بھارت کے ایک اسکول میں مسلمان طالب علم کو استانی کے کہنے پر ساتھی طلبہ کی جانب سے تھپڑ مارنے کا معاملہ قومی سطح پر بحث کا موضوع بن چکا ہے جب کہ خاتون ٹیچر کے خلاف مقدمہ بھی درج کر لیا گیاہے۔
معاملے کی ویڈیو سوشل میڈیا پر وائرل ہونے کے بعد مقامی میڈیا نے بھی اسے سرخیوں میں جگہ دی ہے جب کہ سیاست دانوں نے بھی اس پر اپنے ردِ عمل کا اظہار کیا ہے۔
سوشل میڈیا پر وائرل ہونے والی ویڈیو میں نظر آ رہا ہے کہ ایک طالب علم کو کلاس کے دیگر طلبہ استانی کے کہنے پر منہ پر تھپڑ مار رہے ہیں۔ ویڈیو میں استانی کو یہ کہتے ہوئے سنا جا سکتا ہے کہ "یہ محمڈن بچے (مسلم بچے) ہیں، ان کی ماں باہر چلی جاتی ہے جس کی وجہ سے ان کی پڑھائی خراب ہو جاتی ہے۔"
یہ واقعہ بھارت کی ریاست اترپردیش کے شہر مظفر نگر کے ایک پرائیوٹ اسکول کا ہے اور خاتون ٹیچر ترپتا تیاگی اسکول کی پرنسپل بھی ہیں۔
اس معاملے کو بعض لوگ فرقہ وارانہ واقعے قرار دے رہے ہیں۔ البتہ خاتون ٹیچر کا کہنا ہے کہ ان کا اس طرح کا کوئی ارادہ نہیں تھا۔
#WATCH | "The video that was made viral was edited and cut, I had no such intentions…in our place, Hindus and Muslims stay with unity and we have more Muslim students in our school…there was pressure from the parents of the child to be strict with him. I am handicapped I can’t… pic.twitter.com/WYpbFGetik
— ANI (@ANI) August 26, 2023
ترپتا تیاگی نے ہفتے کو میڈیا سے بات کرتے ہوئے بتایا کہ یہ واقعہ جمعرات کا ہے۔ انہوں نے دعویٰ کیا کہ سوشل میڈیا پر جو ویڈیو وائرل ہے اسے ایڈٹ کر کے شیئر کیا گیا ہے۔
خاتون ٹیچر نے دعویٰ کیا کہ واقعے کے روز بچے کے والد اپنے بیٹے کو مارتے پیٹتے اسکول لائے اور شکایت کی کہ ان کا بیٹا پڑھتا نہیں ہے اس لیے اس پر سختی کی جائے۔
ترپتا تیاگی کے مطابق بچہ پہلی جماعت کا طالب علم ہے جو دو ماہ سے پہاڑے یاد کر کے نہیں آرہا تھا اس لیے اس پر تھوڑی سختی کی گئی۔
اسکول ٹیچر نے مزید کہا کہ وہ معذور ہیں اس لیے خود بچے کی پٹائی نہیں کر سکتی تھیں۔ لہٰذا انہوں نے ساتھی طلبہ کو پٹائی کرنے کا کہا۔ ان کے بقول بچے کے چچا ندیم اس پورے معاملے کی ویڈیو بنا رہے تھے۔
#WATCH | UP: "The video has been circulating since yesterday evening & an inquiry was conducted. On inquiry, it was found that the video was filmed by the boy%27s uncle...This morning their complaint was registered. The Child Welfare Committee is giving counselling sessions to the… pic.twitter.com/ReOEw7lzi5
— ANI (@ANI) August 26, 2023
