بھارت کے وزیرِ خارجہ ایس جے شنکر نے امریکی صدر ڈونلڈ ٹرمپ کے مسئلہ کشمیر سے متعلق بیان کو مسترد کر دیا ہے۔
این ڈی ٹی وی کے مطابق، ایس جے شنکر نے منگل کو بھارت کی راجیہ سبھا سے خطاب کرتے ہوئے کہا کہ بھارتی وزیرِ اعظم نریندر مودی نے امریکی صدر سے مسئلہ کشمیر کے حل سے متعلق کوئی درخواست نہیں کی ہے۔
انہوں نے کہا کہ میں یہ بات ریکارڈ پر لانا چاہتا ہوں کہ امریکی صدر سے بھارت نے ایسی کوئی درخواست نہیں کی۔ پاکستان اور بھارت کے درمیان باہمی تعلقات موجود ہیں جو دو ملکوں کے درمیان ہی رہیں گے۔
ان کا کہنا تھا کہ پاکستان اور بھارت میں باہمی مذاکرات ہوں گے اور وہ جب ہی ہوں گے جب پاکستان سرحد پار دہشت گردی کو روکے گا۔
تاہم، بھارت کی جانب سے امریکی صدر کا دعویٰ مسترد کیے جانے کے بعد امریکہ کے ایک اعلیٰ عہدے دار نے وائس آف امریکہ کو بتایا ہے کہ امریکی صدر واضح کر چکے ہیں، اگر بھارت اور پاکستان دونوں امریکہ سے ثالثی کی درخواست کریں تو امریکہ کشمیر تنازع کے حل کے لیے اپنا کردار ادا کرنے کو تیار ہے۔
بھارت کے اپوزیشن رہنماؤں نے بھارتی وزیرِ خارجہ کے وضاحتی بیان کے باوجود حکومت سے شدید احتجاج کیا۔
اپوزیشن جماعتوں نے مطالبہ کیا کہ نریندر مودی خود پارلیمان میں آ کر وضاحتی بیان دیں۔
اپوزیشن رہنماؤں کا کہنا تھا کہ جب تک بھارتی وزیرِ اعظم ایوان میں آ کر وضاحت نہیں دیتے تب تک اپوزیشن احتجاج جاری رکھے گی۔ بعد ازاں اپوزیشن رہنماؤں نے لوک سبھا اور راجیہ سبھا سے واک آؤٹ بھی کیا۔
بھارت کی اپوزیشن جماعت کانگریس کی رہنما سونیا گاندھی نے صحافیوں کو بتایا ہے کہ انہوں نے اپنی پارٹی کو یہ مسئلہ اٹھانے کی ہدایت کر دی ہے۔ ان کا کہنا تھا کہ ہم امریکی صدر کے بیان کا مسئلہ اٹھا رہے ہیں اور مزید اٹھائیں گے۔
کانگریس کے رہنما اَدھیر چوہدری نے پارلیمان سے خطاب کرتے ہوئے کہا کہ ہندوستان کی سرکار نے امریکہ کے سامنے سر جھکا دیا۔ یہ ایک گمبھیر صورتحال ہے اور ہم اس معاملے پر شرمندہ ہیں۔
صدر ٹرمپ کے بیان پر کشمیر کے علیحدگی پسند رہنماؤں کا ردعمل
بھارت کے زیرِ انتظام کشمیر میں امریکی صدر کے کشمیر سے متعلق بیان کا علیحدگی پسند رہنماؤں نے خیر مقدم کیا۔
علیحدگی پسند رہنما میر واعظ عمر فاروق کا کہنا تھا کہ مسئلہ کشمیر کے سب سے زیادہ متاثرہ فریق کشمیری عوام ہیں۔
میر واعظ نے اپنے ٹوئٹ میں کہا کہ ’’کشمیر کے عوام مسئلہ کشمیر کا جلد حل چاہتے ہیں۔ جو کوششیں یا مذاکرات پاکستان اور بھارت کو مسئلہ کشمیر کے حل کی طرف لے کر جائیں وہ ان کی حمایت کریں گے‘‘۔
Being the most affected party people of #Kashmir want an early resolution to the lingering Kashmir conflict. Been urging for dialogue at all levels.Every effort, pushing India and Pakistan in that direction @POTUS is welcome by the people of J&K.
