بھارت نے ایک بار پھر افغانستان میں اپنی سفارتی موجودگی کے لیے ماہرین کی ایک ٹیم کابل بھیج دی ہے۔ اس ٹیم نے گزشتہ برس بند ہونے والا بھارت کا سفارت خانہ ایک بار پھر فعال کر دیا ہے۔
اگست 2021 میں کابل پر طالبان کے قبضے کے دوران نئی دہلی نے افغان دارالحکومت کابل میں سفارت خانے سمیت ہرات، قندھار، جلال آباد اور مزار شریف میں اپنے قونصل خانے بند کر دیے تھے اور وہاں سے عملہ نکال لیا تھا۔
بھارتی اخبار ’ہندوستان ٹائمز‘ کے مطابق حالیہ ہفتوں میں افغانستان میں برسرِ اقتدار طالبان اور نئی دہلی کے درمیان پسِ پردہ کئی ملاقاتیں اور اجلاس ہوئے ہیں، جس کے بعد بھارتی حکام کے کابل واپس جانے کی راہ ہموار ہوئی ہے۔
بھارت کی ماہرین پر مبنی ٹیم جمعرات کو کابل پہنچی ہے۔ اس حوالے سے بھارت کی وزارتِ خارجہ نے ایک بیان میں کہا ہے کہ یہ ٹیم سفارت خانے بھیجی گئی ہے جس کا کام انسانی بنیادوں پر امداد کی فراہمی کی بھر پور نگرانی کرنا اور اس حوالے سے کام کرنے والے اداروں کے درمیان ربط قائم کرنے میں کردار کی ادائیگی ہوگا۔ یہ تمام اقدامات بھارت اور افغان عوام میں رابطوں کا تسلسل برقرار رکھنے کے لیے کیے جا رہے ہیں۔
Breaking: India deploys technical team at its embassy in Kabul. MEA issues statement. pic.twitter.com/8gjAejPGWD
— Sidhant Sibal (@sidhant) June 23, 2022
بھارتی ذرائع ابلاغ کی رپورٹس کے مطابق نئی دہلی اپنے اس اقدام کو افغان عوام سے تاریخی تعلقات اور رابطوں کا تسلسل ظاہر کر رہا ہے۔تاہم اس کا یہ مطلب نہیں ہے کہ بھارت افغانستان میں طالبان کی حکومت کو تسلیم کرنے جا رہا ہے۔
خبر رساں ادارے ’ایسوسی ایٹڈ پریس‘ کے مطابق بھارت کے ماہرین کی ٹیم ایئر فورس کے طیارے میں کابل پہنچی تھی۔ اس طیارےمیں افغانستان میں آنے والے حالیہ زلزلے سے متاثرہ افراد کے لیے امداد بھی تھی۔
اس زلزلے میں لگ بھگ ایک ہزار افراد ہلاک اور سینکڑوں زخمی ہوئے ہیں، جب کہ سرحدی علاقوں میں مکان گرنے سے بڑی تعداد میں شہری بے گھر بھی ہوئے ہیں۔
India, a true first responder. https://t.co/riXkZlzwxC
— Dr. S. Jaishankar (@DrSJaishankar) June 23, 2022
بھارت کی جانب سے انسانی ہمدردی کی بنیاد پر کابل پہنچنے والی امداد کسی بھی ملک کی زلزلے کے بعد افغانستان کو پہلی براہِ راست امداد قرار دی جا رہی ہے۔
’اے پی‘ کے مطابق نئی دہلی سے فوجی طیارے کے ذریعے 13 ٹن ادویات، پانچ لاکھ کرونا ویکسین اور سردی سے بچنے کے لیے کپڑوں سمیت دیگر اشیا افغانستان بھیجی گئی ہیں۔اس کے علاوہ گندم بھی بھیجی گئی ہے۔
Press Release on Earthquake Relief Assistance for the people of Afghanistan ➡️ https://t.co/ZLyMFJPPMC pic.twitter.com/sZlg5z4ezm
— Arindam Bagchi (@MEAIndia) June 24, 2022
نئی دہلی نے کابل بھیجی گئی ٹیم میں شامل ٹیکنیکل ماہرین کے نام جاری نہیں کیے اور نہ ہی یہ وضاحت کی ہے کہ بھارت کی ٹیم میں کتنے افراد شامل ہیں۔
رپورٹس کے مطابق نئی دہلی نے ٹیم بھیجنے کا فیصلہ اس لیے کیا ہے کیوں کہ خطے کے دیگر ممالک چین، روس، ایران اور پاکستان کابل میں پہلے سے موجود ہیں اور یہ رائے موجود ہے کہ نئی دہلی افغانستان میں اپنی موجود گی برقرار نہیں رکھ سکتا۔
یہ اطلاعات بھی سامنے آ رہی ہیں کہ بھارت کے ماہرین کی ٹیم کو افغانستان کی فضائی کمپنی کے ذریعے گزشتہ ہفتے کابل جانا تھا، مگر کابل میں گوردوارے پر حملے کے سبب یہ روانگی مؤخر کر دی گئی تھی۔ اس حملے کی ذمہ داری شدت پسند تنظیم داعش نے قبول کی تھی۔
India hands over assistance to Afghanistan in the aftermath of earthquake in Kabul. Joint Secretary, Pakistan Afghanistan Iran division of MEA, JP Singh also present. pic.twitter.com/tJMgUGZKe8
— Sidhant Sibal (@sidhant) June 24, 2022
واضح رہے کہ تین ہفتے قبل بھارت کی وزارتِ خارجہ کے افغانستان کے لیے مقرر کردہ نمائندے جے پی سنگھ کی قیادت میں وفد نے طالبان کے وزیرِ خارجہ امیر خان متقی سمیت دیگر رہنماؤں سے ملاقاتیں کی تھیں۔ رپورٹس کے مطابق ان ملاقاتوں میں طالبان نے بھارتی حکام کو سفارتی عملہ کابل بھیجنے پر سیکیورٹی فراہم کرنے کی یقین دہانی کرائی تھی۔
طالبان کی وزارتِ خارجہ کے ترجمان عبد القہار بلخی نے بھی دو جون کو ایک بیان جاری کیا تھا کہ امیر خان متقی نے بھارت پر کابل میں سفارتی موجودگی پر زور دیا تھا۔ اس کے ساتھ ساتھ قونصلر سروس شروع کرنے کی بھی گزارش کی گئی تھی۔
The second consignment of India%27s earthquake relief assistance for the people of #Afghanistan reaches Kabul, says the Ministry of External Affairs. pic.twitter.com/EF4pQx5GiZ
— ANI (@ANI) June 24, 2022
بھارت سے سامنے آنے والی رپورٹس کے مطابق طالبان نے یہ اشارے بھی دیے ہیں کہ بھارت کی افغانستان میں سفارتی موجودگی کو خوش آمدید کہا جائے گا۔