امریکی شہری ایشلی ہال نے اپنی شادی کی تقریب بھارت میں منعقد کرنے کا فیصلہ کیا اور اس کے لئے بھارت کے شہر کوچی کے ایک فائیو سٹار ہوٹل میں تقریب سے آٹھ ماہ قبل بکنگ کرا لی تھی۔
لیکن جب تقریب کے انعقاد میں صرف دو روز باقی رہ گئے تو ہوٹل انتظامیہ نے انہیں مطلع کیا کہ بھارت کے صدر رام ناتھ کووند کی اچانک کوچی آمد کے باعث سیکیورٹی وجوہات کی بنا پر ان کی بکنگ منسوخ کر دی گئی ہے۔ لہذا وہ اپنی شادی کی تقریب کے لئے کسی دوسری جگہ کا انتظام کریں۔
شادی کے دعوت نامے بھجوائے جا چکے تھے اور مہمانوں کی آمد کا سلسلہ شروع ہونے ہی والا تھا۔ ایشلی نے دلبرداشتہ ہو کر ٹویٹ کی، ’’آپ اپنی شادی کے لئے ڈیسٹی نیشن ویڈنگ کے طور پر 8 ماہ قبل بھارت کے ایک بہترین ہوٹل میں بکنگ کراتے ہیں اور عین شادی کے دن بھارت کے صدر اچانک اس ہوٹل کے دورے پر پہنچ جاتے ہیں۔ پھر آپ سے کہا جاتا ہے کہ آپ 48 گھنٹے کے اندر شادی کی تقریب کے لئے نئے سرے سے کسی اور جگہ بندوبست کریں۔‘‘
Sometimes you plan a destination wedding for 8 months at an elite hotel in India. Sometimes the President of India makes an impromptu trip to that hotel on the day of the wedding. Sometimes you get 48 hours notice to plan an entirely new wedding.
— Ashley Hall (@hall_ash) January 4, 2020
شادی کی تقریب منگل کے روز منعقد ہونا تھی جب کہ بھارت کے صدر کووند نے پیر کی رات کوچی پہنچ کر اسی ہوٹل میں قیام کا فیصلہ کیا تھا۔ یوں سیکیورٹی اہل کاروں نے ہوٹل سے کہا کہ وہ شادی کی تقریب کی بکنگ کینسل کر کے اسے کسی اور جگہ منتقل کرائیں۔
اس موقع پر دلبرداشتہ دلہن نے ہمت کر کے بھارت کے صدر کے دفتر سے مدد حاصل کرنے کی کوشش کرتے ہوئے ٹویٹ کیا، ’’ ایوان صدر، کیا آپ اپنی سیکیورٹی ٹیم کے سلسلے میں کوئی ایسی مدد کر سکتے ہیں جس سے ہمیں صرف 48 گھنٹے پہلے شادی کی تقریب اس ہوٹل سے کسی اور جگہ منتقل کرنے سے بچایا جا سکے۔‘‘
Hey @rashtrapatibhvn- anything you can do to help us with your security team so that we don’t have to move our wedding from the @Taj_Cochin in under 48 hours? https://t.co/0S5y9az9Hk
— Ashley Hall (@hall_ash) January 5, 2020
اگرچہ بھارتی ایوان صدر سے ٹویٹ کے ذریعے کوئی براہ راست جواب تو نہ دیا گیا، لیکن ہوٹل انتظامیہ کو ہدایت کر دی گئی کہ وہ ایشلی کی شادی کی تقریب پروگرام کے مطابق انجام پانے کے انتظامات کرے۔
ایشلی نے ایک اور ٹویٹ میں شکریہ ادا کرتے ہوئے کہا، ’’میں تاج کوچن ہوٹل اور سرکاری اہل کاروں کا شکریہ ادا کرنا چاہتی ہوں کہ انہوں نے آج تمام دن ہمارے ساتھ مل کر شادی کی تقریب کا انتظام کیا۔ مجھے امید ہے کہ ہم شادی کی یہ خوبصورت تقریب ایوان صدر کی مہربانی سے منعقد کر پائیں گے۔‘‘
I want to thank the @Taj_Cochin and State Officials for working on this with us throughout the day. Hoping we can have a beautiful wedding with the blessings of The Honorable @rashtrapatibhvn. https://t.co/i6lR4D9YDQ
— Ashley Hall (@hall_ash) January 5, 2020
اس کے لئے ہوٹل میں سیکیورٹی نرم کر دی گئی اور بھارتی صدر کے پروگرام میں قدرے تبدیلی کرتے ہوئے ان کے لئے ہوٹل سے شادی کے دن صبح ہی واپسی کا پروگرام طے کیا گیا تاکہ شام کو ہونے والی شادی کی تقریب میں کوئی خلل نہ پیدا ہو۔
بعد میں بھارتی صدر نے بھی ٹویٹ کا سہارا لیتے ہوئے دلہن کو نیک خواہشات بھجوائیں۔ ان کی طرف سے کہا گیا، ’’ہمیں خوشی ہے کہ یہ معاملہ بخوبی طے پا گیا۔ صدر کووند کی طرف سے اس موقع پر آپ کے لئے بہترین تمنائیں۔‘‘
We are glad the issues have been resolved. President Kovind conveys his best wishes to you on this joyous occasion
— President of India (@rashtrapatibhvn) January 5, 2020