ترپتا تیاگی کے مطابق وائرل ہونے والی ویڈیو میں لفظ محمڈن ہی شامل کیا گیا ہے اور پوری ویڈیو ایڈٹ شدہ ہے۔ انہوں نے محمڈن لفظ کی وضاحت کرتے ہوئے کہا کہ وہ یہ کہنا چاہتی تھیں کہ جتنی بھی مسلمان مائیں ہیں وہ اپنے بچوں کو ننھیال لے جاتی ہیں، امتحانات ہونے والے ہیں اس لیے بچوں کی پڑھائی متاثر ہوتی ہے۔
اسکول ٹیچر نے اعتراف کیا کہ ان سے غلطی ہوئی ہے اور انہیں اپنے اقدام پر پچھتاوا بھی ہے۔ لیکن ان کےبقول، "مجھے اس چیز پر دکھ ہے کہ اسے عالمی مسئلہ بنادیا گیا ہے۔"
بھارت کی اپوزیشن جماعت کانگریس کے رہنما راہل گاندھی نے ایک بیان میں کہا کہ "معصوم بچوں کے ذہنوں میں تعصب کا زہر بونا، اسکول جیسے مقدس مقام کو نفرت کے بازار میں تبدیل کرنا، ایک استاد ملک کے لیے اس سے برا کچھ نہیں کر سکتا۔"
راہل گاندھی نے حکمراں جماعت بھارتیہ جنتا پارٹی پر تنقید کرتے ہوئے کہا تھا کہ یہ بی جے پی کا پھیلایا ہوا وہ ایندھن ہے جس نے انڈیا کے کونے کونے میں آگ لگا دی ہے۔
मासूम बच्चों के मन में भेदभाव का ज़हर घोलना, स्कूल जैसे पवित्र स्थान को नफ़रत का बाज़ार बनाना - एक शिक्षक देश के लिए इससे बुरा कुछ नहीं कर सकता।ये भाजपा का फैलाया वही केरोसिन है जिसने भारत के कोने-कोने में आग लगा रखी है।बच्चे भारत का भविष्य हैं - उनको नफ़रत नहीं, हम सबको मिल…
— Rahul Gandhi (@RahulGandhi) August 25, 2023
آل انڈیا مجلس اتحاد المسلمین کے صدر اسد الدین اویسی نے بھی حکمراں جماعت پر تنقید کرتے ہوئے وائرل ویڈیو پر تبصرہ کیا اور کہا کہ یہ گزشتہ نو برس کی پروڈکٹ ہے۔ یہ پیغام بچوں کے ذہنوں میں ڈالا جا رہا ہے کہ کسی بھی وجہ کےبغیر کسی مسلمان کو مارا پیٹا جا سکتا ہے اور اس کی تضحیک کی جا سکتی ہے۔
The video from Muzaffarnagar where a teacher is asking her students to slap a Muslim boy is a product of the last 9 years. The message being drilled into the minds of little children is that one can beat up & humiliate a Muslim without any repercussions. The father of the…
— Asaduddin Owaisi (@asadowaisi) August 26, 2023
سیاست دانوں کی جانب سے بیانات پر ترپتا تیاگی نے کہا کہ ایک چھوٹا سا مسئلہ تھا جس پر سیاست دانوں نے بات کرنا شروع کر دی ہے۔ ایک چھوٹے سے معاملے پر اتنی بڑی سطح پر لے جانے سے نہ تو ٹیچر پڑھا سکیں گے اور نہ ہی بچے پڑھ سکیں گے۔
واضح رہے کہ بچے کے والد اور اسکول پرنسپل ترپتا تیاگی کے درمیان تصفیہ ہو گیا ہے۔ طالب علم کے والد کی بھی ایک ویڈیو سوشل میڈیا پر وائرل ہے جس میں وہ بتاتے ہیں انہوں نے اپنے بیٹے کو اسکول سے نکلوا دیا ہے اور امتحانی فیس اور ماہانہ فیس کی مدد میں دیے جانے والے پیسے واپس لے لیے ہیں۔
بھارت میں کمیشن برائے حقوقِ اطفال کے چیئرپرسن پریانک کنونگو نے خاتون ٹیچر کے خلاف کارروائی کا مطالبہ کیا ہے اور عوام سے اپیل کی ہے کہ وہ ویڈیو شیئر کر کے کمسن بچے کی شناخت ظاہر نہ کریں۔