مشترکہ مفادات کونسل نے ساتویں مردم شماری کے نتائج کی متفقہ طور پر منظوری دے دی ہے جس کے مطابق پاکستان کی مجموعی آبادی 24 کروڑ 14 لاکھ 90 ہزار ہے۔
پاکستان کی تاریخ میں پہلی مرتبہ ڈیجیٹل مردم شماری ہوئی ہے جس کے نتائج کے مطابق ملک کے سب سے بڑے صوبے پنجاب کی آبادی 12 کروڑ 76 لاکھ 80 ہزار ہے جب کہ سندھ کی آبادی پانچ کروڑ 56 لاکھ 90 ہزار، خیبر پختونخوا کی آبادی چار کروڑ آٹھ لاکھ پچاس ہزار، بلوچستان کی آبادی ایک کروڑ 48 لاکھ 90 ہزار اور وفاقی دارالحکومت اسلام آباد کی آبادی 23 لاکھ 60 ہزار ہے۔
اس لحاظ سے پاکستان کی آبادی میں اضافے کی موجودہ سالانہ شرح نمو 2.55 فی صد ہے۔ یعنی خیبر پختونخوا کی آبادی میں 2.38 فی صد، پنجاب 2.53 فی صد، سندھ 2.57 فی صد اور بلوچستان کی آبادی میں 3.20 فی صد اضافہ ہوا ہے۔
The Council of Common Interest (CCI) meeting on Saturday August 5, 2023, unanimously approved the results of the first ever #DigitalCensus2023. #PakPBS #DigitalCensusPk #Census2023 pic.twitter.com/nCE0AQkVQ3
— Pakistan Bureau of Statistics (@PBSofficialpak) August 5, 2023
وزیرِ اعظم شہباز شریف نے گزشتہ چھ سال کے دوران ملک کی مجموعی آبادی میں ساڑھے تین کروڑ کے اضافے کو باعثِ فکر قرار دیا ہے اور کہا ہے کہ پاکستان کی آبادی کے اضافے کا تناسب معاشی ترقی سے کہیں زیادہ ہے۔
پاکستان کی پہلی ڈیجیٹل مردم شماری یکم مارچ 2023 سے 22 مئی 2023 تک جاری رہے جب کہ ڈیٹا اکٹھا کرنے کے بعد کا سروے آٹھ سے 19 جولائی 2023 تک جاری رہا۔
وزیرِ اعظم آفس کی جانب سے جاری بیان کے مطابق سی سی آئی اجلاس میں چاروں صوبوں کے وزرائے اعلیٰ اور تمام سیاسی جماعتوں کے نمائندوں نے مردم شماری کے نتائج سے مکمل اتفاق کیا ہے۔
Under the chairmanship of PM Pakistan, Muhammad Shahbaz Sharif the Council of Common Interest, in its 50th meeting, has approved the results of First Digital Census of Pakistan with full consensus. The meeting was also attended by all Provincial Chief Ministers. #DigitalCensusPK pic.twitter.com/dUSNQBt3JE
— Pakistan Bureau of Statistics (@PBSofficialpak) August 5, 2023
اعلامیے کے مطابق سی سی آئی اجلاس کو بتایا گیا کہ ڈیجیٹل مردم شماری کے لیے قومی رجسٹریشن کے ادارے نادرا نے نہ صرف سوفٹ ویئر بلکہ ایک لاکھ 26 ہزار ٹیبلٹس، نیشنل ٹیلی کام کارپوریشن نے ڈیٹا انفرااسٹرکچر، اسٹوریج اینڈ کمپیوٹنگ کی سہولیات جب کہ اسپارکو نے بلاکس کی تازہ ترین سیٹلائیٹ کی ڈیجیٹل تصاویر مہیا کیں۔
اس کے علاوہ صوبائی حکومتوں نے ایک لاکھ 21 ہزار اہلکار، مسلح افواج اور قانو ن نافذ کرنے والے اداروں نے اعدادو شمار اکھٹا کرنے والے اہلکاروں کو سیکیورٹی فراہم کی۔