— Mirwaiz Umar Farooq (@MirwaizKashmir) July 23, 2019
امریکی صدر کا وزیرِ اعظم پاکستان سے ملاقات کے بعد کشمیر سے متعلق بیان
پاکستان کے وزیرِ اعظم عمران خان کے ساتھ ملاقات میں امریکی صدر ڈونلڈ ٹرمپ نے بھارت اور پاکستان کے درمیان کشمیر کے دیرینہ تنازع کو حل کروانے میں کردار ادا کرنے کی پیش کش کی ہے۔
وزیرِ اعظم بننے کے بعد عمران خان کے پہلے دورہ امریکہ میں امریکی صدر سے ملاقات میں صدر ٹرمپ نے کہا کہ ’’مجھے دو ہفتے پہلے بھارتی وزیرِ اعظم نریندر مودی نے کشمیر کے معاملے میں ثالث کا کردار ادا کرنے کے لئے کہا ہے۔ جس کے جواب میں، میں نےکہا کہ اگر یہ مسئلہ حل ہو سکے تو میں بخوشی ثالث کا کردار نبھانے کے لئے تیار ہوں‘‘۔
یاد رہے کہ امریکی صدر اور بھارتی وزیرِ اعظم کے درمیان ملاقات جون میں جاپان میں ہونے والی جی 20 کانفرنس میں ہوئی تھی۔
امریکی صدر کے بیان پر بھارت میں رد عمل
امریکی صدر کی پاکستانی وزیرِ اعظم کو مسئلہ کشمیر پر ثالثی کی پیش کش کے بعد بھارت میں رد عمل سامنے آ رہا ہے۔
بھارتیہ جنتا پارٹی کے نیشنل جنرل سیکریٹری رام مادھو نے ٹویٹ کیا کہ صدر ٹرمپ کا بیان امریکی نظام میں سب سے بڑی خرابی کی نشاندہی کرتا ہے۔ بھارت اور جنوبی ایشیا کی ماہر لیسا کرٹس کی وائٹ ہاؤس اور اسٹیٹ ڈیپارٹمنٹ میں موجودگی کے باوجود بھی اگر صدر ٹرمپ ایسا بیان دیتے ہیں تو اس میں بنیادی طور پر کچھ غلط ہے۔
POTUS’ statement on Kashmir underscores the biggest problem in the US system today. With expert India and South Asia hands like Lisa Curtis in White House n State Dept if he makes such a statement then there is something fundamentally wrong. https://t.co/3PAfq5QDJ9
— Ram Madhav (@rammadhavbjp) July 23, 2019
بھارتی فوج کے ریٹائرڈ میجر اور ٹی وی میزبان میجر ریٹائرڈ گورو آریا نے ٹویٹ کیا کہ کچھ گھنٹوں کے لیے پاکستان میں بے پناہ خوشی تھی۔ اس سے پہلے کہ انھیں احساس ہوا کہ وہ "ٹرمپڈ" ہو گئے ہیں۔
For a few hours, there was mad excitement in Pakistan...before they realised that they had been “Trumped”.https://t.co/w5UusDYXhy
— Major Gaurav Arya (Retd) (@majorgauravarya) July 23, 2019
انڈین نیشنل کانگریس کے ترجمان اور رُکن اسمبلی منیش تیواری نے ٹویٹ کیا کہ یہ بہت ہی سنجیدہ قسم کا دعویٰ ہے جس میں صدر ٹرمپ نے یا تو دونوں کے درمیان ہونے والی گفتگو کو تخلیق کیا ہے۔ یا پھر وہ باتیں آشکار کی ہیں جو دونوں کے درمیان ہوئی تھیں۔ جوائنٹ لیول سیکریٹری آفیسر کا جواب ناکافی ہے۔ وزیرِ اعظم کو چاہیئے کہ وہ دونوں ایوانوں میں بتائیں کہ انھوں نے امریکی صدر سے کشمیر پر ثالثی کے لئے کہا تھا یا نہیں؟
1/2 this is a very serious claim to make wherein he has either invented a conversation or stated what actually transpired between the two. A response by a Joint Secy level officer won’t do. PM must clarify in both houses today whether he asked Trump to mediate on Kashmir or not?
— Manish Tewari (@ManishTewari) July 23, 2019
انڈین نیشنل کانگریس کے رکن سلمان نظامی نے ٹویٹ کیا کہ لگتا ہے کہ صدر ٹرمپ عمران خان پر خوشیوں کی بارش اور کشمیر پر ثالثی کی پیش کش کر رہے ہیں۔ مودی کے کشمیر تنازع پر احتجاج کو کیا ہوا؟ کشمیر بھارت کا اندرونی معاملہ ہے۔ پھر مودی نے صدر ٹرمپ سے ثالثی کے لیے کیوں کہا؟
Looks like Trump is showering Khan with praise & offering to mediate on Kashmir. What happened to Modi’s chest beating on the issue? Kashmir India%27s internal issue. Thn why Modi asked Trump to mediate? pic.twitter.com/KvkSzbAiTm
— Salman Nizami (@SalmanNizami_) July 22, 2019
انڈیا ٹی وی کی ایگزیکیٹو ایڈیٹر نندی رازدان نے ٹوئٹ میں کہا کہ بھارتی حکومت کے لیے بہت ہی عجیب صورتحال ہے۔ وزیرِ اعظم مودی یا تو یہ مانیں کہ انھوں نے تیسرے فریق سے ثالثی کے لیے کہا یا پھر صدر ٹرمپ کو جھوٹا کہیں۔
Very awkward situation for the Indian Govt. Either admit the PM asked for third party mediation on Kashmir or call Donald Trump a liar. Don’t envy the diplomats
— Nidhi Razdan (@Nidhi) July 22, 2019
بھارتی صحافی راجدیپ سردیسائی نے ٹوئٹ کرتے ہوئے کہا کہ امید کرتے ہیں کہ صدر ٹرمپ یہ نہیں سمجھتے کہ کشمیر جنوبی ایشیا میں ایک عالیشان کثیر المنزلہ عمارت ہے، جس کو ایک نئے پارٹنر کی ضرورت ہے۔
Let’s hope that the US president doesn’t think Kashmir is the name of some plush multi storey tower building in South Asia that needs a new partner! Gnight shubhratri!
— Rajdeep Sardesai (@sardesairajdeep) July 22, 2019