے پر عمران خان اور پارٹی کا شکر گزار ہوں۔ کوشش ہوگی کہ سندھ کے تمام ’اسٹیک ہولڈرز‘ کو ساتھ لے کر چلوں۔ حریف جماعتوں سے کہتا ہوں آپ ایک قدم آگے بڑھائیں ہم دس قدم بڑھائیں گے۔‘‘
انہوں نے کہا کہ ’’سندھ اسمبلی میں اسپیکر، وزیر اعلیٰ سمیت تمام عہدوں کے چناؤ پر مقابلہ کریں گے‘‘۔
I am greatful to khan sb for trusting me with huge responsibility as Governor Sind, inshallah I will try to take all stake holders of Sind along with me in order to develop the province. I will do whatever it takes to deliver what Sind has been deprived of.May Allah give strength
— Imran Ismail (@ImranIsmailPTI) August 11, 2018
25 جولائی کو ہونے والے انتخابات میں عمران اسماعیل کراچی میں ڈیفنس کے علاقہ میں پی ایس 111 کی نشست سے رکن سندھ اسمبلی منتخب ہوئے تھے۔ تاہم، اب گورنر سندھ بننے کی صورت میں انہیں یہ نشست چھوڑنی پڑے گی۔
عمران اسماعیل 1966 میں کراچی میں پیدا ہوئے اور ابتدائی تعلیم کنٹونمنٹ پبلک اسکول سے حاصل کی، جس کے بعد انہوں نے گورنمنٹ نیشنل کالج سے گریجویشن کیا۔
عمران اسماعیل پاکستان تحریک انصاف کے کراچی سے اہم رکن ہیں اور ٹی وی شوز میں اپنی پارٹی کا دفاع کرنے کے لیے زیادہ جانے جاتے ہیں۔
تحریک انصاف اس سے قبل گورنر پنجاب کے لیے چوہدری سرور کے نام کی بھی منظوری دے چکی ہے۔
پاکستان تحریک انصاف اس وقت مختلف شعبوں کے لیے ماہرین بھی تلاش کر رہی ہے اور اس سلسلہ میں تعلیم کے شعبہ میں مشرف دور کے ہائیر ایجوکیشن کمیشن کے خالق ڈاکٹر عطاالرحمٰن اور اسی دور کے وزیر تجارت عبدالرزاق داؤد کو مشیر بنانے پر مشاورت کی جا رہی ہے۔
پی ٹی آئی نے قومی اسمبلی میں اسد قیصر کا نام اسپیکر کے لیے فائنل کیا ہے جو گزشتہ دورِ حکومت میں خیبر پختونخوا اسمبلی کے اسپیکر تھے۔ تاہم ڈپٹی اسپیکر کے لیے اب تک کوئی نام فائنل نہیں ہوسکا ہے۔ جب کہ پنجاب میں وزارت اعلیٰ کے امیدوار کے نام کا آئندہ ایک سے دو روز میں اعلان متوقع ہے۔