آسٹریلیا میں ٹی ٹوئنٹی ورلڈ کپ کے پہلے مرحلے کا آغاز ہو گیا ہے جس کے افتتاحی میچ میں نمیبیا کی ٹیم نے اپ سیٹ کرتے ہوئے سری لنکا کو 55 رنز کے بھاری مارجن سے شکست دی ہے۔
جیلونگ میں کھیلے جانے والے میچ میں سری لنکا نے ٹاس جیت کر نمیبیا کو پہلے بیٹنگ کی دعوت دی جس نے مقررہ 20 اوورز میں 163 رنز بنائے،۔ جواب میں سری لنکا کی پوری ٹیم 19 اوورز میں 108 رنز پر ڈھیر ہو گئی۔
نمیبیا کی جانب سے ڈیوڈ ویسے نے چار اوورز میں صرف 16 رنز دے کر دو کھلاڑیوں کو پویلین کی راہ دکھائی۔ برنارڈ شولز نے بھی چار اوورز میں 18 رنز دے کر دو کھلاڑیوں کو آؤٹ کیا۔
خیال رہے کہ سری لنکا کی ٹیم نے گزشتہ ماہ متحدہ عرب امارات میں کھیلے جانے والے ایشیا کپ کے فائنل میں پاکستان کو شکست دی تھی۔ لیکن آئی سی سی رینکنگ میں پہلے آٹھ نمبرز پر نہ ہونے کے باعث اسے کوالی فائنگ راؤنڈ کھیلنا پڑ رہا ہے۔
Namibia%27s special performance is being lauded by the cricketing fraternity 👏 More 👉 https://t.co/AWWIfHW4AC#SLvNAM | #T20WorldCup pic.twitter.com/iS9k4DY5OB
— ICC (@ICC) October 16, 2022
اس تاریخی کامیابی پر نمیبیا کی ٹیم کے کھلاڑی اپنے جذبات پر قابو نہ رکھ سکے۔
آئی سی سی ورلڈ کپ کے آفیشل ٹوئٹر ہینڈل نے نمیبیا کے کھلاڑیوں کی تصاویر شیئر کرتے ہوئے ٹویٹ کی کہ 'وہ دن جو نمیبیا جلدی نہیں بھولے گا۔'
جیولنگ میں ہی کھیلے گئے ایک اور سنسنی خیز میچ میں نیدرلینڈز نے متحدہ عرب امارات کو تین وکٹوں سے شکست دے دی ہے۔
امارات نے پہلے بیٹنگ کرتے ہوئے مقررہ 20 اوورز میں 111 رنز بنائے۔ نیدرلینڈز نے 112 رنز کا ہدف 19.5 اوورز میں سات وکٹوں کے نقصان پر حاصل کر لیا۔
Netherlands hold their nerves to clinch two points against UAE 🔥More 👇 https://t.co/RivYM168eq
— ICC (@ICC) October 16, 2022
ٹی ٹوئنٹی ورلڈ کپ کے پہلے مرحلے میں آٹھ ٹیمیں سپر 12 مرحلے تک رسائی کے لیے آمنے سامنے ہیں جن میں سے چار کوالی فائی کریں گی۔ سری لنکا، ویسٹ انڈیز، متحدہ عرب امارات، آئر لینڈ، نمیبیا، نیدرلینڈز، اسکاٹ لینڈ اور زمبابوے کوالی فائنگ راؤنڈ کھیل رہی ہیں۔
پہلے مرحلے کا اختتام 21 اکتوبر کو ہو گا جب کہ سپر 12 مرحلہ 22 اکتوبر سے شروع ہو گا۔ پاکستان اور بھارت کی ٹیمیں 23 اکتوبر کو میلبرن کرکٹ گراؤنڈ میں آمنے سامنے ہوں گی۔